الأحد، 5 أكتوبر، 2008

يوم فى ضيافة عمرو خالد

تحديث



قبل ما أتكلم فى أى حاجة .. أحب أحكى موقف حصل يومـ الوقفة

عمرو خالد جاله شاب عنده 19 سنه معاه أستمارات 1000 متطوع

و وعد أ / عمرو أنه حيجبله 35000 ألف واحد لوحده

كان رد أ/ عمرو أنه لو دا حصل حيمسكه مدير أعماله لمدة عام كامل






عيش و ملح .. دا الأسمـ المبدئى لحمة صناع الحياة الجديدة

الحملة المرة دى بتركز على شقين مهمين .. شق الأقتصاد و شق التعليمـ

زى ما كانت حملة حماية بتركز على شق الصحة ..

حملة عيش و ملح .. تهدف فى المقامـ الأول ..

إلى تأكيد فكرة أن الشباب العربى قادر لو توفرت لديه الأمكانيات أن يغير وجه العالم



الفرق بين الفقير و البائس ؟

الفقير هو القادر على التعاطى مع ما يدور حوله ..

أما البائس هوا الذى يفقد التعامل مع كل من حوله ..


هدف الحملة .. تحويل 7000 أسرة من أسرة بائسة لأسرة ناجحة منتجة

7000 أسرة .. بمعدل حد أدنى 5 متطوعين لكل أسرة




الحكاية ببساطة ..

أكيد فى أسر فى مصــر خرجت أولادها من التعليمـ بسبب الفقر و ضيق ذات اليد

أنا حوصل للأسر دى عن طريق بحوث الحالات ..

حسأل فى المدرسة .. مين المتسرب

حسأل فى منطقتى .. مفيش حد فقير يا أخوانا خرج عياله من المدرسة

حسأل فى العشوائيات .. حسأل عند الميكانيكى .. حسأل فى كل حتة

بعد ما حوصل للأسر المعدومة دى .. حشوف أيه الحاجة اللى تقدر تشتغل فيها الأسرة دى

لو الأب مثلا يجيد الصيد .. أعمله مركب صيد

فى مثال من بنى سويف .. كانت الأم بتجيد الفول و الفلافل .. و تم عمل لها محل فول و فلافل

و هكذا .. طيب فرضا أن الأب أو الأم لا يجيدوا شىء

مش حيبقى عائق قدامى .. ححرك لجنة التدريب و حأطلب منها تدرب الأسرة على أقرب مهنة تجيدها الأسرة

و فى نفس الوقت .. بتتحركـ اللجنة التعليمية مع الواد أو البنت و بتعدها و تدرسلها المناهج التعليمية

و فى نفس الوقت .. بتتحرك لجنة دراسة الجدوى .. لدراسة أسعار السوق و الخامات

و مع كل الخطوات .. بيتم تصوير الحدث .. سواء شراء أو تركيب أو تعليم أو تدريب ..

بحيث تكون فى داتا مجمعة مصورة فى الأخر .. علشان تكون زى كاتلوج للناس بعدى

دى الفكرة ببساطة ..





-*- لو فى مشاكل فى تحميل الورق ياريت تبلغونى ..

التحميل كالأتى .. كليك على اللينك حيفتح صفحة فيها جدول ..

كليك على free فى أخر الجدول تحت ..

و بعدين حتفت صفحة جديدة فيما مستطيل للدونلود فى أعلى الصفحة

لو حد حابب الداتا أبعتهاله ميل .. مفيش مشكلة


بالنسبة للأسئلة ..

بنت مصرية .. مدونة انا حرة

سألت عن البرنامج الزمنى للحملة ..

كل اللى معروف حاليا عن البرنامج الزمنى ..

بيدور فى الأتى ..

حتى 30 / 11 / 2008 .. جمع داتا للمتطوعين و العدد المطلوب 35000


حتى 15 / 12 / 2008 ... جمع داتا للمشاريع للعرض

1 / 1 / 2009 ... الأعلان الرسمى للحملة عن طريق أ / عمرو خالد فى الأعلامـ

31 / 12 / 2009 .. أنتهاء الجزء الأول من الحملة .. لو نجحت حيكون فى تارجت تانى لسنة 2010


بالنسبة للمواعيد ..

الموضوع مش محتاج وقت فراغ كبير يعنى ..

انا مثلا و أعوذ بالله من قول أنا ..

طالب فى الفرقة الرابعة كلية التجارة .. محاسب فى شركة مقاولات

باخد كورسات HR .. و مدير أحدى المشاريع فى الحملة

الموضوع بسيط قوى يا جماعة .. بس عايز اللى يشتغل حيشتغل

فى واحد فى صور الدويقة أسمرانى و لابس شنطة .. الولد دا أنا أعرفه ..

