الاثنين، 15 سبتمبر 2008

بين الأنتماء و التخريب ... شعرة



من وسط الشركات اللى بروحها كتير بحكم شغلى .. شركات البترول

على ما أعتقد أنى روحت جميع شركات البترول اللى فى أسكندرية

كل مرة كنت بفكر .. أناابيب البترول اللى ماشية فى الطريق .. عندكـ مثلا

شركة أسكندرية للبترول .. من الشركات المصدرة للبترول .. و بتستخدمـ ميناء خاص بها

المفروض أنها بتوصل من الشركة للميناء عن طريق أنابيب .. و بيفصل بين الشركة و الميناء طريق سيارات

و بالتالى لازمـ يكون فى حل .. الحل فى كوبرى علوى يكون حامل للأنابيب دى علشان توصل للميناء


بعد حادث الدويقة .. بدأت أفكر ..

أزاى الدولة بتراهن على ثقتها فى شعبها المحترمـ اللى مش ممكن يمس الأنابيب دى باى سوء

أزاى الدولة عندها ثقة عمياء فى أن محدش حيجرء من الأرهابين لا قدر الله و يمس الأنابيب دى

المهمـ ..

عديت على المكان دا .. و فرضت لا قدر الله .. لا قدر الله

أن فى موظف فى الشركة مثلا فقد حد عزيز عليه فى حادث ..

مثلا الدويقة .. أو العبارة .. أو القطار .. أو عمارة لوران

تخيل لو أنكـ شغال فى مكان و بتبنى و بتجتهد .. و جالكـ تليفون ..

ألحق عمارتكـ اللى ساكن فيها وقعت .. و أبنكـ الوحيد و مراتكـ ماتوا

بلاش دى .. سخيفة قوى

طيب لو جالكـ تليفون .. أبنكـ و مراتكـ اللى كانوا فى عمرة و هما راجعين بالعبارة غرقت و ماتوا

و تعرف أن كان فى أهمال جسيمـ من مؤسسات الدولة و من كل واحد مسئول عن خروج العبارات

بلاش دى كمان .. خيالى قوى انت

طيب لو صحيت فى يومـ ألحق القطار اللى راح فيه أبنكـ المحلة من أسكندرية

علشان يروح كلية الهندسة اللى فرق بينها و بين أسكندرية نص درجة ولع بأبنكـ و مات محروق فيه

تخيل كل الحاجات دى .. تخيل معاها بقى ..

أن فى واحد معدى كل يومـ على الأنابيب دى و مش لاقى شغل

تخيل واحد أعتدى عليه فى قسمـ شرطة بدون اى ذنب بس علشان الظابط وشه مش عاجبه ..

و كان معدى صدفة على الأنابيب دى .. و شاف أنها تار

تخيل واحد أمه ماتت فى المستشفى علشان الاهمال أو الفلوس مش كاملة او النور قطع ..

و كان معدى صدفة على الأنابيب دى .. و شاف انها تار

و تخيل .. و تخيل .. و مصــر فيها حاجات تخلى خيال الواحد خصب جدا

تخيل بعد كل اللى قولته دا ..

أن الدولة لسه مصممة على الرهان على شعبها الجميل المهاود و بتحطله الأنابيب فى وسط الطريق !!

أنا قادر أفهمـ أن الأنابيب دى كانت من أيامـ الرئيس جمال عبد الناصر و الرئيس أنور السادات

لكن اللى مش قادر أفهمه .. ازاى فى عهد الرئيس محمد حسنى مباركـ .. لسه الأنابيب برا و حتى محدش دفنها

أكيد هما فاكرين أن الأنتماء بيزيد مش بيقل ..!!!!


مش قصدى أحرض حد على حاجة .. كل اللى أقصده ..
TakeCare .. و مترجعش تقول مختل عقلياً

10 التعليقات:

Founoon يقول...

ماهو الناس فعلا بتنتقم من الحكومة بس في الحاجات البسيطة يعني ما وصلتش لانابيب :)

بص على اي حاجة عامة ..اتوبيس ..مترو ..قطر ..مدرسة حكومة ..مستشفى حكومة

اي حاجة حكومة البني ادمين بيجيبوا اجلها اللي مش ناقص اصلا

تلاقيهم بس لسه ماجمعوش موضوع الانابيب دا او مش عارفينه

اول ما يشموا خبر هيجيبوا داغه ماتقلقش :)

banouta masreya يقول...

مش حاسة خالص ان ده ممكن يحصل احنا شعب نايم لدرجة مرعبة بيصحوا بس لما نانسي او شاكيرا ييجوا لكن تخريب و حبس و كلبشات ما تلاقيش..والله لو المقطم ذات نفسه اتهد على اللى فيه كلهم ما حد هيتحرك ولا يعمل حاجة..
ما تقلقش على الانابيب ما حدش هييجى ناحيتهم:D:D

banouta masreya يقول...

اقرى دى يا محمد حلوة اوى
http://www.almasry-alyoum.com/article2.aspx?ArticleID=178617

حياتي كلها لله يقول...

السلام عليكم
فعلا غريبة .....!!!!
ربنا يستر..بس متهيألي الشعب المصري أعقل من كده ...يعني مش معقول يولع في بلده "و لا يمكن بقي دلوقتي "


تحياتي
د/سلمي

Maga يقول...

يابنى دنا الاسهل انى ارمي قنبلة جوا الشركة ذات نفسها
انابيب ايه ومواسير ايه
سيبك من السيناريوهات الفشلة اللى فى دماغك
وفكك من الوسواس الخناس اللى عمال يوسوسلك فى دماغك دي

Here i'm يقول...

فنون ..

ما هيا دى المصيبة .. يبقى الراجل راكب المواصلات اللى شايله من الأرض و يبوظ كراسيها و يجيى يشتكى أن الكراسى بايظة :D

ياريت ميعرفوش طريقها أحسن :D

Here i'm يقول...

بنت مصرية ..

هوا انتى عايزاهم يصحوا على الأنابيب :D

حرام عليكى يا حاجة .. :D

Here i'm يقول...

بنت مصرية تانى :D

أه أه طبعا قريت المقال دا .. ألا مقال مجدى بيه خش عليه :D

Here i'm يقول...

دكتورة سلمى ..


محدش يقدر يجزم أن الشعب حاليا يقدر يحرق بلده و لا لأ ... اللى بيحصل دا يخلى الواحد يلاقى ألوف الأعذار لأى عمل تخريبى غير مسئول ..

Here i'm يقول...

ماجا ..

ما تفكك منى يابنى .. أنت تمسح مدونتك تانى و الله .. ترتاح و تريحنا :D

يا عم الحلو أنت .. أنت لو مسكت فاس و لا شاكوش تعمل مصيبة أساسا .. دا غاز و بترول .. تخيل كده بترول فى الشارع .. أحمدكـ ياااااااااارب :D