الأربعاء، 11 مارس 2009

فاشل ..







بالورقة و القلمـ .. و بالأرقامـ و الحسابات و المنطق ..
لغاية دلوقتى على رأى بابا "
أنا فاشل "
و مع كل الفشل دا .. بستغرب انا أزاى لسه منهرتش ..



.. :: .. :: .. :: .. :: ..






عيد الأمـ جاى .. و تظهر على طول ذكريات طقمـ البهارات اللى كنت بجيبه و أنا صغير لماما
و كنت ببقى فرحان قوى أنى جايبلها طقمـ بهارات ..
منه رخيص علشان مصروفى و منه كبير 5 أو 10 علب :D
و أكتشفت أن حتى الهدايا بنستخدمها منها
مش معقول ماما حتستخدمـ طقمـ البهارات لوحدها فى البيت يعنى :D



.. :: .. :: .. :: .. :: ..





العسيلى بالنسبالى .. مغنى كلاسيكى بحت بأدوات تكنولوجية ..
بشوف فيه مطرب الحب النضيف .. أول مرة أسمع مطرب بيغنى للجواز و النصيب
مطرب النهايات السعيدة و القسمة و النصيب ..
مطرب بيلعب فى شارع فاضى .. بيدندن فى أوضه مفهاش حد غيره
واحد بيقول لحبيبته ..

لا مُلك مدينة ولا جاه ولا زينة يبعدونى عنك .. لقمة تكفينا و موجه تغطينا على شاطىء مليان حبكـ .. و هناكـ ننسى الناس .. و كفاية عليا أنكـ جنبى .. و نبنى قصور من صدف و زهور ياللى أنتى نور بيزيد فرحى .. مفيش أجمل من أنكـ تفضلى معايا على طول .. عيونى مش راضية تفارقكـ لأن جمالكـ مش معقول

واحد بتعيش معاه كل فترات الشباب ..
فى ألبومه الأول .. تحس بالحيرة و التوهان
البومه التانى .. خلاص لاقيتها
ألبومه التالت .. أنتى بيتى و مطرحى
ألبومه الرابع فى رأيى حيكون .. بعد سنة جواز


واحد لما ساب حبيبته غنالها ..

طول عمر حياتك مشغولة و مليانة بالناس .. و علشان أقرب بأى صوة دا بالنسبالى أنجاز .. قدرت أوصلكـ رغمـ كل الناس اللى بيحوطوكى .. و خليتكـ تحبينى يا خسارة زى أخوكى و كان صعب عليا أخسركـ لما أصرحكـ بالحقيقة .. و كان صعب اللى بنيته فى سنين يروح فى دقيقة حاضر .. حغنيلكـ فى فرحكـ الليلادى .. من أمتى قدرت أرفضلكـ طلب .. حتى نجومـ السما حاولت أجبهالكـ و أنا أيه يهمنى غير أنى أشوف فرحتكـ أو أنى أشيل دمعتكـ



واحد بيغنى لحبيبته الفستان الأبيض ..
بيقول أنه بيحلمـ بيها فى يومـ فرحهمـ ..
و الألبومـ اللى بعديه بيقول ..
دا أنتى بيتى و مطرحى .. بابه هوا قلبكـ .. و عنيكى شبابيكـ بتخلينى أشوف النور اللى أنا محتاجله و أنتى حياتى و دنيتى .. و دا أملى و فرحتى .. و انتى سندى و قوتى .. و دا زادى فى رحلتى و بعدين بيقولها طول ما أنتى جانبى بلاقيكى تملى وش السعد عليا .. حبيبة قلبى و معاكى ناقصنى أيه .. طول ما أنتى جانبى عمال أقرص فى نفسى كل شويه ومش مصدق اللى أنا دلوقتى فيه


