الأربعاء، 13 أغسطس 2008

أحنا و رمضان ..



خصومات تصل إلى 100 % على كافة الملابس الرياضية ..

ملحوظة ..

هذا العرض سارى على الملابس الرياضية فقط ..




سامح : سمعت عن الـ Sale اللى على الأجهزة الكهربائية ..؟؟

علاء : اه .. دا شكله جامد جدا .. دا جاه فى وقته ..

عايز أشترى Mobile غالي قوى بس فى الـ Sale أكيد حيقل طبعا ..!!!!!!





أحنا كده فى رمضـــان ....

رمضـان عرض قائمـ لمدة 30 يومـ للعبادة و للفوز بالجنة

و أحنا بقى بنعمل زى علاء ..

اللى عايز يشترى Mobile و ياخد عليه خصمـ فى وقت Sale الملابس الرياضية !!





رمضــان يبدأ .. أول يومين صلاة و قرأن و تراويح و تظبيط ..



بعد كده ... هيا أنهى قناة بتذيع يسرا و لا أنهى قناة عليها عزو ..

بعد يومين ... دورة مش عارف مين الرمضـانية ..

مواعيدها قبل الفطار .. و بالليل .. و تيجى تكلمـ حد يقولكـ رياضة

ما انت طول السنة قاعد مأنتخ فى البيت .. و بكرش و نايمـ طول اليومـ

خلاص .. رمضان فكركـ بالرياضة و الكورة ..

طبعا ترجع من الشغل على الماتش .. بعد الماتش الفطار ..

بعد الفطار نومـ عميق .. تعبان بقى .. يارب أخد الكاس

بعد النومـ صحيان الساعة 10 بالليل علشان مسلسل طنط يسرا ..

بعد المسلسل السحور .. و نومـ عميق علشان بكرا شغل ..



أعرف واحد ..

بيصلى التراويح أول يومـ علشان ولاد خالته بيبقوا معزومين عنده و هما بيصلوا !!




أعرف واحد كمان ..

مبيفوتش دورة رمضانية .. و لو مش عنده ماتش اليومـ دا .. يحكمـ !!



أعرف واحد كمان ..

لازمـ يحضر حفلة منير يوم 27 رمضان .. حفلة ليلة القدر !!




طيب و العمل ... ؟؟







13 التعليقات:

dr.lecter يقول...

يابني رمضان ده للاسف ناس بتستغله علشان الهلس والمسخره

وناس تانيه علشان تستخبي في عبايه الدين

وناس تانيه علشان تعمله كموضه

انا ناوي علي موضوع تقيلل عن رمضان كنت هاخليك تنزله في المنتدي عندنا بس خلي الجمجمه تعمر بس

Here i'm يقول...

قشطة يا دوكـ ..

نقعد قعدة ماسنجرية ليلية نظبط الكلام ..

و متنساش تفيش الهوامش .. :D

mony يقول...

الواحد بيبقى مخطط انه يعمل كذا حاجة ف الشهر ده تحديدا..
بس برضوه بسأل نفسى اشمعنى احنا بنعملوا عبادات ونواظب عليها ف 30يوم
وبعدها يرجع الحال كما كان عليه
بزعل ع حال المساجد بعد رمضان..بجد
وبالعكس ممكن تلاقى ناس مبتعملش اى عبادة ان امكن انها تصوم نص اليوم بس..وتقول ربنا غفور رحيم

انا بحب الشهر ده اوى..بيحسسنى بآدمية رهيبة..واخر يوم ده بيبقى يوم صعب بالنسبالى..
وبيفرسنى برضوه رؤية مصر للهلال اللى سبحان الله بيجى بدرى عندنا وعند باقى الدول بيصوموا الشهر كامل..
"مش عايزين يتعبوا نفسهم"

اصل الصيام ده حاجة مرهقة اوى:~
بيقولك المهم النية..مصر كلها ماشية بالنية

ربنا يبارك ف رمضان السنة دى

Here i'm يقول...

كلامك كله صح ..

