السبت، 28 يونيو 2008

عندما يتقمس تامر حسنى شخصية فيفى عبده !!!


عارفين مسلسلات الحاجة فيفى عبده ...

عارفين لما تكون فيفى عبده فى مشهد و الناس و هيا بتكلمها تقعد تشكر فيها ..

و بعدين المشهد التانى يكون بين أتنين تانين خالص

و يقعدوا يشكروا فى جدعنة و رجولة فيفى هانمـ ..

هوا دا بالظبط فيلمـ " كابتن هيمـــا "

قصة سخيفة .. رخمة .. خنيقة

واحد رجل أعمال بيحب بنت .. البنت دى بتحب السواق ..

رجل الأعمال يقومـ قاتل ممثلة و يدبس فيها تيمو ..

و يقومـ فاككله فرامل الأتوبيس .. و يبدأ فيلمـ Speed

و يقومـ خاطف أخته فى الأخر ..

طيب أنا كان ليا أقتراح ... ما كان قتله و خلصنا بقى

و كان يلبسها لحد بيشتغل عنده و السلامـ ..

و طبعا لبس لراجل الأعمال دا لقب عضو مجلس الشعب

و متنساش بقى تكلمنى عن العيش و الدفاع عن المواطنين و الطبقات

اللى قايمـ بالفيلمـ ... كاريزما تامر ..

و حبة كوميديا من نوعية " عمــر و سلمـى "


منه لله اللى كان السبب ..




11 التعليقات:

Yasmine يقول...

يعنى دونا عن كل الافلام اللى طلعت علينا فجأة دى ملقيتش غير فيلم تيمو ملك الجيل؟
كنت متوقع ايه حضرتك بعد الاغنية الراقية اللى قرفينا بيها طول النهار
انا ما صدقتش لما شوفتها ان القرف ممكن يوصل لكده
كويس اوى انها جت على قد فيفى عبده:D

Here i'm يقول...

ما هوا مكنتش أنا السبب

كل اللى حصل أن واحد صاحبنا دخله الأربع و جاه قلنا دا تحفة دا جامد دا .. دا ...

الواد دا أنتيمنا التالت .. قلنا و ماله أهو الخميس و ويك أند و ندخل الفيلم

و عينك ما تشوف ألا النور :D


و الله أنا كنت عامل حسابى مدخلوش فيلم حتى عمر و سلمى قلت أنى مش حدخله

أهو زيادة تأكيد :D

الشارده يقول...

ايه ده يا كوبرى انت بتغلط فى تامر حستى ليه كده تقهر بنات مصر يا شيخ حرام عليك
ملحوظه : انا مش من بنات مصر دول

Here i'm يقول...

يا شيخة الحمد لله أغلب البنات اللى أعرفهم مش من بنات مصر :D

دى تبقى مصيبة :D

Fatma يقول...

هموووووووت يا كوبري هموت

طيب انتو ممدوح خدعكو

انا بقة انتو حذرتوني وبردو ما اتعظتش

حتة فيلم كلب بجد

انا بس عندي استفسار صغنن وحياة ابوك يا شيخ

انا موافقة انه يضربه ويخطف اخته ويدبسه في قتل ووووو

بس طيب مش كان يعرفه هوا بيعمل فيه كدا ليه

اقصد يعني اول مرة لما ضربه كان يقوله مثلا ماتقربش جنب حبيبتي تاني يا كلب

ويقوم تيمو يتحداه

فيحصل صراع

الكارثة ان تيمو بيلبس كل مصيبة والتانية وهو مش عارف اصلا في ايه

ورجل الاعمال عمال يفطس في تيمو من غير مايقوله ابعد عنها اساسا

يا لطيف ع الامخاخ

انا اللي استاهل والله

الفيلم منتهى استجداء المشاعر والمأسويات المفتعلة اكتر من اللازم زي ما يكون بيقول للجمهور والنبي لتعيطوا ..سايق عليكو النبي عيطوا

بلاش قرف يا شيخ دا حاجة نيلة

Here i'm يقول...

لا لا نسيتى أهم حاجة

حوار الصفقة و المناقصة اللى عايز يوصلك بيها أنه شغال فى مجال الصحة

و لا بقى الشبشب اللى لاقوه .. ما هوا لازم يظهر الشبشب علشان البرنس يدبس

و لا بقى أنه طول الفيلم مقلهاش بحبك .. طيب الزبون أزاى عرف أن البنت بتاعته بتحب السواق .. و كان الموضوع كله مجرد رحلة يعنى

بجد فيلم فاكس جدا جدا :D

و ممدوح خلاص ...أنا و أحمد بطلنا ناخد رأيه فى حاجة .. و أهو بالمرة مسافر شرم و يريحنا شويه :D

Mohammed يقول...

اقول ايه بس انا مش بحب انتقضه عشان مزعلش اللي بيحبوه والله
تامر ظاهرة بجد مش حلوة خالص (عشان الالفاظ)

يعني مثلا تامر صاحب اشهر طريقة معفنة بتتعاكس بيها البنات دلوقتي اللي هي بتاعة فيلم عمر وسلمي (هو ده)
اكدي انتو فاههمني ومع حركات الايد كمان
وصاحب ملحمة انا مش عارف اتغير اللي خليت الشباب في قمة السلبية وبيعملو كل ما بدالهم وحاطين في ودنهم انا مش عارف اتغير (ومفيش مخلوق مبيغلطش دا شئ محال)

وربنا يستر الظاهرة الجديدة
0عليكي ماشية الله يخليكي براحة عليا)

ربنا يخليلنا تامر

اه صح يا محمد في الشات ؟؟

Here i'm يقول...

عارف يا محمد ..

من ساعة مع سمعت أغنية أنا مش عارف أتغير و أنا بقول هيا حلوة و كل حاجة بس تأثيرها سلبى طول الأغنية مش عارف و الناس كلها بتغلط و فى الأخر خالص بيقول فى كلمتين حتغير

الشات مريح شويه :DD

nA3'oUm HaNeM يقول...

:dلو هيتدفع لي فلوس يا كوبري مش ادفع مش هدخل فيلم للكارثه تشامر ح وستي
ده دخل يغني غلط اصلا :@
و السبب لنصر محروس افندي و السبكي

Here i'm يقول...

جامدة تشامر حوستى دى يا نغوم

أنتى محسسانى أنك فى شبرا مش فى اليونيتد أستيتس :D

و بعدين من سبكى لمحروس يا قلبى لا تحزن :D

nA3'oUm HaNeM يقول...

و انت فاكر تشامر حوستي دي تاليفي :D
ربنا يخلي لنا عم حسين المرعب مش حارمني من اي حاجه معلمني كل حاجه :D:D
في مره قالي جمله و انا من غبائي الامريكاني قمت قايلاها البت الي شافتها قالت لي اوعي تقوليها تاني :D
الناس هتفتكر انك من البطنيه مش متربيه في امريكا
طبعا انا ما اعرفش فين البطنيه دي بس عادي :D:D
ما علينا يا كوبري يا اخويا
انا تامر افندي مش بطيقه خالص من ايام حبيبي و انت بعيد
ممكن اطيق سعد الصغير الي بيرقص احسن مني و لا اطيق تامر ده :@