قبل كل دا كان بيحكلها أزاى كان اليومـ اللى راح فيه يتقدملها

أحساسكـ أيه النهاردة .. و أنا جايلكـ فى بيتكـ .. جاى أقول لأهلكـ قد أيه أنا حبيتكـ جاى للبيت بحاله نتكلمـ يومـ بطوله .. جوا قلبى الكلامـ بس ياريت اعرف أقوله و أكيد قلبكـ بيرقص و أكيد قلبكـ قلقان .. ما أنا برضه زيكـ و أكتر مستنى من زمان اليومـ اللى تبقى فيه دايما حواليا .. حفضل أحبكـ و أ شيلكـ جوا عنيا أقرب الناس لقلبى جايين كمان معايا .. دا أبويا و دى أمى و أختى طبعا عرفاها و طبعا أبنى خالتى قاعد فى البيت مستنى مش عايز يكلمنى أصله خايف أكتر منى

و بعد ما اتجوزا .. و ظهور نظرية العيوب

أنا عايزكـ زى ما أنتى .. مش عارف خايفة ليه و انا عارفكـ زى ما أنتى و دا اللى أتعودت عليه و بحبكـ لما تتعصبى و طريقتكـ لما تهزرى و بشوفكـ أحلى يومـ بعد يومـ و بحبكـ لما بتركزى فى ذوقكـ و أنتى بتلبسى .. و عنيكى و هما مليهمـ النومـ و بحبكـ لما تتكلمى و طرقتكـ لما تسلمى .. و لما تخبى سر يبان على طول دا بحبكـ لازمـ تفهمى .. فى عيونى دايما تكبرى .. و عيوبكـ عندى دا شىء مطلوب


أغانيه بتفكرنى بـ Bryan Adams و هوا بيقول Here I'm
بتفكرنى بـ Kenny Rogers و هوا بيقول She believes in me
بتفكرنى بـ Bryan Adams و هوا بيقول when a man love a women


أغانى العسيلى بتعيشنى مود الحب النضيف ..
اللى ملوش نهاية غير الجواز و الفستان الأبيض و البيت
كفاية لما يقول .. فى عيونى دايما تكبرى .. وعيوبكـ عندى دا شىء مطلوب
أغانيه بتعيشنى مود بعيداً عن مود عايزها موزة و حلوة و محترمة و لعوب :D

يمكن تبان أغانيه لحد تانى قمة فى التفاهة ..
بس بالنسبالى أغانيه ليها بُعد تانى عن حب اليومين دول




.. :: .. :: .. :: .. :: ..



حد شاف فيديو المتهمـ فى قضية نادين و هبة ..

الفيديو ناشراه المصرى اليومـ .. وكيل النيابة و لا الظابط ولا مش عارف مين

بيقولوا انتوا حتتكلم عن الضائقة المالية اللى كنت بتمر بيها

و أن صحابكـ قالولك تسرق البيوت اللى كنت شغال فيها فى 6 أكتوبر

و بعد كده وجه كلامه لبتاع المونتاج و قاله " انا مش عايز صوتى يبان فى الفيديو "

حمل الفيديو





.. :: .. :: .. :: .. :: ..





أحدث صيحات صيف 2009

بعد أستنفاذ مخزون مختل عقلياً و مخزون ماس كهربائى

حصريا لدى بوتيكات وزارة الداخلية ..

ضائقة مالية ..

هوا دا عنوان سيزون 2009


.. :: .. :: .. :: .. :: ..






تعديل وزارى تغيير وزير الرى و الموارد المالية
و أستحداث منصب لطنط مشيرة خطاب لوزارة الأسرة و السكان
و تغيير مسمى وزارة الصحة و السكان و جعلها وزارة الصحة فقط

كل اللى يشدنى فى التعديل ..

