السبت، 21 نوفمبر، 2009

يجازيك يا عم عبد الناصر ..








الليل مليّل
والألم عاصر
لسه اللي بيبيع أمته كسبان
وكل يوم
أطلع أنا الخاسر
الله يجازيك يا عم عبد الناصر
أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين وسواقين
وخدامين.. وطباخين
بلاد أسافرها سعيد
ارجع حزين
حبيتها زي ما قلت لي.. واكتر
ع الأجنبي ما استكترتش عليا تستكتر
ع الاجنبى متزنترتش عليا تتزنتر
ع الأجنبي ما اتنقورتْش عليا تتنقور
تطمع في دمعي
وف تعاسة راتبي.
مُلهم أنا.. واعمل غبي
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..
لابسني توب العار
ساكن في وطني بالإيجار