الثلاثاء، 27 أبريل 2010

25 مارس .. معاً للأحتفال بعيد ميلادى






قمة السخافة أنك تلاقى ناس صوتها عالى و خلاص
ناس مش فاهمة .. يا موجة انتى فين و احنا وراكى
ناس مصرة انها تحول قضاينا لبلاتوهات سينمائية و شخصية
ناس كل اللى بتدور عليه أنها تكون بؤرة الحدث و ياترى قالوا أسمى ولا لأ
هى قناة أيه اللى كانت بتصور و حتتذاع امتى
و نظام العيال بتوع الثانوى لما البنت الحلوة تعدى " يا حلوة شوفينى "

فاكر زمان لما كنا فى الثانوى و الكلية لما كنا بنتظاهر علشان فلسطين
كنا فى قمة الخوف .. كنا نطلع نجرى و ندخل شارع و نستخبى فى عمارات
و الدنيا تهدى شويه و بعدين نقوم مجمعين بعضينا تانى
مش وحش انى أقول انى كنت خايف .. بس مكتش مستهتر


6 أبريل اعتصام و أضراب .. عمال غزل المحلة
2 مايو أضراب و أعتصام .. الحد الادنى للأجور
4 مايو أضراب . عيد ميلاد الريس
4 اغسطس اعتصام .. المياه المعدنية فى مارينا
25 مارس 2011 .. أضراب عيد ميلادى

معلومات حتفيدكـ جدا لو أنت مش فاهم الوضع ..

أنكـ لو كنت موظف فى الدولة أو فى القطاع الحكومى .. فالمرتب الأساسى فى زيادة
بعد قرار فى 2007 بأرتفاع المرتب الأساسى بنسب ثابتة

الحد الادنى للاجور المطلوب .. سيوفر على الحكومة 10 مليار جنيه مصرى
هو ما تتكلفه الدولة تجاه الدعم .. لأن رفع الحد الأدنى للأجور للموظفين الحكوميين لن يجبر القطاع الخاص برفع الحد الادنى داخل شركاته مما سيؤدى غلى فجوة رهيبة فى أرتفاع الأسعار مع ثبات مرتبات ما يقرب من 50 % من الايدى العاملة المصرية

الحد الادنى للاجور .. يعنى رغيف العيش بـ 25 قرش بدلا من 5 قروش
سعر البنزين بالأسعار العالمية ..
بمناسبة البنزين قال لى سائق تركى أنهم يتابعون يوميا أسعار البنزين العالمية فى الاخبار المسائية
لمعرفة ما أذا كانوا يوفرون بسبب ارتفاع الاسعار غدا أو لا !!!
سعر انبوبة البوتاجاز .. من 40 إلى 70 جنيه حسب المنطقة
إلغاء البطاقات التموينيه .. و انا شاهد على أهمية وجودها و الحفاظ عليها بما انتمى إلى من تربى على سلع التموين
أرتفاع جنونى فى الأسعار بدون حد أقصى
تحويل كل أسعار السلع إلى الأسعار العالمية و الجشع الرأسمالى الخارجى مع عدم وجود وعى للمستهلك المصرى
( السلعة دى بكام فى السوق الخارجى .. و امتى أشترى و امتى أقاطع )


القصة بدأت يبقى فيها ملل .. كل 5 أيام أعتصام و أضراب
كلنا كنا مع أضراب 6 أبريل .. قولنا دا البداية .. بس النهاية حتبقى ملل
لا حينتصروا للعمال و العمال أبعد ما يكون عنهم .. ولا حيجمعوا الناس حولهم ..

يا عينى عليكى يا مصر ..

