الأربعاء، 23 سبتمبر، 2009

معادلات ..


عادل إمامـ ..
أكبر معادى للاخوان المسلمين .. بنته أتجوزت حفيد مرشد الأخوان السابق !!

أحمد شوبير ..
حارس مرمى الاهلى فى التسعينات و المدافع الدائمـ عن حقوقه ..
بنته أتجوزت زملكاوى !!

محمد قبارى ..
أكبر منتقض لدولة قطر .. من الطبيعى جدا أنه يشتغل فى قطر !!
و ممكن جدا بنته تتجوز قطرى !!


::..::..::..::..::

صبر + صبر + صبر + صبر = حلين لا يجتمعان
1 - نجاح مبهر
2 - سخط و يأس و فتح باب أخر من أبواب الصبر
ترى من يفوز ؟؟

::..::..::..::..::



كل شارع أسمه .. النصر .. الثورة .. جمال عبد الناصر .. صلاح سالمـ
لازمـ يكون زجمة و قرف و بهدلة و عماراته معفنة

و كل شارع أسمه .. فؤاد .. الملك فاروق .. ناريمان
لازمـ يكون هادى و العمارات باين فيها تراث مصر

::..::..::..::..::

من قال أعرف و أعلمـ و أنا أحسن من فعل ذلكـ .. تأكد أنكـ لن تستفاد منه بشىء
ليس لكونه محتال ..
بل لكونه عندما عرف و علمـ و فعل أحسن مالديه ..
فشل فى إيصال معلومة أن أحسن ما لدي .. هو أحسن شىء موجود على الأرض
و ذلكـ بسبب محدودية أمكانياته .. و علو طموحاتكـ

::..::..::..::..::

بما أن كل مسطول يهلوث من التعاطى
و كل مصرى عاقل يهلوث من غلبه و حبه لمصر
أذن .. كل مصرى مسطول من غلبه و حبه لمصر
مسطول بنوع حشيش جديد
أسمه .. مصرنجو ..

::..::..::..::..::

لما تلاقى شعب بيستورد من شعب أخر شركة علشان تشيله زبالته
متستغربش لما تلاقى نفس الشعب واقف زعلان أنك نضفتله شارعه
بحجة .. أرمى الزبالة فين انا دلوقتى ؟؟ .. و بعدين ما دا مكان الزبالة ؟؟
أرجع بالزبالة البيت تانى يعنى ؟؟ .. يييييي لسه حروح عند الصندوق ارمى الزبالة ؟؟

على فكرة .. حدث بالفعل ..

::..::..::..::..::



12 التعليقات:

El - Shandwely يقول...

النقطة المتعلقة بيك انت ودولة قطر هلكتنى من الضحك ... ولو حصل فعلا دانا هقود ضدك حملة .. دانت ياما سخنتنى لما كنت بشوف ردودك فى ايجى ^_^

واحييك على الجزئية الخاصة بأسامى الشوارع .. احم احم , على فكرة الشارع اللى ساكن فيه اسمه صلاح سالم .. ولو احكيلك على الاساطير اللى اتحكتلى من جدى عن سبب واحداث وتداعيات تسمية الشارع بالاسم ده ..هتعرف ليه كل الشوارع اللى بالمفاتيح اللى انت ذكرتها كلها بالوصف ده .

dr.lecter يقول...

وايه يعني مانت متعرفش مصلحتك فين

مش يمكن قطر تتغير علي ايدك ولا انت اللي تتغير علي ايدها؟.

عادل امام زواج معرفش هل كان باوامر من القياده السياسيه ؟ بيتهيالي لا طبعا

علشان بس تعرفوا الاثوره المزعومه عملت لكم ايه جابت قرف وتخلف وبس

مصر بنجو لازم يبقي رخيص التمن ومتوافر في يد الجميع ومايجيش حد يعمل عليه احتكار فاكر نكته السادات بتاعه الحشيش اللي كانت علي الموبايل؟

ســـــاره يقول...

وليه لاء
مش يمكن يكونلك خير في قطر
وتلاقي رزقك ويكونلك شأن بإذنه تعالى
هناك وتتغير نظرتك عن الدولة وعن حاكمها :)

........................

صبر + صبر + صبر + صبر = فرج بإذن الله :)

انا حرة يقول...

اول واحدة دى ممكن تسميها نضج..مش عيب ان الواحد يغير رايه من فترة للتانية ما دام مصلحته بتقول كدا..و ما دام مش بيخالف مبادئه يبقى ليه لا
و على فكرة انا احترمت عادل امام جدا ساعتها لانه ما خلاش كرامته و منظره و شكله و برستيجه يمنعوا بنته من انها تتجوز اللى بتحبه..انا اعرف وزير عمل نفس الحركة مع انه من عيلة ليبرالية جدا :D

صبر+صبر+صبر = انفجار فى الدنيا و انفراج فى الاخرة :)

انا كان نفسي اعيش فى زمن الملكية ما هو استبداد مع نضافة ارحم من استبداد مع زبالة..بس انا فاكرة ان الموضوع اللى كنت عملاه عن مصر زمان ما كانش عاجب ناس :D
يعنى دلوقتى لو لقيت مواصلة لسنة حاجة و اربعين ايام الاوتوموبيل و عثمانة ما كنتش هتروح بزمتك؟

من قال أعرف و أعلمـ و أنا أحسن من فعل ذلكـ..اعرف انه كذاب..اللى بيعمل ما بيقولش عملت!


