الثلاثاء، 29 يوليو 2008

i love this game ... basketball



أجمل لعبة شوفتها فى حياتى .. لعبة نزيهة قوى ..

لعبة مفيهاش شتيمة بالأمـ و الأب .. و مفهاش تعصب



كانت أجمل أيامـ حياتى لما كنت بروح أتدرب أو ألعب باسكيت

كنت فى الثانوى .. ألغى الدرس الخصوصى علشان الماتش :D

كنت أدخل المدرسة معايا الكورة و أقعد فى الملعب ألعب طول اليومـ

كان طبعا تحت نظر مدرس الألعاب .. اللى كان بيشيلى الغياب :D

كنا نروح نلاعب المدارس التانية و نكسبها .. و نلعب على مستوى أسكندرية كلها



زى الأيامـ دى كان بيدأ معسكر الأعداد للموسمـ الجديد ..

اه كان فاكس بس كان ممتع و الله :D

شهر 7 .. كان شهر الجيمـ و الياقة البدنية ..

شهر 8 .. كان شهر الخطط و اللعب بالكرة ..

شهر 9 .. كان الدورى ..

فى أخر 10 ... الدورات الرمضانية ..




فاكر أول مرة لاعبنا فى صالة مغطاه .. كان عندنا 16 سنة

و مكناش نعرف أن الخط الأحمر اللى على الأرض بتاع الباسكيت

و الخط الأبيض بتاع الطايرة و الأزرق اليد

كنا شغالين على الخط الأبيض .. و كنا طبعا و لا فاهمين حاجة

فاكر الماتش دا أننا أتغلبنا 46 - 10 :D

كنا مستمتعين قوى بالصالة :D




فاكر أنى خلصت فى الباسكيت حوالى 10 نضارات :D

كنت أخلى بالى طول التمرين من النضارة ..

و بعد التمرين ألاقى كورة طايشة من واحد صاحبى فى النضارة و بوووم

و طبعا .. بابا مستنينى فى البيت :DD



فاكر الأصابة فى ركبتى كأنها أمبارح ..

كنا فى ماتش فى دورة رمضانية .. و كنت متعارك مع المدرب علشان مكنش بيلعبنى

المهمـ .. رحت أشتركت مع الفريق التانى .. و أول ماتش كان ضد فريقى

و لعبت ماتش عمرى زى ما بيقولوا .. و فى أخر الماتش

كنت رايح على الباسكيت و معايا الكورة ..

واحد صاحبى الله يمسيه بالخير .. قالى ..

يا قبارى حرامـ عليكـ بقى .. كفاية بقى

و الله العظيمـ سمعت صوت ركبتى :D

الحسد دا ... يالا الحمد لله :D

بعد الماتش .. أخدت جايزة .. روحت بيها لبابا

قالى دا اللى باخده من الباسكيت .. يا أما النضارة يا أما تتصاب :D


كانت أيامـ ..









7 التعليقات:

Yasmine يقول...

اول مرة الاقيك كاتب بوست عن نفسك دى ظاهرة تستحق الدراسة :D
انا اللعبة دى فشلت فيها فشل زريع بجد
عمرى ما طلت البتاعة دى...يخرب بيت القصر و سنينه :D

mony يقول...

جاى ع الجرح ليه بس يا محما

الواحد لما يفتكر اللعبة دى يفتكر اد ايه هو ف معاناة قيصريةlol

بس انت مكنتشس ناصح ف موضوع النضارة ده..كان فيها ايه لو لعبت من غيرها:)

او حتى لبست نضارة بحر عشان تلعب كويس
وميكونش فيه اصابات..وبالتالى ميكونش فيه اصابات من نوع اخر من اللى ف البيت:)

Here i'm يقول...

بنت مصرية ..

تصدقى فعلا أنا حسيت بكده برضه :D

بس أنا و مصر واحد :D

أمشى يا قصيرة :D

Here i'm يقول...

مونى ..

ألعب أزاى من غيرها يا فالحة .. عايزانى ألعب مع الفريق التانى ضد فريقى :D


أنتى عرفتى منين أن كان فى أصابات من نوع أخر فى البيت :D .. عارفة هوا مكنش بيمد أيده .. بس كان أحسنلى يمد أيده بدل ما يقولى كلمتين فى العضل :D


لا أنتى قصيرة و الكلام دا على أيدى :D

mony يقول...

لا تعايرنى ولا اعايرك الهم طايلنى وطايلك...

انا القصر مبهدلنى..واهانة اخر حاجة

وانت ماشاء الله نظرك رايح ف داهية

بلاش نعايروا بعض يا محما

بالنسبة للاصابات اللى نم نوع اخر..كنت جيت ف فترة بتعاطى النوع ده..:) بس خلاص بقى ربنا امر بالستر:)

Here i'm يقول...

اعرف واحدة كانت قصيرة و مبتشوفش ... بس منه لله التقدم الحديث فى الطب :DDD


بلاش نعاير بعض أحسنلك أنتى يا أوزعة :D

mony يقول...

:(

حقتصها منك يوم القيامة يا بعيد

مش مهم اللى كان..المهم الوقتى:)

يا أخص ع العشرة..يا اخص بجد:)