- - - - - - -


الأيامـ دى بتواكب ذكرى تحرير سيناء بعد حرب دبلوماسية ناجحة
أعقبت حرب حربية ناجحة بجميع المقاييس
فى الأيام دى نجحت الدبلوماسية المصرية و المرافعات المصرية و العقول المصرية
فى تدعيم المكسب الحربى .. و أنتصرنا بالتحكيم الدولى فى الصراع المصرى الأسرائيلى

مفيش اجمل من انك تنتمى لبلد لا تغيب الشمس عنها 30 يوما حتى تحتفل باحدى انجازاتها او ذكرياتها الماضية
فخور بانى انتمى لهذه البلد التى تملك أجندة تاريخية يصعب نسيانها او محوها او تكرارها

و صعبان عليا بأن مستقبل البلد دى يكون فى أيد شباب كل مشكلتهم ..
الصورة عايزها حلوة .. ها طلعت فى التلفزيون .. المناضل راح المناضل جاه






11 التعليقات:

dr.lecter يقول...

اولا حمد لله علي السلامه رحت تركيا وجيت

طيب ياعم ابوس دماغك حد يرجع من تركيا؟ ده انا بعشق البلد دي عشق الابل

ثانيا موضوع الاعتصام
مين قال ان فيه ناس رايحه علشان الصوره تطلع حلوه
انت عارف كل اللي هيبقوا هناك هيبقوا موظفين اطباء عمال كل اللي شغالين في الحكومه وانا واحد منهم انا مش رايح علشان اقول تحيا مصر واشتم الحكومه
انا رايح وقفه سلميه اقول فيها مطالبي مع زملاء كتير شايفين ان وضعنا كاطباء عاملين في الحكومه لا يوفر لنا عيشه كريمه ولا يتناسب مع وضعنا الاجتماعي بتاتا

انا لما رحت يوم 6 ابريل كنت رايح لاني كنت اهبل وفاكر ان فيه ناس كتيره هتلبي الدعوه وهتيجي وتساند العيال دول وللاسف مع اول قلم واول عصايه نزلت علي العيال من امن الدوله المولد انفض والناس خافت وحصل هيصه علي مافيش

اضراب 2 مايو لو فعلا نجح وعمل زي اللي انت بتقول عليه انه علي كل حاجه والاسعار بقت في الليمون طيب وبعدين؟ يعني لا كده نافع ولا كده نافع

نعمل ايه؟ قولي انت

نخلينا عايشين عيشه ميته نظام اليوم بيومه وعمرك مهتعرف تعمل حاجه لنفسك ولا لعيالك؟

انا اللي خانقني حاجه واحده في الحوار ده هو ان اغلب اللي هيروحوا ناس اشتراكيه وهيروجوا بقي للهبل بتاع الستينات وانا لا عايز لا اشتراكي ولا راسمالي عايز حل عايز اتقدم خطوه

انت ياعم دارس اقتصاد وبتفهم اكتر مني شوف لي حل؟ شوف للبلد حل يااخي

معلش طولت عليك بس امانه عليك ياراججل اوعي ماتضربش يوم عيد ميلاد الريس علشان انا اصلا بصومه كل سنه هههههههههههه

mUsLiM يقول...

الحقيقة إنك كنت قاسى فى حكمك على شباب 6 أبريل أو غيرهم من الشباب اللى ساهم فى الحراك السياسي الموجود حاليا فى مصر

أكيد فى ناس فعلا عاوزه تعمل شو جميل وتثبت حضورها زى برده ما أكيد فى ناس بتحب مصر وبتعمل كده علشان مصلحة البلد

فالأحكام المطلقة ظالمة فى كل الأحوال

أما مسألة الحد الأدنى للأجور فده شئ مش جديد أبداً على أي بلد فى العالم بل ده حق دستوري من حقوق المواطن المسلم وجب تفعيله على حد قول محكمة القضاء الإداري

ليه إحنا كل ما نيجى نطالب بحاجه كويسة نشوه صورتها بنفسنا

ليه منعملش حد أدنى للأجور من غير ما يتم رفع الدعم ؟!!

وليه منعملش حد أدنى للأجور وفى نفس الوقت نضبط الأسعار ؟!!

بس فى الحقيقة أنا عندى سؤال

هل محكمة القضاء الإداري فعلاً قضت بإلزام الحكومة بوضع حد أدنى للأجور ولا هيا فقط اعتبرته حق دستوري ودعت الحكومة لتفعليه ؟!