شغال فى كارفور 12 ساعة .. و الله 12 ساعة .. أزاى راح هناك و قعد و ساهمـ ..

أنا فى الفريق بتاعى .. بيكون فى أجتماع أسبوعى ..

كل واحد بيشيل مهمة و بيجى بيها كاملة الأسبوع اللى جاى


معاد أسبوعى معتقدش أنه كبير ..



داليا .. مدونة دقى يا ساعة الجامعة

شكرا على مكالمتكـ الجميلة قوى .. بجد شرفتينى

و حسستينى أن فى أهتمام .. و بالنسبة للسبق .. أنا مش ناسى


و أتمنى أنى أكون رديت على أسئلتكـ فى التحديث دا ..



نورهان .. مدونة مصرية

دكتور لاكتر .. مدونة نوستالجيا

أتمنى أكون عرضت الفكرة صح ..

و أتمنى تكونوا معانا أن شاء الله ..



أنتظروا فى التحديث القادمـ .. مشاريع جنوب الصعيد .. أن شاء الله




- - - - - - -





فى صلاة التهجد ليلة 27 .. جالى تليفون الساعة 2 صباحا

المكالمة كانت بتدور أننا يومـ الأحد الموافق 28 لازمـ نكون فى القاهرة و أن التجمع الساعة 6 صباحا

حاولت أعتذر علشان ظروف شغلى و علشان عرفت انه فطار عادى و مش حتفرق معايا يعنى

بس أتقلى كلمة غريبة قوى " مفيش أعذار .. أنت مدير مشروع ولازمـ تكون موجود "

أنا بصراحة حسيت أن فى حاجة فى الموضوع ... منين فطار عادى و منين مفيش أعذار

المهمـ .. كالعادة كنت الساعة 6 فى محطة سيدى جابر .. ركبنا الأتوبيس .. و وصلنا

المكان كان فى شارع يوسف عباس .. متفرع من شارع صلاح سالمـ .. مدينة نصر

مركز الكشافة العربى .. مكان شيكـ قوى .. كل حاجة فيه حلوة الحقيقة .. قاعة الأجتماعات جميلة و شيك

الأكل كان نضيف .. المكان كله عاجبنى الحقيقة .. فى على الجدران صور الكشافة العربية

نرجع لموضوعنا .. بعد ما وصلنا أتكلمـ مدير صناع الحياة على مستوى الوطن العربى ..

و بلغنا أعتذار أ/ عمرو خالد عن المجىء لظروفه الخاصة .. و قلنا أنه بعتلنا فيديو مخصوص لينا

تعالوا نشوف الفيديو ..



الفيديو للأسف مش كامل .. بس جايب النقط المهمة

المهمـ .. الفيديو كان صاعقة لينا .. الفيديو أدانى دفعة جامدة قوى

فى كلامـ كتير قوى مش فى الفيديو .. يمكن علشان الكلامـ يخصناعلشان كده منزلش

بس أوعدكوا الفيديو التانى يكون عندكوا ..

عمرو خالد بيتكلمـ فى 35 الف متطوع تكون أستمارتهمـ جاهزة فى 30 / 11

عمرو خالد بيقول انا لو عايز أجمعهمـ فى ساعة حجمعهمـ بس أنا عايزكوا انتوا اللى تشتغلوا

عمرو خالد بيقلنا الناس بتقول أن صناع الحياة مش حتنفع من غير عمرو خالد ..

و انا عايز لما أموت تكون صناع الحياة أحسن .. الحتة دى قصرت فيا قوى

كان احساسه فيها عالى قوى ..

معقول فى حد بيبقى عايز اللى يجى بعديه يكمل و يستمر

معقول مفهوم الشعلة و ازاى تكون من أيد لأيد موجود عندنا

عمرو خالد بيكلمنا عن أن الأعلامـ مش حيبقى سند دائمـ لينا ..

علشان الحملة مدتها سنة .. و علشان كده الموضوع عايز رجالة سواء بنات أو ولاد




بعد الفيديو .. مكنش التصفيق بتاع كل مرة

مش دا التصفيق بتاع فيديوهات أو مكالمات عمرو خالد

فى صوت وشوشة غريب فى القاعة .. عمرو خالد بيطلب مننا 35 الف متطوع نهاية نوفمبر .. أزاى ؟

معقول حنعمل حملة مدتها سنة .. معقول حنساعد 7000 اسرة .. معقول حندير 35 الف متطوع


علشان كده لاقيت أجابة مقنعة لوجود مصر كلها فى القاهرة اليومـ دا ..

الموضوع مهمـ قوى .. ايه دا بجد .. حلمـ و حيتحقق




المفاجأة بقى .. شركاء الحملة ..

اليونيسكو ..


اليونيسيف ..


