أجــــــــــازة ..

أجمل تى شيرت بلعب بيه باسكيت .. هو تى شيرت Y.M.C.A
أو زى ما بنقول عليه عندنا .. نادى الـ Y
للى ميعرفش النادى دا .. دا نادى جمعية الشبان المسيحيين ..
الجمعية دى .. كنت بروح الحضانة فيها لما كنا قاعدين فى الشاطبى .. و كانت ماما بتشتغل
فى الجمعية دى .. لاعبت باسكيت لمدة سنة
كانت من أجمل سنين عمرى اللى لاعبت فيها باسكيت كانت فى النادى دا ..
كان الملعب فى الدور الأول علوى :D .. و كنا بنلعب و حوالينا العماير .. و مفيش فراغ خالص
و حمام السباحة بتاع النادى .. كان فى الدور التانى :D .. و كان أغرب حمام سباحة شوفته فى حياتى لغاية دلوقتى
كانت أيام جميلة .. اللى فكرنى بيها و انا معدى أول أمبارح و انا راجع من الكورس ..
لاقيت شرطة و بوليس كتير قوى .. أتفجعت .. الحتة دى من أشهر الحتت اللى فى العالم اللى فيها تجانس و تعايش

فى الحتة دى .. شارع كبير قوى متداد لمسجد القائد إبراهيم ..
فى الحتة دى .. بنصلى خلف الشيخ حاتم فى رمضان الـ 30 يوم ..
فى الحتة دى .. فيها نادى الشبان المسيحيين .. و قدام فى جمعية الشابات المسيحيات
فى الحتة دى .. بيصلى أكتر من 20 ألف مصلى فى شهر رمضان
فى الحتة .. فى أعياد المسيحيين .. بتبقى مكنوزة مسيحيين
فى الحتة دى .. فى جمعية الشبان المسلمين .. اللى بيبعد بينهم أقل من محطة

اتضايقت قوى لما شوفت الشرطة و البوليس .. و اللى زاد مضايقتى لما شوفت مسلميين متجمعين قدام الجمعية
و الكل موجه بصره ليها .. و البوليس نازل .. و كام ظابط صغير .. و كام بنت محجبة

سبحان الله .. الموضوع فى الاخر طلع بسيط .. كانت حفلة لأغانى سيد درويش
و كانت حفلة كبيرة بيشارك فيها فرق من اسكندرية ..

تنفست الصعداء و حمدت ربنا ..

بلاش الحتة دى بالذات .. و بلاش أسكندرية تانى

::..::..::..::..::..::..::..::..::


حان الأن .. موعد الاجازة النص سنوية لجانبى و لجناب القراء ..
لكى اتمكن من أكمال قصة كفاحى مع كلية التجارة جامعة الأسكندرية
قصة كفاحى التى تجاوزت قصة كفاح شعب مصر على مر العصور ..
تلك الكلية التى مازلت أبحث فيها عن مرتشى .. نعم مرتشى ..
لكى أرشيه و أنجح و اخلص .. بس للأسف لا يوجد مرتشيين :D
وأيضاً لكى تستريحوا منى و من كتاباتى السخيفة :D ..

إلى الجهـــــــــــــــــــاد ..