علشان لما تسافر متضربش على قفاك

بما ان الواحد بيبقى رايح جاى سفر و مواصلات بين المحافظات

فكرت أكتب بوست عن خلاصة تجربتى الفظة و عمقها مع السفر و اهل المحافظات الاخر

و بما انى مواطن سكندرى أقطن أجمل محافظات العالمـ ( وش بيطلع لسانه )

فخيالكـ الخصب و سرعة بديهتكـ حتقودك لأن المسافر سكندرى و المحافظة الاخرى القاهرة



1 - أول موقف .. يالا اللى رايح القاهرة

ليكـ 3 أحتمالات :

1 - لو راكب ميكروباص عامـ و عارف أنت نازل فين بالظبط ..

نصيحة حاول أنكـ تنامـ او تبعد عن أى محادثة مع اللى جنبكـ ..

علشان النهاية معروفة مسبقاً .. دى بلد بنت كلب .. شوف الطوابير و القرف



2 - لو راكب ميكروباص عامـ و مش عارف المكان اللى حتنزل فيه ..

هنا بقى لازمـ و حتماً تصاحب الراجل اللى جنبكـ اللى حتسأله عن المكان

و يا سلامـ لو تبدأ الكونفرزيشن بالكلامـ عن احوال البلد و الجو و يا حبذا لو شتمت فى البلد

فى رأيى .. أن 90 % من المصريين بتشتمـ فى البلد .. و بالتالى ألعب على الحصان الكسبان

و المصرى كمان يحب الأصدقاء الجدد دايما .. حتصاحبه حيوصلكـ لبيتكـ

و يا سلامـ بقى لو طلبت غباء معاه و عايز يشرب سيجارة ..

هنا لازمـ تقف معاه و تفهمه أن السيجارة مهمة جدا .. بتزود عمر الأنسان 7 ساعات

و متنساش أوعى تسأل السواق .. لأنك هنا قدامكـ أحتمالين :

ياأما ينسى سعادتكـ .. يا أما حيبقى عايز يقلبكـ علشان يخلص من قرفكـ



3 - أنكـ تركب قطار .. و هنا الفرصة حتبقى أحسن لو مش عارف المكان

حضرتكـ هنا لازمـ تعمل أستفتاء عامـ على المكان المطلوب ..

يبقى حتسأل اللى قاعد جنبك ..

و تقومـ تقف شويه تعمل نفسكـ كأنكـ بتشرب سيجارة بين العربيات ..

و تسأل اللى عمال ينفخ فى الدخان قدامكـ ..

و تاخد بعضكـ و تطلع على البوفيه .. دايما عربية رقمـ 4

و فى البوفيه .. ستجد هناكـ ما يسركـ .. لو سألت عن ميدان عرابى حتلاقى 100 ألف سامى البارودى

و لو سألت عن ميدان سعد زغلول .. حتلاقى 100 ألف صفية أخته

و لو سألت عن شارع الضيف أحمد .. حتلاقى سمير غانمـ و جورج سيدهمـ


القاعدة رقمـ 1 .. أبعد عن متعملش ثورجى ولا مناضل




2 - تانى موقف .. أركب مترو ولا أركب ميكروباص ولا تاكسى ولا أمشيها

هنا أنت محتاج تسأل عن المكان أو المواصلة اللى حتوصلكـ هناكـ

و بالتالى .. مش عارف و فى نفس الوقت محتار ..

خلى بالكـ .. اوعى تسأل حد لابس عمة ولا قفطان .. دا حتلاقيه زيكـ و أكتر كمان

و لو سألته المصيبة انه حيقولكـ على المكان بالتفصيل الممل ولا كانه بيوصف غيطهمـ

و كمان متنساش .. اوعى تسأل سواق تاكسى حتركب معاه .. و اوعى تسأل منادى عربيات

علشان ببساطة .. الواد المنادى عايز يملى العربية و خلاص ..

و شوف أنت بقى لما تدخل على المنادى و تقوله .. بدى أعرف وين العتبة :D

حيقولكـ العربية دى رايحة الجيزة .. و قبل ما حيقولكـ أركب حتلاقيه بيخطفكـ من قميصكـ

القميص ولا الظابط و الونش .. غريب قوى انت

و اوعى تسأل بياع ورد ولا مناديل .. دا تسأله بس عن الأشارات

شايف فى عينكـ تسأل رخمـ .. يعنى أسأل مين يا عمـ الفكيكـ ؟؟

تاخد بعضكـ و تسأل الراجل السايس أو المنادى .. لو عايز أروح فين أركب منين

حيقولكـ ببساطة أركب المترو .. او اتمشى لغاية موقف الميكروباص

القاعدة رقمـ 2 .. أوعى تسأل الواد الرخمـ اللى فى الكشكـ اللى قدامـ محطة قطار رمسيس ..

طيب جرب كده و شوف حيعاملكـ أزاى :D




3 - تالت موقف .. قدامكـ 3 أحتمالات ..

لو ركبت ميكروباص ..

