الاثنين، 8 سبتمبر 2008

ضربه حرة مباشرة










تاااااااااااااكسى .. محطة الرمل


حضرتكـ حتنزل فين فى محطة الرمل ..


أنا حنزل عن جامع القائد إبراهيم على البحر..


بعد نقاش جميل عن الأعداد الرهيبة اللى بتصلى عند الشيخ حاتمـ


و تفسير منى على تفسير منه .. حسيت من كلامه أنه شاب ناضج و فاهمـ


هوا : عارف .. اللى قدام حضرتكـ دا .. خريج هندسة اسكندرية 95 قسم نووى


أنا : يااااااااا .. و أنت بتشتغل بعد الضهر على التاكسى بقى


هوا : لا يا فندمـ .. دى شغلتى الاولى و الاخيرة ..


الراجل هنا مستنى منى أنى أشتمله البلد شتمتين تلاتة من نوعية يلعن و يحرق


أنا : بص أنا يمكن رأيى ميعجبكش و تقول أه ماهو من اللى اتولدوا فى بقهم معلقة دهب


بس اللى اقدر أقلهولكـ .. أنا ممكن أأقدر مهندس أشتغل سواق فى الدراسة أو أشتغل لمدة سنتين بعد التخرج


بس مش قادر اتخيل مهندس من 95 لغاية 2008 شغال سواق تاكسى

أعذرنى أنت مش طموح .. و لو كنت طموح مكنش هنا


الراجل فى ذهول رهيب و حسرة : عارف أنت أول واحد يقولى اللى كان نفسى أسمعه من زمان


انا : أنا أسف و الله .. بس بجد أنا مبعرفش أطبطب خالص


هوا : و الله انت صح .. كل يومـ بدورلى على شويه أعذار و الناس بتساعد


و كل ما يركب معايا حد لازمـ أحكيله قصتى و يطبطبلى شويه



أنا : ربنا يوفقكـ و يعينكـ .. أنا حنزل هنا .. شكرا


مفتكرش كلامى أثر فيه يعنى ..





- - - - - - - - - - -








المصرى اليومـ تنشر نص التسجيلات الهاتفية بين هشام طلعت و السكرى



أنباء عن وجود تسجيلات هاتفية لرجل الأعمال فريد خميس




موبيلى العقيمـ من نوعية الموبيلات اللى مبتسمحش بدخول برامج عليها




سواء كانت ألعاب أو برامج .. كان نفسى اعمل نفسى مهم و أنزل برنامج تسجيل مكلمات




مين عارف .. مش يمكن أكون أنا اللى قتلت سعاد حسنى او انا اللى طلعت السعودية من كاس العالمـ ؟






- - - - - - - - - - - -





















مش عارف .. بجد أنا محتار مع الحكومة دى



حكومة كل يومـ بتصحى الصبح على مصيبة



نفسى أقرا مذكرات أحمد نظيف الحقيقية ... لو كنت مذيع كنت حعمل كل جهدى علشان أستضيفه


نفسى أعمل حوار مع مراته .. عامل أيه معاها .. بيصحى من النومـ أزاى



نفسى اعرف بيستقبل سكرتيرته أزاى .. مين اللى بيوصله الأخبار اللذيذة دى



الأيامـ دى شاغلنى قوى أحمد نظيف و الجانب الأنسانى من حياته



أنا طول عمرى شايفه أحسن رئيس وزراء جاه مصر بعد عاطف صدقى

لسه متخيل لو دا جاه بعد الجنزورى أو عاطف صدقى أن مصر كان زمانها ليها وضع تانى



لسه متأكد أن الحكومة دى عمال تتجوز المشاكل علشان تدارى خيبة و وكسة عاطف عبيد



واثق 100 فى 100 أن كل اللى فينا دا مش من نظيف كل اللى فينا دا من عطوف



بس مينفعش .. الحظ لاعب مهمـ



عاطف عبيد محظوظ لدرجة تخلى الواحد يتجنن ..



نظيف منحوس لدرجة تخلى الواحد يلعن الاتصالات و اللى بيجى منها ..



ماذا كان سيحدث لو حظ عبيد بدلا من نحس نظيف ؟؟!!!!








- - - - - - -















رفضكـ يا زمانى .. يا أوانى .. يا مكانى .. أنا عايز أعيش فى كوكب تانى




فى عالمـ تانى .. فى لسه أمانى .. فيه الإنسان .. لسه إنسان .. عايش من تانى




عالمـ طيار و رياحه قوية .. بتهد كيانى تكسر فيا ..