برايس وتر هاوس لأدارة الشركات و المنح


أسلاميكـ ريليف .. منظمة مسلمى أوربا


المركز الثقافى البريطانى


المركز الثقافى الكندى




الدول المشاركة فى الحملة .. على مستوى صناع الحياة

مصــر ..

الجزائر ..

المغرب ..

السودان ..



دا الموضوع مينفعش فيه خسارة .. حياة أو موت ..

ليه كان الموضوع مفاجأة بالنسبالنا .. ؟

فى رأيى أننا كنا حسين أن حملة التسرب من التعليمـ حتفشل ..

و يمكن علشان كان معاد الأعلان عنها فى رمضان و أتأجلت و دا أدانا شعور قوى أنها أتلغت

يمكن علشان المرة دى فى مشاريع و دراسات جدوى و عمالة و شغل شغل مش تطوع و بس

بس كانت مفاجأة رهيبة ..


المهمـ .. بعد ماشوفنا الفيديو .. عرضولنا فكرة المشروع من تانى

و البرنامج الزمنى للمشروع .. و مواعيد الاعلان عن الحملة ..

و بعد كده روحنا فطرنا فى المطعمـ .. و كان الأكل نضيف قوى

و بعد الفطار .. كله بيسلمـ على كله .. كنت واقف مع جروب فى 7 أفراد من 7 محافظات

واحد كان مهندس من أسيوط بس شغله فى أسوان و ماسكـ مشروع فى صناع الحياة أسوان

واحد من البحيرة .. واحد من الشرقية .. بنت من أسوان .. واحد من المنوفية

بنت من القاهرة .. واحد من العريش و دا بقى أنا فاكره قوى علشان حملة حماية

بعد الفطار ..

كان فى الـ Work Shop عن المتطوعين و أسباب ترسبهمـ و عودتهمـ و كيفية التعامل معهمـ

يمكن انا كنت فى أخر مجموعة اللى كانت بتتكلمـ عن

" وضع تصور كامل لحملة جذب متطوعين جدد و كيفية تصميم أستمارة المتطوعين"

و بعد كده أنتهى اليومـ الساعة 10 مساءا



كنت مندهش قوى .. البنات أكتر من الولاد ..

معقول البنات دى حتسافر أسوان و أسيوط و سوهاج الساعة 10 بالليل من القاهرة

ايه اللى يخلى البنات دى تيجى و تشتغل و تسافر و تتعب ؟

انا من أسكندرية و المسافة ساعتين زمن و كنت بتنطط علشان أروح ..

لو انا صحيت 6 صباحا .. البنات دى صحت أمتى ؟

أكيد فى رسالة عايزيين يوصلوها ..

أجمل حاجة فى لقاءات صناع الحياة .. أنكـ بتشوف شباب نضيف صاحب رسالة واحدة

" التنمية "







دى وئاثق اليومـ ..


الورقة الأولى .. التعريف بالحملة

لينكـ التحميل

http://www.MegaShare.com/498885





الورقة التانية .. Work shop عن جذب المتطوعين

لينكـ التحميل

http://www.MegaShare.com/498890






أهمـ ورقة .. الورقة الثالثة .. أستمارة التطوع

لينكـ التحميل

http://www.MegaShare.com/498893



لو حد حابب يشتركـ .. دا إيميلى

Kabbary13@hotmail.com



و دى بقى صور اليومـ ..














-.-.-.-.-.-.-.-.-.-



صناع الحياة فى الدويقة ..

الصور اللى جاية دى ملهاش علاقة بالموضوع ..

بس تعالوا نشوف شباب صناع الحياة عملوا أيه لأهل الدويقة ..





















-.-.-.-.-.-.-.-.-.-.-.-

Life Makers

-.-.-.-.-.-

18 التعليقات:

banouta masreya يقول...

اليونيسف دى كانت عاملة حملة جديدة فى برنامج عن المراهقين على ما افتكر و كنت قدمت فيها بس كانوا عايزين متطوعين عندهم خبرة 3 سنين ما فهمتش ازاى يعنى
المهم ممكن تقولى مركز صناع الحياة فين فى القاهرة؟

dalia يقول...

أنا عايزه اشترك بس اللينكات اللي انت حطتها لا تعطي أي معلومات عن الحملة مش فاهمه منها حاجه ومع ذلك سأرسل لك رساله على الايميل للاشتراك ارجو التوضيح

dr.lecter يقول...

عارف يامحمد انا كل ماقول مافيش فايده واكره البلد دي وازهق منها وتيجي سيره صناع الحياه وعمرو خالد اسكت ومعلقش لاني عارف ان الناس دي اكتر ناس فعلا شغاله في البلد وعاوزه تعمل تغيير واصلاح بدون اي مقابل

انا هاشترك في صناع الحياه بتاعه الشرقيه بس مشكلتهم ان اعدادهم قليله جدا هنا مش زي رساله اللي انا متطوع فيها لاني فعلا عاوز يحصل تغيير واحس اني عملت حاجه مفيده بس الوقت والشغل مشكله بالنسبه لي مش عارف هاقدر اتفرغ للحمله الجديده ولا لا

سببني افكر شويه واستني مني رد

Nourhan Sirag يقول...