لأن تفرق كتير الحقيقة، فياريت حد يجيبلى منطوق الحكم بالظبط

وحمد الله عالسلامة يا كبارى يا عين أعيان اسكنجرية

انت رحت تركيا يا كبير ولا ايه :))

السلام عليكم

ســـــاره يقول...

ياااه اخيرا ظهرت
كل سنة وانت طيب يامحمد
الله يديك طولة العمر يارب

اخبار تركيا ايه D:
زرت البسفور والمسجد وفي مكان عالجبل ناسيه اسمه بس شعبي وفي كمان السوق بتاعهم اللي شبه الخان ده غير بيقولوا الأكل بتاعهم تحفه ..يابختك والله

بالنسبة للأسعار على سبيل المثال البنزين هنا في السعودية رخيص جدااا بس في كندا انت عارف كان بيطلع وبينزل ساعات نفوّل بـ 45 دولار وساعات توصل لـ 70 دولار احسبها بقى وشوف بندفع بنزين كام في الأسبوع او الشهر

بالنسبة للإعتصامات والكلام ده انا قلت رأيي فيها من الأول بس المشكلة دلوقتي مش في دي على قد ماهي في الأسلوب يعني دخلت كذا مرة الفترة اللي فاتت مدونة وحده والله استغربت بجد ازاي بنات المفروض انها بنات ناس محترمه على مدوناتهم بيستخدموا الفاظ مايستخدمهاش الا واحد مرتبي في الشارع يعني هي دي حرية التعبير عن الرأي اللي عايزنها .. الحرية = قلة الأدب !!! شئ مؤسف وخصوصا لما الألفاظ دي تطلع من بنت

قوللي بقى مش ناوي ترجع المنتدى ؟

dr.lecter يقول...

لو انت قصدك علي نواره نجم فهي اصلا ده طبعها ياساره مالهاش دعوه بقله الادب وكده

يعني تلقائيتها وغصب عنها تخليها تقول ده وياستي هو ده وقته نتكلم عن قله الادب هو غلط فعلا وماينفعش نقول عايزين تغيير واحنا اصلا لازم نغير نفسنا من الاول

مش عارف بقي انا كده كده رايح علشان بطالب بحقي ولا هاشتم ولا هضرب ولا هعمل حاجات وحشه عايز بس حد يعبرنا

ســـــاره يقول...

انا ماحبتش اذكر بقصد مين بالظبط بس طالما قلت الإسم فأيوة يامحمد انا قصدي عليها
ماينفعش وحده تعيب عالحكومة وهي مش شايفه نفسها بتتكلم ازاي ؟

كنت بشارك في مدونتها زيها زي اي مدونة تانية بس لما لقيت ان الأسلوب بينحدر بعدت نفسي تماما ودخلتها من كام يوم اشوف ايه المواضيع لقيت ان الأسلوب من سئ لأسوأ .. زي مدونة قطة الصحراء بالظبط مع فرق ان التانية في الضياع بجد الأولى بتطالب بحق والتانية مش عارفه هي عايزة ايه اصلا!!!

في كلمات تطلع من شباب اقول معلش بقى شاب وبيقعد في الشارع كتير انما تطلع من بنت عييييييب عييييب بجد بدل ماتكون البنت رقيقه ومهذبة في الفاظها تتكلم كده؟
طبيعي جدااا استنكرها

يامحمد انا اتربيت على ان البنت لازم تحاسب على كل كلمة بتقولها قدام الناس لأن نظرة الناس للبنت مهمه اوووي

انا مش من حقي اقولها كده في مدونتها ولا من حقي اكلمها شخصيا عالأسلوب هي حرة .. لأن اقل حاجه هتقولها دي مدونتي لو عاجبك او مش عاجبك بس طالما كتبت بالأسلوب ده قدام الكل يبقى من حق اي حد ينتقد او يأيد ..

