السبت، 11 أكتوبر، 2008

مع شيخ الأزهر ضد وقاحة الصحافة





اه دى وقاحة مش صحافة ..

أنا ضد شيخ الأزهر قالب و قالباً ..

بس دا ميدنيش الحق أنى ألبسه لبس بابا الفتيكان

واحد حيقولى دلوقتى .. دى حرية صحافة ..

أشمعنى فى أيطاليا بيستهزؤا بابا الفاتيكان

و كفاية جهل و رصة من حقوق النشر و الإنسان و مش بعيد يكون فيها حقوق الحيوان

احب أقولهمـ ..

علشان حقوق الإنسان .. من حق شيخ الأزهر أنه يرفع قضية على عادل حمودة

علشان حقوق النشر .. من حقى كمواطن أنى أساند شيخ الأزهر فى قضيته

و أشمعنى فى أيطاليا الدعارة مهنة .. و أشمعنى فى أيطاليا فى مافيا



عادل حمودة أخطىء لما صور شيخ الأزهر فى لبس بابا الفاتيكان

و اللى يغلط لازمـ يتحاسب .. ولا هوا الدنيا كلها تتحاسب ألا الصحفيين



اللى مش عاجبنى تعامل الصحفيين مع القضية ..

الصحفيين فى القضية دى نوعين ..

صحفى بيسخن فى شيخ الأزهر و سماحته و دماسة أخلاقه و بيختمـ بالموقف الرائع للريس

و صحفى مش عايز يتكلمـ فى الموضوع دا علشان عارف أن عادل حمودة غلط فى شيخ الأزهر


النوع الأول ..

دافع عن وجهة نظره .. و قال رأيه .. و أحترمـ رأيه و لكنى مازلت مختلف معاه

النوع التانى ..

دا بقى اللى أنا بعيب عليه .. مش علشان صحفى اللى غلط مقولش أنه غلط ..

مش معقول أقوله النهاردة أنه غلط .. طيب أفرض مثلا أنا غلطت قبل كده زيه .. أيه العمل !!



لو فرضنا أن عضو مجلس شعب .. أخوانى .. عمل نفس الصورة ..

كان حيبقى ايه رد فعل الصحف القومية ؟؟

طيب لو كان عضو مجلس الشعب .. وطنى .. و عمل برضه نفس الصورة

كان حيبقى شكل جرايد المعارضة أزاى ؟؟


أنا شايف أن عادل حمودة أخطأ ..

و اللى يغلط يتحاسب ..

كان ريس .. كان وزير ... كان غفير .. يتحاسب

مش معقول الصحفيين يكونوا فوق القانون !!!






31 التعليقات:

banouta masreya يقول...

بس انا مش مع الحبس ابدا على فكرة
غرامة ايوة
حق الرد..طبعا
ايقاف مؤقت او حتى رفد من النقابة..مقبول
قفل الجرنال حتى لو الموضوع وصل للاعراض و الشرف او الاتهامات اللى من غير ادلة
لكن حبس صحفى مع المجرمين و القوادين و المحششين و الرقاصات..واسعة اوى بصراحة

Here i'm يقول...

أنا متكلمتش فى حبس خالص .. أنا بتكلم عن فكرة الحساب ..

فكرة أن الصحفيين محدش قال معلش يا شيخنا هوا غلطان .. لا كل واحد بيقوله أنت متسامح ربنا يكرمك سامحه ..

mUsLiM يقول...

على فكره فى قانون فى ايطاليا يمنع الاستهزاء أو السخريه من بابا الفاتيكان ,,

ولو فى ايطاليا حصل ان صحفى عمل صوره لبابا الفاتيكان وهو لابس لبس مشايخ الأزهر أو شيخ اسلامى ,,

الدنيا تقوم ومتقعدش ,,

وفى الدنمارك من حوالى شهر تم حبس صحفى للاستهزاء من البابا ,,

ودى الدنمارك كمان مش ايطاليا

دنمارك حرية التعبير وسب الرسول ..

سلط الله العذاب على المعتدين الظالمين ..

والله من وراء القصد

السلام علكيم

Here i'm يقول...

انا زيك يا مصعب ..

شايفه معتدى و ظالم .. مهما كان لراجل دا بنتفق معاه ولا لأ ..

mUsLiM يقول...

على فكره انا قلت كلمة المعتدين والظالمين على كل من سب النبى ,,

أما عن قصة عادل حموده وشيخ الأزهر

فدى قلة أدب ومهاترات ما بين الطرفين

وانا نفسى بتنفر من القرف ده بصراحه

نسأل الله السلامه

السلام عليكم

... amr يقول...

.....تقول لمين .. ومين يسمع .

احنا عندنا معايير خاصة بكل فئة ..

تصدق .. انا كتير بتيجي على بالي كلمة احمد نظيف . . . ان احنا لسة قدامنا كتـــــــــــــــــــير عشان نطبق الديموقراطية و لا نفهمها حتى !

Here i'm يقول...

مصعب ..