بس على فكرةأحنا الدولة الوحيدة اللى ماشية برؤية الهلال صح فى البلاد العربية و اللى يدل على كده أن كسوف القمر ظهر فى الصين فى منتصف الشهر اللى فات ...

واللى أعترف بالكلام دا السعودية اللى بتعتمد على رؤية الهلال بالعين بس


اللى ميعرفش يقول عدس يا حاجة :D

حياتي كلها لله يقول...

السلام عليكم
جميل أوي الأستعداد للشهر الكريم من قبلها ..حلو إنك تعلي روحانياتك قبله علشان ربنا يكرمك و يباركلك فيه بس بجد الحاجة اللي بتفرسني فيه هي الخيم الرمضانية .......سبحان الله هو رمضان عندهم أه بالظبط معسكر يخيمة فيه و يقعدوا يعيني بعض علي الذنوب و مش بعيد كمان تكون أسعار المغنين بتعلي في رمضان مهو بيجي و الخير معاه بفي و كمان المسلسلات اللي بينزلها كل الممثلين و المش ممثلين في رمضان و ده طبعا لأن نيتهم أنهم يساعدونا علي استثمار وقتنا في الشهر ده و لما يجيبوهم في أي برنامج و يسالوهم عن خططهم في تقضية رمضان يقولوا القعاد في البيت للعبادة و الصلاه يعني أنت تضيعولنا و قتنا وتفضوا وقتكم أنتم للعباده ...........سبحان الله فعلا اللي يعيش ياما يشوف
معلش حطلب منك طلبين
الأول:تنورني في المدونة و تقولي رايك فيها
التاني:تعتذر لموني علشان "اللي ميعرفش يقول عدس يا حاجة "حرام ممكن تكون زعلت.
شكرا علي الموضوع و ربنا يجعله في ميزان حسناتك

Here i'm يقول...

دكتورة سلمى

منورة المدونة كلها :D

متقلقيش مونى صديقة عزيزة و مش بتزعل علشان هيا عارفانى كويس :)

مدونتك جميلة على فكرة .. و عجبنى قوى الجزء اللى فيه الكتب و معجبنيش الصورة بتاعة الحلوى و الحجاب .. دا انتى حتزهقى منى :D

حياتي كلها لله يقول...

شكرا علي تلبيتك دعوتي وزيارتك للمدونةوكويس إن جزء الكتب عجبك ....بس ياريت تكون دخلت أي كتاب منهم ؛وعلي فكرة الدليل إن الصورة عجباك و أنت مش واخد بالك إنك عرفت إنها عن الحجاب مع إني مكتبتش أي حاجة عن كده ..شفت بقي أه الصورة بتتكلم ...منتظرة تعليقاتك

Here i'm يقول...

لا و الله معجبتنيش :D

انا عرفتها علشان واحد صاحبى بعتهالى قبل كده .. و بعدين دا اللى ميعرفش حيعرف أنها علشان الحجاب :Df

mony يقول...

ايوا ها مين بيجيب ف سيرتى...

كويس والله عمالين تتكلموا عليا وانا يا عينى معرفش..

على فكرة يا دكتورة..الانسان ده ممل لابعد الحدود خصوصا لو اخدتى رأيه ف حاجة..صريح صريح يعنى:)
ربنا يسترها معاكى:)

Here i'm يقول...

مش قولتلكـ يا مونى متجيش هنا تانى :D

و بعدين تعرفى انتى ايه عنى علشان تتكلمى عنى كده :D

mony يقول...

اتمسـى:)

leeno يقول...

وحشني اووووووووووي جو رمضان

اللمةفساعة الفطار... صلة الرحم ... صلاة التراويح ... قراءة اقرآن .... السحور


رمضان بكل الراحة النفسية و الطمأنينة و الاحساس بحنان الخالق و كرمه و رحمته وحشني


اللهم بلغنا رمضان و اكتبنا من عتقاء الليلة الاولى

Here i'm يقول...

رمضـــان ..

الكلمة دى أساسا فى راحة رهيبة .. سبحان الله

شهر الخيرات فعلا ..