بس لما يبقى اسلوب اللي بيطالب بالتغيير كده يبقى تأكد انه عمر ماهيكون في تغيير

Fatma يقول...

طب ما تقرا الحكم وتفهم ابعاد الموضوع الاول لان كلامك كله غلط !
ابسط غلطة ان الحكم ملزم للقطاع الخاص وقطاع الاعمال وغير ملزم اصلا للقطاع الحكومي !يعني القطاع الحكومي برا الموضوع اساسا
ايه رأيك بقى

اقرا الحكم وتفاصيل الموضوع يا قباري قبل ما تنتقد
و2 مايو غير 6ابريل خالص
2 مايو ناس معاها حكم وبتطالب الدولة بتنفيذه يعني في حق وفي ورقة بتثبت الحق دا !

mUsLiM يقول...

فى حاجه انا كتبتها على سبيل الغلط فى ردى اللى فات معلش

انا قلت ان الحد الأدنى للأجور حق من حقوق المواطن المسلم

انا كنت أقصد المواطن المصري مش قصدى المسلمين بس طبعاً

حبيت بس اصحح المعلومة لأنها بشكلها المكتوب ضادمة الحقيقة

السلام عليكم

Here i'm يقول...

لاكتر بيه ..

أسف على التاخير يا برنس .. لسه فاكرك امبارح و انا بتفج على التنين الاحمر الجزء التالت من دكتور لاكتر .. يا تنين انت يا جامد :D

يا عم أديك شوفت اللى كان أسمه أعتصام 200 أو 400 واحد على ما اعتقد كلهم صحافيين و مصورين .. و بيقولك أشتراكية قال .. عايزيين يرجعوا بينا تانى لأيام الملك عبد الناصر .. دى ناس لازم تحاسب بتهمة الباء السياسى يا دوكى و الله

Here i'm يقول...

مصعبينو ..

ايوا يا كبير .. كنت فى تركيا .. رحلة شغل و الله .. مش فسحة يا جدعاااااان :D

لا مقصدتش 6 بريل خالص على فكرة .. اللى عاملين الاعتصام د مكنوش 6 أبريل .. دول شويه أشتراكيين ..

انا قولت بس التاريخ بتاع 6 أبريل .. و قصدت انى أشير فى الاول بيه .. كلنا كنا مع 6 أبريل فى اول مرة .. بعد كده كل واحد يلم 10 يعمل جماعة .. أشى أشراكية أشى نرجسية أشى فنزويلية ..

بالنسبة للحكم .. انا دورت عليه بس مفهمتش أذا كان حق دستورى ولا ألزام .. مفهمش انا فى الطب :D

Here i'm يقول...

سارة ..

اه زرت البسفور و المساجد كلها و المتحف اللى فيه سيف الرسول و الصحابة و تكسيم و الامونونو .. و روحت انقرة و روحت طبعا السفارة المصرية .. لا لفيت لفة حلوة :D

هما بقى مش عارفين ان المطالب اللى عايزينها دى حتعمل السعر عندنا زى كندا كل يوم بحال ..


مين اللى قال انهم المفروض يكونوا محترمين .. دول حتى مدعيين ثقافة و نضال يابنتى .. المثال اللى انتى جبتيه دا للأسف ميتقلش عنه غير قلة ادب

شكلى حرجع فى وعدى يا سارة .. موجا هوا السبب على فكرة :D

Here i'm يقول...

فنون ..

تصدقى و تؤمنى بالله .. انا موافق تجيبى النشرة او الفقرة بتاعة انها ملزمة للقطاع الخاص و انشرهالك فى بوست لوحده ..

الحكم عمره ما حيلزم القطاع الخاص و لو فرضنا .. مينفعش أصلا ..

و بعدين بتوع 6 ابريل دول السبب فى وجود بتوع 2 مايو .. و بعدين ما الاعتصام خلص و كل واحد عرف قيمته وسط الشعب .. 200 او 300 واحد جايين ياخدوا حق الشعب اغلبهم صحفيين و توك شو ..