أن نظيف قال أن محمود أبو زيد وزير الرى طلب أعفائه بسبب ظروفه الصحية
الموضوع ببساطة هوا حاجة من 3 ملهمش رابع :
يا أما فى غضب من الحكومة بسبب تصريحاته أول أمبارح فى أسوان اللى وجه أنتقادات للحكومة بسبب مشروع توشكى
يا أما غضب من الوزير بسبب التباطىء فى تشكيل المجلس الأعلى للمياه
يا أما أتجاه الحكومة لقفل موضوع نقابة المهندسين بترشيح الوزير السابق المحبوب من المهندسين
على فكرة وزير الرى من أحدى علماء المياة و الثروات المائية فى العالمـ ..



.. :: .. :: .. :: .. :: .. :: ..













20 التعليقات:

dr.lecter يقول...

انت فااشل"؟

امال انا ابقي اييه؟

انت يامحمد مش فاشل خالص علشان انت طمووح ومهما وقعت بتعرف تكمل ومافيش حاجه بتهزك ممكن تكون عندك مشكله في مجال معين لكن ده مش معناه انك فاشل خالص


انا يابني كانوا بيقعدوا يقولوا لي يافاشل علشان مبعرفش اعمل اي حاجه صح خالص



العسيلي انا لسه امبارح منزل البومه ومش عاوز اقولك اتنا اصلا بكره الوااد ده اد ايه بس قلت اجرب اسمع

هم بالظبط اربع اغاني اللي علقوا معايا والباقي كله هبل اغنيه مش زي الافلام ورسام وطراطير و كمان اغنيه تانيه

هم رغم انهم تحس كده بيتقال كلام حلو بس مش ماشي مع الموسيقي ومافيهوش سيجع ولا جناس ولا ترابط بس الكلام نفسه فيه حاجه معرفش ازاي

انا بصراحه اصلا مابسمعش للجيل بتاعي العسيلي بتاتا لا هو ولا حماقي ولا تامر ولا غيره لان اغانيهم مابتاثرش فيا ومابتحركنيش

بس الغنوتين اللي قلتلهم دول فعلا سابوا فيا تاثيير غرييب


الحب والكلاام ده مش شايف ان الاغاني بتعرف تعبر عنه لانه ساعات بيبقي مبالغ فييه جدا يمكن لو قريت الكلاام ده في كتااب او روايه او شوفتها بعيني ادام ناس اقزلك مااشي اه عندك حق

لكن غير كده كله هبل بصراحه وحاله مزيفه احجنا بنخلقها بنفسنا ونوهم نفسنا اننا عايشين في الحاله دي مع ان ده اصلا اسمه ضحك علي الدقوون

بالنسبه لتغيير وزاره الصحه والسكان والله ولا اعرف ياخويا معني كده اني هترحم من الكشف علي العيال والستات الحوامل بدعوي انهم تبع السكاان؟ يارييت والنبي


انت رغااي اووي وانا نازل علشاان ورايا شغل عاوز ارجع الاقيك فرييش كده اشته؟

غير معرف يقول...

محمد

يبقى شوف مصلحتك يا محمد علشان والدك وعلشان متزعلوش :)

ومتشغلش نفسك بأي شيء أو أي حاجة غير دراستك حاليا :)

ومتدخلش نت أو جمعيات حاليا :)


لحد ما تنجح وتفرحه..:)

Unknown يقول...

أحييك وبشدة على هذا الذوق الرفيع المتمثل فى العسيلى ....ولكنى أختلف معك .. العسيلى ما بيغنيش فى أوضة لوحده... العسيلى ساب البيت كله وراح قعد فى الجنينة.....
" واتارى الدنيا مش حلوة كلها .. مش زى الافلام اللى هوة بيحب يخشها "

راااائع....
دمت بود

الشارده يقول...