ان عاوزه افهم اكتر برضه عشان مازلت مش فاهمه حاجه

واعتبرني من المشتركين بعد مافهم :D

Here i'm يقول...

بنت مصرية ..

جارى الأتصال بصناع حياة القاهرة و مسئوليين المشاريع و حجبلك أرقام تليفوناتهم ..


داليا ..

على ما اعتقد انك حتنفعى الحملة قوى علشان تخصصك فى التعليم .. انا رديت على ميلك و أديتك نمرة موبيلى .. قوليلى بس محافظتك ايه و انا اتصلك بصناع الحياه فى المحافظة



دوكى ...

أنت ابن صناع من زمان ..

و واثق من رأيك :)




نورهان ..
فى فيل مرفوع على اللينك دا فيه كل حاجة عن الحملة ..

http://www.MegaShare.com/498885

بعد ما تدخل اللينك .. اختار free وبعدين حيقولك download و بعدين تفتحه word

الورقة دى فيها كل حاجة عن الحملة .. لو محتاجين حاجة غيرها انا فى الخدمة

لو عايزة نمر حد فى القاهرة قوليلى و تبقى عندك

Here i'm يقول...

بنت مصرية ..

انتى حملتى الورق ولا لأ .. و لو حملتيه فهمتى منه حاجة ولا لأ ..



لو فى مشاكل فى التحميل ممكن أرفع من موقع تانى أو أحطهم هنا على طول .. بس فى الـ word أحسن بكتير


الأستمارات لو أتملت حديكوا ايميل تبعتوا عليه أو أخدها انا منكوا .. زى ما تحبوا :)

banouta masreya يقول...

مبدئيا كده انا عجبانى الفكرة اوى بس فى تفاصيل انا مش فهماها يعنى الحملة سنة و اول جزء عشر اسابيع
دول متقسمين ازاى؟
يعنى الاسبوع ده كل يوم فيه حاجة تتعمل؟
و المواعيد ايه نظامها؟ عشان انا لو هعمل اللى فى دماغى هيبقى عندى الصبح شغل و بالليل دراسة فهحتاج اعرف المواعيد الاول قبل ما اقرر عشان مابقاش بقول كلام و خلاص

Here i'm يقول...

حعمل تحديث و حشرح فكرة الحملة من تانى و كل حاجة أن شاء الله :)

Here i'm يقول...

تم التحديث ..

لو فى اسئلة تانية .. أنا جاهز :)

banouta masreya يقول...

انا معاكم اكيد ان شاء الله..قولى اعمل ايه دلوقتى.. املى البتاع ده و ابعتهولك يعنى ولا ايه؟

Here i'm يقول...

قشطة قوى ..

أول واحدة أهى :)

أملى الأستمارة و أبعتهالى أيميل أو رسالة خاصة فى أيجى .. زى ما تحبى

و انا و الله بوصل لصناع الحياة القاهرة و اللى ماسكين المشاريع علشان أديكوا نمرهم

dalia يقول...

شكرا يا محمد على المعلومات وربنا يوفقك بس من المهم ان يكون هناك لقاء يجمعنا مع صناع حياة في الجيزة زي المؤتمر الصحفي اذ جاز التعبير لتلقي استفسارتنا ، انا بعتلك الاستمارة وادعيلي بقه ربنا يستر علشان ده أول عمل تطوعي لي بعد توقف 8 سنوات شكرا مرة تانية أه لا تنس حكاية السبق

Founoon يقول...

انا بفرح من قلبي

بفرح بجد

ربنا يكرم اي حد ايجابي ويتصرف بقى في السلبيين

عندي موضوع مهم يا كوبري احب اشوف رأيك فيه

ابقى اقراه في المدونة

Founoon يقول...
أزال المؤلف هذا التعليق.
Here i'm يقول...

داليا ..

انا بقى اللى بسألك أيه أخبار السبق :D

Here i'm يقول...

فنووووووون ..

ان شاء الله اللى جاى خير .. انا متأكد

أنا دخلت و عجبنى البوست قوى

الشارده يقول...

للاسف يا محمد كل اما اكلم حد عنها يحسسنى ان احنا عايزين نعمل المستحيل
روحنا النهارده علشان ندى اول ولدين متسربين عرفنا نستقطبهم دروس علشان يحصلو المدرسه وللاسف مجوش
وكل واحد بقى هيطلعلى بكلمه

Here i'm يقول...

الشاردة ..

أنتى أشتركتى فى الحملة مع صناع الزقازيق يعنى ؟؟

فهمينى اكتر .. فرحى قلبى