من غير مواعيد يتاخدنى بعيد عن معنى حياتى .. عن أصلى و ذاتى




و دا مش بأديا .. و دا مش بأديا




مش عارف ليه مسيطرة عليا فوى الأغنية دى الأيامـ دى




مش عارف ليه بحاول كل يومـ أحط نفسى مكان طفل صغير من أطفال الدويقة




كل يومـ بقول أنا لو كنت مكانه كنت حعمل أيه ؟؟




كنت حعمل أيه و أبويا و اأمى ماتوا قدامـ عنيا ؟؟




ناحية اليمين بتقولى كانت حتبقى ليا دفعة قوية أنى أنجح و أعلى و أبقى أغنى أنسان من الوجود




ناحية الشمال بتقولى يعنى منتظر منى أيه .. أكيد صايع و ضايع و حخرب يعنى حخرب




صراع يومى .. دايما بينتهى لصالح اليمين .. علشان المخرج عايزها يمين




بس هل للبطل رأى تانى غير رأى المخرج ؟؟






- - - - - - - - - -



القذافى حلق لكوندليزا و رفض يسلم عليها و هيا جاية مداله أيدها


طيب ما تيجوا نشوف الفيديو و نرجع تانى


لينك الفيديو





رجعنا ..


لا و أيه .. كوندليزا مش جاية لا تهدد و لا جاية تتوعد و لا أى حاجة


و لا جاية تقوله أحترمـ نفسكـ و أقفل الممرات اللى بتهرب سلاح لفلسطين


و لا جاية تقعد مع الحاج أبو مازن و تقول كخة حماس


لا دى جاية ترجع العلاقات .. جاية و فاتحة دراعتها


فيها أيه لو كان حضنها زى الحاج أبو مازن و لا عمنا أبو الغيط


اه يا منطقة مفكيش راجل .. و لما يطلع راجل يبقى القذافى


أسفوخس بجد ..













3 التعليقات:

Yasmine يقول...

عاجبنى اوى البوست ده مش عارفة اشمعنى:D
اولا سواق التاكسي بتاعك ده فكرنى بسواق كان بيشتغل عندعمتى كان معاه ليسانس حقوق و كان بيشتغل فى مكتب محامى لكن فضل السواقة
الفكرة مش فى الطموح على قد ما هى فى الفلوس اللى هتجيله فى الحالتين
شوف المحامين و الدكاترة بياخدوا كام و السواقين و الشغالات فى البيوت بياخدوا كام..فرق شاسع اصلا

الحكومة مش هتكلم عليها تانى انت عارف رأيي فيهم واحد واحد :D
انت شايفها احسن حكومة و انا شايفاها حكومة نحس..و مع انى فى العادى مش متشائمة اوى لكن مع نظيف انا متشائم

سؤالك عن العشوائيات مهم اوى على فكرة
و انا شخصيا لو كنت مكانهم كنت همشى مع الناحية الشمال
البلد دى مافيهاش فرص لخريجين الجامعات و بتوع الشهادات سمعت عن الباحث بتاع ناسا اللى بعتوله عشان يراقب على الامتحانات هنا؟
طموح ايه و تحدى ايه بقى؟ كل سنة و انت طيب

القذافى راجل؟ اللهم انى صايمة :D
تلاقيه بس كان متوضى و مش عايز ينقض وضوه..بلا خيبة ده ام فاروق صاحبة الكشك اللى تحت بيتنا ارجل من اى حاكم عربى

Here i'm يقول...

الفه يا فندم و لا تحبى تاخدى حاجة تانية معاه :D


بصى الكلامـ دا مع المحامى و المحاسب و كده أقولك ماشى .. ما هوا أساسا داخل الكلية عن طريق مكتب التنسيق اللى قاله يا بنى انت حتدخل هنا و ملكش أختيارات .. فكان الرد الطبيعى حاضر يا عمو .. فعادى جدا يروح يشتغل سواق علشان فرق 200 او 400 جنيه .. عادى .. بس دا هندسة نووية .. القسم دا من الهندسة فى جامعة أسكندرية بس .. مش اى حد يدخله لازم يكون جايب تقدير فى سنة أعدادى فى الكلية .. و بعدين واحد داخل هندسة و بعد كده نووى يروح يشتغل سواق تاكسى ... على ما أعتقد مشكلة طموح



بصى انا لسه شايفها أحسن حكومة .. بس مقتنع تماما أن هيا لازم ترحل علشان عتبتها مش حلوة :D ..


اه سمعت عن الراجل دا فعلا .. طيب شوفتى أنتى الجاسوس الأخير اللى أتمسك لما قال كنت فى اسيوط فبقول للظابط انا مهندس نووى راح ضربنى بالقفا


شوفتى أهى طلعت من القذافى .. مش بقولك أسفوخس .. بنت أنتى متكرريش الألفاظ تانى .. انتى لسه صغننة :D

Yasmine يقول...

هههههههه لا انت عارفنى انا لا اشتم و لكنى المح .. و اللبيب بالاشارة يفهم برضه :D