مش انت الى فاشل
للاسف كل حاجه حوالينا هى الى فاشله وللاسف ده الى عايزين يوصلونا للايمان بيه

العسيلى امم هو بصراحه مطرب محدود الصوت بس بالنسبه ليا واحد محدود الصوت زيه وبيغنى صح وكلام راقى احسن من واحد صوته حلو زى حبيب هارتى تامر حسنى وبيقول كلام مش عايزه اغلط فيه بالوصف
انا عموما مش بقتنع بكلام الحب الى من محمد منير بس لان الحب عنده غير اى حب تانى واقعى وموجود

خايف اوعدك موفيش

اما بالنسبه للتعديل الوزارى فانت عارف ان العقبه الوحيده الى كانت واقفه زى الزلطه فى طريق التنميه هى فصل وزراة الصحه عن السكان فلازم طبعا تفقع زغروده وتقول اهو ده التغيير والا فلا

وعلى فكره فى سبب خامس انت مذكرتوش فى اسباب الوزير المخلوع هو ان رئيس وزارتنا كان لسه فاضل له واحد من شلته المهندسين معينوش فقال لازم افضيله مكان وهو ع الاقل المكان ده بالذات محتاج مهندس بس المصيبه لو طلع مهندس كمبيوتر هع هع هع

Here i'm يقول...

الفكرة يا دوكى مبقتش فى الطموح .. فاكر كتاب how to sell anything to anybody اللى أشتريته معاك من معرض الكتاب .. جو جيرارد بدء الكتاب بأن والده كان بيقوله فاشل و كان دايما بيضربه " الحمد لله :D " و كان بيسكر و بيربطه فى السرير " الحمد لله :D " و كان هوا اللى بيصرف على البيت "برضه الحمد لله :D " لدرجة أنه بقى عايز يثبت لوالده أنه فعلا فاشل علشان يبطل يقوله فاشل ..



العسيلى حاجة واحدة بتشدنى فيه .. بيغنى نوعية الواحد محتاجلها .. تخيل بتغمض عينك و تسمع ملك مدينة ولا الفستان الأبيض ولا بيتى و مطرحتى .. بتلاقيك عايش حلم جميل قوى مع فارسة أحلامك .. و يطلع واحد غلس يقولك بعد أذنك يا باشا ممكن أولع .. و تبقى عايز تفقعه قفا و أنت بتقوله أنا مش بدخن يا بقف :D


الستات الحوامل :D .. شكلك ياض دكتور سيس :D .. متظبطنى معاك :D


هوا انت على طول كده يا أما نازل و مستعجل يا أما عايز تنام :D

Here i'm يقول...

إيمان ..

و الله يا إيمان ربنا يعلم أنا طفل مطيع :D

و بعدين ربنا يعلم أن طاعتى لأبويا و أمى هيا اللى ممشيانى و حرسانى ..

بس الديفو الوحيد اللى مع بابا هوا الكلية .. متتصوريش دى الحاجة الوحيدة اللى بتزعل بابا منى ..

يالا ربنا يكرم

Here i'm يقول...

جدع حتى النهاية ..

الحمد لله لاقيت واحد بيفكر زيى فى موضوع العسيلى :D

ايه يا عمنا أخيرا لاقيت حد بيحب الواد دا :D

Here i'm يقول...

الشاردة ..

تصدقى بالله و الله انا بقول كده .. الفشل فى مجتمع متوقف على شهادة جامعية و بعد كده يكشى تأنتخ فى بيتكوا جنب شيشتك علشان القهوة غلت .. بس لازم أتعامل معاه .. مفيش حل غير كده


زى ما أنتى قولتى .. مش عارف لسه كنت بتكلم مع مين .. بيقولى بس دا أخنف .. قولتله مطرب أخنف و بيغنى أغانى محترمة و شيك أحسن من واحد صوته جامد و مربى دقنه و رافع شعره و فاتح زرار قميصه و بكرا يفتح زرار البنطلون :D


منير دا حدوته لوحده .. معاكى بضحك بصوت عالى .. مش محتاج أتوب حبك مش ذنوب .. أحبك تبتدى الحكايات تاخدنى ضحكتك بالذات .. تعبنى روح و قلب و ذات تسبنى كشف للمستور .. أحبك تستكين الريح فى قلبى و الأغانى تزيد .. بحبك و أعشق التصريح ..