أوعى تركب مع واحد قالكـ أنا حنزل على أول الشارع و انت تمشيها

علشان ببساطة لا حتلاقى أول الشارع و لو لاقيته حتمشى 2481201324 ساعة

و بالتالى قوله لا أنا عايز انزل عنده بالظبط .. لو قالكـ مفيش حد بيروح هناكـ

قوله شكرا .. و روح شوف ميكروباص تانى ..

من الاخر القاعدة رقم 3 .. مفيش حتة فى القاهرة مبيدخلهاش الميكروباص



لو ركبت تاكسى ..

أوعى تفهمـ السواق أنكـ سايح أو انكـ مش من القرف دا أو أنكـ مش من هنا

لازمـ تقنعه انكـ قاهراوى أبن قاهرية متجوزة قاهرى من أيامـ زمن جروبى

و علشان تقنعه بكده .. أبعد عن السخافات اللى بنقولها من نوعية

دا مشوارى كل يومـ .. دا انا كل يومـ هنا

خيلكـ واعى زى العبد لله .. و اول ما تركب تلقى السلامـ و تقول

يااااااااا .. الجو النهاردة حر قوى عن أمبارح

لو قالكـ اه فعلا .. قول فى بالكـ YES

لو قالكـ الجو أمبارح كان احلى من النهاردة .. قوله يمكن علشان انا امبارح منزلتش الصبح

و تانى حاجة حتقولها .. بس ليه اللفة دى .. مدخلتش ليه من الشارع التانى ( من غير ما تسمى الشارع )

دى بقى من غير كلامـ ... حيقولكـ أصل الأشارة التانية دى ساعة

و الطريق دا أسرع و أسهل .. مش انت برضه نازل عند عمر أفندى ؟؟

قوله .. اه اه الله ينور

حان وقت العراكـ و تقطيع الهدومـ .. لو طلب منكـ 30 جنيه .. أديله 10 بس

لو طلب 300 أديله 100 جنيه بس .. خلى بالكـ الـ 1/3 بس

القاعدة رقم 4 .. سواقين التوكسى نصابين بنسبة 2/3 :D



لو ركبت رجلكـ ..

اوعى تسأل حد غير بتاع السوبر ماركت .. و أستنضف

سوبر ماركت كبير عنده ديلفرى .. علشان الواد المفعوص دا هوا اللى حيوصلكـ

عند عمارة رقمـ 10 مدخل 2 بلوكـ 11 الدور الاول علوى

و ممكن كمان يطلع عارف الراجل اللى أنت رايحله

القاعدة رقمـ 5 .. أوعى متديش يا صاحب الحاجة اللى جاية فى الديلفرى بقشيش للواد المفعوص

علشان ببساطة سيرتكـ حيصحبها البخل و القرف لما انا أسأل عليكـ :D

و تخيل بقى لو أنا عريس بنتكـ .. او أبو عروستكـ و جاى أسال عليكـ :D


4 - رابع موقف .. أخيرا وصلت .. عشمـ أبليس

أوعى تكون فاكر أن الميكروباص اللى صاحبه مستعجل الدور اللى بعد الدور

أو سواق التاكسى اللى أنت اتعركت معاه و قالكـ يا ظالمـ يا مفترى

حيوصلوكـ لمكانكـ .. أنسى يا عمرو

هنا لازمـ ترجع للخطوة اللى فاتت و تدور على الواد المفعوص بتاع الديلفرى

القاعدة رقمـ 6 .. فى كلا الحالات حتبقى ظالمـ و مفترى .. متعملش زيى

و تفكر هوا انا كده فعلا مفترى .. علشان أنا بطلت أفكر خلاص



5 - خامس موقف .. أنكـ ترجع كما كنت ..

أوعى ترجع و تستخدمـ طريق غير الطريق اللى جيت فيه

حتى لو كان حيكلفكـ ساعة زمن او 10 جنيه زيادة ..

القاعدة رقمـ 7 .. الطرق المختصرة أصعب من الطريق اللى اتعودت انت عليه


6 - سادس موقف .. موقف القاهرة أسكندرية .. محطة رمسيس

أوعى تصاحب حد و انت مروح .. علشان حيطلع من الـ 4 دول

واحد كان زيكـ و عايز يصاحبكـ علشان توصله فى أسكندرية :D

يا أما واحد راجع من انترفيو و بيدور على شغل و قال يمكن يكون وجد ضالته فيكـ

يا أما واحد من بتوع الـ Sales و عايز تشترى خط تليفون او الفانوس السحرى

يا اما بنت فاكسانة من بتوع .. أنا أبويا قائد طابية

القاعدة رقمـ 8 .. مش كل الناس وحشة .. بس أيش يضمنى أن اللى حيطلع فى قرعتى شمعة بيضة منورة :D

القاعدة رقمـ 9 .. مفيش أحلى من بلدكـ و مفيش أحلى من أسكندرية

و نتمنى لكمـ سفراً هادئاً بعيداً عن سخافات هذا البوست :D