مصرنجو دا ما بقاش جايب نتيجة معايا اليومين دول انا متفقة مع نظرية احمد بتاعت مفيش فايدة :D

و خصوصا بعد ما شفت منظر الزبالة فى شوارع المهندسين و الناس مستخسرة حتى تجيب صناديق تلم زبالتها..العيب ما بقاش فى النظام بس على فكرة..ألعيب بقى فى اللى بتشتم فى النظام الصبح و تروح تاكل البطيخة و تنام..احنا ما عندناش ثقافة الايجابية فى الحاجات الصغيرة لما هتبقى عندنا فى الكبيرة..دا انا بقولهم فى الشغل لو رتنبا الورقهيسهل علينا كتير..قالولى و مين قال اننا هنعرف نرتبه و اننا لو رتبناه ماحدش هيبوظه و لو ماحدش هيبوظه مين قال اننا هنكمل فى المكان دا عشان نتعب نفسنا فيه و هنكمل ماحنا ممكن نكمل و هو مش مترتب يبقى ليه نتعب نفسنا من الاول..حسيت انى بتفرج على المناقشة العقيمة بتاعت قانون الاحتكار فى مجلس الشعب..بلا وكسة

Jannah يقول...

وعندها فقط يصبح لقب بوفهد ساري المفعول
:P
لا فعلا يعني وين المشكلة انك تشتغل فقطر..مهما كانت مواقفك منهابس
عندهم قيادة عندها توجه و سياسة معينة هم أحرار

عادي ..
ولا انت عنصري؟:p



كل سنة و انت طيب
:)
من زمان ما كتبت انت مواضيع بهالمستوى
ها!!كان عندك اجتفاف؟:P

mUsLiM يقول...

الهى وانت جاهى يا كبارى يا ابن ام كبارى تشتغل فى قطر وتعيش فى قطر وتتزوج قطرية وتخلف ولاد قطريين وتعيش حياة واااااايد قطرية

ههههههههههه

السلام عليكم

Here i'm يقول...

الشندويلى ..

أضحك أضحك .. بس بلاش جو الحملات و نظام الجروبات :D
أو ممكن تعملى جروب جمع تبرعات علشان مسافرش لقطر :D


الثورة دى اوحش حاجة فى تاريخ مصر ..

منور البلوج كله يا عم الشندويلى ..

Here i'm يقول...

دوكى ..

لا يا عمنا مش فاكر النكتة .. قولهالى وحياة أبوك :D

دى مش ثورة دى انقلاب .. زى انقلابات اوغندا و ليبريا .. بس ربنا رحم مصر

مصرنجو .. أكيد حيحتكره حمادة أبن عزو .. و يتوزع مع شنط رمضان من الحزب :D

معنديش مانع انى أشتغل فى قطر على فكرة .. بس الواحد بيشوف اللى ممكن يحصل

Here i'm يقول...

سارة ..

ممكن لأاقى رزقى و ألاقى كل حاجة حلوة هناك .. بس تتغير نظرتى عن أبن عاق لأبوه .. على ما أعتقد أستحالة :)

اهو الواحد مستنى الانفراج :)

Here i'm يقول...

انتى مش حرة ..

انا ضد نظرية البديهيات و المسلمات الكتير اللى بتخلى الفكر جامد و رخم .. بس أهو الواحد بيفكر .. و بعدين مين الوزير دا :D


صبر+صبر+صبر = انفجار فى الدنيا و انفراج فى الاخرة :) .. مينفعش دلع فى الدنيا و انفراج فى الاخرة ؟؟ :D


انا فاكر البوست دا .. على فكرة الفكرة دى اتغيرت عندى .. مستعد أرحل لعام 30 كمان بس مكنش حسب الله مساعد أول ريا و سكينة .. ما انتى عارف المنحوس المنحوس و لو علقوا فى ديله فانوس :D


المشكلة انه كلام و لسان ع الفاضى :D


انا بقول لأحمد شكلى كده أنا اللى حسافر و انت اللى حتتوحل فيها :D


بقولك بكنسله شارعه .. مستغرب .. دا انا افتكرت و الله العظيم الراجل سأل واحد معانا قاله انت ساكن هنا علشان تتكلم :D

Here i'm يقول...

جنة ..

كبارى بوفهد .. ربك يستر :D

هما احرار .. بس أفررضى لسانى هرشنى و فتحته على واحد قطرى و انا لسانى مبيسكتش .. و رد عليا قالى لما هيا مش عجباك جاى ليه :D .. أقوله ايه :D


كان عندى أجتفاف .. هوا أجتفاف ولا جفاف يا حاجة :D

Here i'm يقول...

مصعبينو ..

و انت تتجوز علمانية منقبة :D

اللى هما من نوعية حتنقب علشان اتجوز :D

و أديله بقى على التوجهات فى تربية العيال و تعملنا كتاب أسمه

" بين السلفية و العلمانية .. فى التوجهات التربوية "

او كتاب " أنا و زوجتى العلمانية فى شرح السلفية "