ماجا بيقولى الحمد لله الريس وصل للمشكلة اللى فى البلد و شل وزير الرى .. :D

Yasmine يقول...

فكرتنى بعيد الام دا..بقالى يومين قاعدة فى الشغل بحاول اعرف هجيب منين فلوس لكل دول :D
مش فاهمة بجد كانت فكرة مين العبقرية دى :@

العسيلى لما سمعتله مجنونة قلت دا واحد طاقق رسمى و نهايته هتكون شبه نهاية ريكو كدا :D
بعدين اختى سمعتنى الفستان الابيض و فضلت الاغنية دى معلقة معايا لحد دلوقتى
بعدها سمعت حاضر و ملك مدينة و تبات و نبات و فضلوا الاربعة دول هم اكتر اغانى بحبها للعسيلى لحد اخر شريط و ولد رسام اللى كل ما ازهق اسمعها و الغريبة ان كل مرة بفضل مبتسمة من اولها لاخرها كانها اول مرة اسمعها
و زى ما انتى دى تانى اغنية عجبانى فى الشريط و بعيدا عن ان الكلام كان ممكن يكون احسن من كده شوية لكن الفكرة نفسها عجبانى جدا..واحد بيحب واحدة مش عشان هى الاجمل ولا الاحلى ولا احسن طباخة و شغالة..بيحبها عشان هى هى بكل عيوبها..مش واحد عايز يفصل بدلة على مقاسه مع ان هو اساسا ما يجيش جلابية مقطعة للى هيتجوزها..تستر يوم و تكسف عشرة

بس سبحان الله واحد معايا فى الشغل بيقول نفس كلامك حتى الاغنيتين بتوع بريان ادامز دول تحديدا كان بيقولى انهم فيهم شبه من اغانى العسيلى..
هو انتوا كنتوا قاعدين مع بعض ولا حاجة :D

انت مستغرب ليه من الفيديو ما دى حاجة معروفة..هو الغريب بالنسبالى انهم سابوه يظهر..عادة الحاجات دى بتبقى مطبوخة كويس

الخبر دا موتنى من الضحك بجد البلد دى بقت كوميدية جدا..عمرى ما شفت بلد بتحترم نفسها يكون فيها وزارة اسمها وزارة الاسرة..
و اكيد المشكلة فى وزير الرى طبعا..خصوصا ان الوزير الجديد هيحط الفلاح فى عينه
على اساس ان الفلاحين بس اللى عندهم مشاكل فى البلد دى
و الاهم ان الوزير بيوعد بتحسين علاقات التعاون مع اثيوبيا..طول عمرى اقول ان العلاقات الاثيوبية المصرية هى اللى هترفع البلد دى فوق فوق فوق يعنى :D
احسن تعليق على الخطوة العظيمة دى تعليق جلال عامر فى المصرى اليوم انهاردة..ان الناس قرفوا من وزير المالية فالريس غيرلهم وزير الموارد المائية.. بس مش كان شال وزير الزراعة ابرك :D

dalia يقول...

السلام عليكم

ازيك يا محمد ؟ اتمنى ان تكون أحسن الفاشلين اللى في العالم ، والله فجأتني مش مصدقة بهذا العنوان يعني لما يبقى واحد من صناع الحياه فاشل يبقى تركت ايه لينا لا ، انت فاشل فاشل يعني بتقولها عادي كده ، بيقولوا في دورات البرمجة العصبية ان الانسان لو وصف نفسه بالفشل حيصبح فاشل ، قول ورايا انت مش فاشل وخايب انت ناجح
وبعدين ان بتدخل ليه في التعديلات الوزارية انت مش عارف ان ده قرار جمهورى يعني انت بتشك في قدرات القيادة السياسيةولا ايه مبقاش كمان غير الفاشلين يعقبوا على قرارات الرئيس
ههههه
تحياتي

Here i'm يقول...

أنا حرة ..

و لما انتى معكيش فلوس و مش لاقية تاكلى واجعة دماغى ليه :D .. لا دا أنا بقى من ساعة ما أشتغلت و طالع عين مامتى فى الهدايا .. ماما و طنط خالتو و طنط مرات خالو و طنط مرات خالو التانى و طنط أخت بابا و طنط تانية أخت بابا ... تيجى نسرق Club aldo :D


أنا لما شوفت مجنونة قولت دا عيل فاكس و مرة كنت راكب تاكسى و مشغلها لاقيته بيقول فيها و سلملى على الخلود و الـ 7000 سنة على ما أعتقد .. عجبتنى قوى الجملة دى :D

لا أسمعى من الشريط اللى فات .. متسبنيش .. مين أنا .. حكايتى معاك .. حمد لله ع السلامة .. الشريط كله بصراحة اللى قبل دا من اكتر الشرايط اللى معلقة معايا مع شريط وائل الكافورى بيحن و شريط مروان الخورى اللى قبل دا ...

اه صحيح و من اول شريط أسمعى .. أدى الحب و أدى بدايته ..

زميلك دا راجل بيفهم و الله .. على الله ميطلعش فاكس :D


انا مش متخيل أنسان يظلم انسان و يركبه حبل المشنقة و علشان أيه . علشان يغطى على خيبته مش حتى رشوة ولا فلوس .. ربنا يرحمنا برحمته


التغيير الوزراى فى محله جدا .. كانت مشكلتنا وزير الرى او الدماء الجديدة كانت محتاجة وزير الرى فقط :D .. لا وزير الزراعة دا حكايته حكاية .. و بعدين ما انتى عارفة أيه اللى مسكتنى عنه :D

Here i'm يقول...

داليا ..

أزيك ياداليا .. فينك مش باينة .. و الله الفكرة ان الواحد فعلا شايف انه معملش حاجة .. معملش حاجة بمقاييس مجتمعنا و مجالنا .. يالا الحمد لله ..

بالعكس بقى .. هما الفاشلين بس اللى ليهم راى فى موضوع التغيير دا .. الطيور على أشكالها تقع :D .. أطلعى منها أنتى يا ناجحة :D

Fatma يقول...

ممممم

ان الناس تقول عليك فاشل وتبقى انت من جواك حاسس نفسك مش كدا وتعافر لحد ما توصل ويتضح في الاخر انك مش فاشل دا شيئ عظيم

على الاقل احسن بكتيييييير من انك تعيش طول عمرك الناس كلها بتقول عليك ناجح جدا وانت من جواك عارف كويس اوي انك فاشل لاقصى حد وماحدش عارف حاجة

عسيلي بيعصبني :) مطرب ازاي يا محمد بس صوته ماشافش ريحة الطرب لا من بعيد ولا من قريب

هو بس ذكي وبيعرف يختار كلمات حلوة وجديدة ودا ماسموش مطرب
الغنا صوت وامكانيات وموسيقى وكلمات
ما ينفعش نختصرهم في كلام وبس
يبقى نقرا شعر احسن
بس دا ما يمنعش ان الاغاني بتاعتو لطيفة :)

اللي اعرفه ان وزير الري السابق راجل محترم بس سنه كبر وصحته تعبانة زالراجل يعني مش محتاج الوزارة ووجع الدماغ في حاجة هيقرفوه يبقى بالسلامة
اظن ان هو فعلا اللي طلب الاستقالة

اما عن مشيرة خطاب ووزارة الاسرة والسكان انا مؤمنة جدا بالست دي جدا جدا ومقتنعة تماما انها هتعمل فرق كبير

Here i'm يقول...

فنون ..

على رأيك .. فعلا أحسن أن الواحد ينجح بعد ما الناس كلها تقول عليه فاشل بدل ما يتقال عليه ناجح و هوا أساسا أفشل الفاشلين ... ربنا يكرم


العسيلى هوا اللى بيكتب كل كلمات اغانيه .. بالنسبة للصوت فزى ما قولت أحسن بكتير ما أسمع صوت رائع و هوا بيقول وحياة امى ما انا سيبك .. الواد بالنسبالى صوته مقبول و انا على فكرة سمعته لايف فى حفلة .. صوته مش نشاذ يعنى :D ...


وزير الرى بنفسه قال انه أتفاجأ علشان هوا بكامل صحته و بعدين سليمان جوده قال ان اللى قبليه مات و هوا فى الوزارة :) .. و فى أخبار دلوقتى بتقول أن مبارك هوا اللى أقترح علشان فشل فى جمع توقيعات دول حوض النيل لمدة 5 مرات و كانت اخر مرة فى شرم الشيخ .. بس اللى عجبنى ان الوزير الجديد أمر أن الوزير السابق هوا اللى يرأس بعثة مصر فى مؤتمر المياه القادم ..

mUsLiM يقول...

ربنا يحميك من الفشل يا كبارى

ويهدينا واياك الى الصراط المستقيم

وثق يا أخى أن الفشل الحقيقى هو فشل الآخره لا الدنيا

قال صلى الله عليه وسلم " كن فى الدنيا كأنك غريب أو كعابر سبيل " أى بل كعابر سبيل

لأن الغريب قد يستوطن ، أما عابر السبيل فلا

ولكن لا يعنى ذلك الإستسلام فى الدنيا وعدم السعى

لا عليك بالسعى ، وانت ولله الحمد عندك شعلة النشاط والحافز الجيد

ولكن عليك بدعاء الله أن يتحوز التوفيق

فالتوفيق مع الطموح والنشاط يعنى النجاح بلا شــك ،،

المهم التوفيق من الله ، وهذا لا يتأتى إلا بطاعته جل وعلا ،،

أما عن العسيلى

فانا بحب العسلية بس مش اوى بصراحه

بس ساعات باكلها برده :))

ووزير الرى معرفوش ولا اعرف مين هوا ولا سمعت عنه قبل كده :))

ومش هافتى فى حاجه معرفش فيها

السلام عليكم

Here i'm يقول...

مصعبينو :D

الأيموشن دا :D يعنى انا مبسوط و بضحك :D

و بعدين لا ليك فى العسيلى ولا بتحب العسلية قوى و متعرفش مين وزير الرى :D

عرفت دماغك :D بيقولوا هيفا حتتجوز و نانسى حامل :D ... مرضى يا عمنا ناسك اللى بتحبهم اهم :D

ربنا يكرم يا مصعب .. أدعيلى بالله عليك يا عمنا .. و ان شاء الله خير و الله

la tormenta يقول...

قاعدة أقرى الردود و تذكرت موضوعك في ايجي فيلم شلون بتتوقع رد كل واحد ..:D
أنا صرت أقرى أي موضوع و أقول فلان راح يقول كذا و فلان راح يقول كذا
و بس قريت هالموضوع قمت أتوقع رد كل واحد :D
انت طبعا متوقع شنو راح اقول..:D

لا بس بجدية بقولك شي :
انت عندك بروفايل شخص غير مصري
عرفت شلون؟
يعني هالمشاركة في الحياة العامة و الفكرة عن النجاح والشهادة و الخ
شي بعيد شوية عن اللي هدفهم في الحياة الشقة و العروسة و الأمور هاذي
بس انا والله دايما أقول انك راح تسوي شي كبير فحياتك لأنه عندك المؤهلات النفسية و تركيبة الشخصية لكن محتاج تحتك بالأشخاص اللي مثلك.. المحبطين و اليائسين واللي ماعندهم طموح و اللي هم فاشلين بحق مالك علاقة فيهم ..مو جوك يعني..بس يأخرونك
الله بيوفق أي واحد مجتهد و عنده اصرار:)

بالنسبةللعسيلي ماحبه صوته مزعج بالنسبة لي
وباقي نقط الموضوع :الوزارات و الوزيرة شأن داخلي ما لي علاقة فيه

بس:)

Superman يقول...

انت مش فاشل..لكن انت مش منظم!

يعني عندك كلية و شغل و جمعية و كورسات و خروجات..
5 حاجات..انت مرتبهم في حياتك غلط!
المفروض الاولوية تبقي للكلية بعدين الشغل..
بعدين الوقت اللي تفضي فيه قسمه بمزاجك..
عايز تروح كورس مكسيكي روح..
عايز تعمل مع عمرو خالد مشروع منع العيال من مرواح الملاهي..إعمل..
عايز تستجدع و تيجي تقعد معايا علي القهوة..يبقي كتر خيرك!

بس طالما انت طالب في كلية تجارة..عيش كطالب في كلية تجارة..


لكن لو شيلنا حوار الجامعة
فإنت مش فاكس..ييجي منك و نانسي عجرم هتغني لك شاطر شاطر..و تطبطب و تدلع فيك كمان! :D

-------

بالنسبة للعسيلي..انا ماسمحتلكش تتكلم عنه اصلآ..المفروض تاخد إذني قبل ما تجيب في سيرة الولد! :D

-------

بالنسبة لوزير الري..معرفش الاسباب..
بس طالما مش قادر يشتغل مع الحكومة زي ما بتقول..فده أفضل له و للحكومة و بالتالي لمصلحة البلد..
بس اللي اعرفه ان وزير الري الجديد برضه من اهم العلماء الموجودين حاليآ..و عامل ماجيستير و دكتوراه في كامبريدج و رئيس قسم هندسة الري في هندسة القاهرة..
و كان واحد من العلماء اللي اشتغلوا مع وزارة الري في الخطة بتاعة ترشيد المياه طويلة الاجل اللي مستمرة لحد 2017..يعني الكلام زي الفل إن شاء الله..
و اتا واثق في انه في المكان المناسب..
لاننا من احسن البلاد اللي فيها علماء ري و الحمدلله..
ربنا يوفقه هو و كل الحكومة

Here i'm يقول...

سوريزا ..

أنا بقيت زيك .. بختبر نفسى و أقعد أضحك بعد كده :D .. و كنت عارف أنتى حتقولى ايه علشان انتى قولتيلى كده قبل كده فى رسالة خاصة :D

ردك و رد سولتو بعديكى فادونى بجد ..
انتى بتقولى انى محتاج اكون جنب الناس اللى ناجحة .. و دى رأيى أوعدك انى حشتغل عليه علشان فعلا لاقيت نفسى محتاج كده و كنت بتكلم فى الموضوع دا امبارح مع نفسى :D


أنا بحب العسيلى الحقيقة طبيعة اغانيه بتشدنى و بحب استيله فى الغناء اللى بيفكرنى ببراين ادامز ... أزواق :D

شكرا على كلامك الجميل دا يا سوريزا .. ربنا يخيلكى يارب و يوفقك :)

Here i'm يقول...

سولتو بيه ..

تصدق انت ممكن تكون بتتكلم صح .. بس عارف انا احب اولوياتى تكون انى شغال الاول و بعدين الكلية تيجى مع الكورسات و بعدين فى الرتبة التالتة العمل التطوعى .. ربنا يكرم و أحاول انسف البتاعة دى اللى اسمها كلية :D


مش عايز أستظراف فى البلوج و تقعد تقولى مكسيكى و هندى و الكلام الفاكس دا ..

و الله وحشانى افندينا ما أنت عارف انا طالع عينى و الله دا من اليوم المحظوظ فيه اللى بدخل نت الساعة 5 العصر .. و سلملى على وائل حامى حمى قهوة افندينا :D


بالنسبة لوزير الرى مش حرد عليك كلامك محسسنى أننا فى سويسرا :D