بس عادل حمودة هوا اللى بدأ الأول و ظلم شيخ الأزهر بالصورة الوقحة دى ..

Here i'm يقول...

عمرو ..

تصدق فعلا أنا بحس أن مقولة نظيف صح .. بس عايزة شويه لباقة و دبلوماسية و فيونكا و تبقى حلوة قوى ..

ساعات كتير بحس أننا فهمين الديمقراطية و حرية التعبير غلط ..

يمكن أنا مجيش حاجة جنب عادل حمودة .. ولا أجى حاجة جنب أى صحفى مبتدأ .. ولا أنا برضه اللى حعرف عادل حمودة يعنى ايه حرية تعبير .. بس انا شايف أن دى وقاحة و قلة ذوق

Founoon يقول...

شيخ الازهر في حد ذاته مش اله ولا نبي عشان يكون الاستهزاء بيه جريمة

مبدئيا انا ضد الازتهزاء والسخرية على طول الخط وفي كل الاتجاهات

المصيبة في موضوع شيخ الازهر انه لا يمثل نفسه

هو بيمثل الازهر اكبر مؤسسة دينيه مش في مصر بس في العالم العربي واذا ماكنش في العالم ككل

مكانته توجب احترامه حتى وان لم يكن اهل للاحترام

عادل حموده كصحفي مدعي منافق وليسامحني الله ان كنت اغتبته ولكني حضرت موقف معاه نزله من نظري لسابع ارض

افتكرت شطر من بيت شعر بيقول

كلك عيوب والناس السن

عادل حموده

البجاحة ليها ناسها بردو !!!

Founoon يقول...

وانا كمان ضد الحبس

بس مع الغرامة المالية والاعتذار العلني

دا اقل واجب

بالمناسبة

عادل حموده استغل حوالر شيخ الازهر مع وائل الابراشي ضده

لا تعليق !!

ضد التيار يقول...

اتفق معك انه مهما كان ماينفعش يعمل اللى عمله

لكن انا مع بنوته فى موضوع الحبس ماينفعش فى حاجات كتير ممكن تحصل بدل الحبس

صبري سراج يقول...

عادل حمودة لسع

وشيخ الأزهر رغم تحفظي عليه

إلا إنه يبقى رمز للمسلمين

وإهانته بالشكل ده تستلزم

عقاب رادع طبعا

mUsLiM يقول...

شيخ الأزهر ليس رمز للمسلمين ,,

ولا حتى رمز للأزهر الذى يمثله ,,

والعلماء فى الإسلام لا يمثلون إلا أنفســهم ,,

والكل يؤخذ منه ويرد الا المعصوم صلى الله عليه وسلم

فالإســلام يمثل نفسه بنفســه ,,

والعلماء وظيفتهم البيان ,,

ونحن إذ ندعو للعوده الى الاسلام , لا ندعو الى تيار او فكر معين بل ندعو الى الاسلام نفسه بفكره الأصيل الناقى

فكر الرعيل الأول من الصحابة والتابعيــن ,,

والله من وراء القصد

السلام عليكم

صبري سراج يقول...

القضية اتحكم فيها بغرامة 80 ألف جنيه على عادل حمودة

Nourhan Sirag يقول...

انا ضد حبس الصحفيين طبعا
ولكن طبعا لازم يتعاقبوا لما يغلطوا غلط زي اللي عمله عادل حموده

من البدايه انا مبحترمش الصحفي ده ابدا ولا بحترم جريدته

بس انا بختلف برضه مع فنون في ان بكده بنهين مؤسسه وكلام الناس التانيين على غرار بنهين الاسلام

الصحفي اهان شيخ الازهر
وكان لازم يأخذ عقابه
وأخذ فعلا عقاب 80 الف جنيه غرامه
وللصحفي التاني برضه 80 الف جنيه

وزي ما أهان شيخ الازهر
هو كمان اتهان لما وقف بعد حكم المحكمه
كبار الصحفيين اللي زي وائل الابراشي وغيره ..كل واحد بيسأل التاني تقدر تدفع كام عشان يكملوا 160 ألف جنيه !!

Here i'm يقول...

فنون ..

أنا معاكى فى كل كلمة ..

Here i'm يقول...

ضد التيار ..

و انا كمان معاك و ضد الحبس ..

بس مع العقاب .. و دا اللى حصل

شكرا على ردك و أهتمامك

Here i'm يقول...

صبورتى ..

أنا شايفه زيك انه رمز للمسلمين ..

أما عادل حمودة أنا بصنفه مع مجموعة كده من ضمنهم كابتن هيما :D

Here i'm يقول...

مصعب ..

نيجى بقى للراس الكبيرة اللى حتتقطع هنا :D

يا عمنا .. أمام أى جامع مش بيعتبر رمز للجامع !! ..

يعنى مثلا الشيخ محمد حسان مش بيحسب على الدعوة السلفية ..

الشيخ وجدى غنيم مش بيحسب على الأخوان

بلاش الشيوخ ..

مش بابا الفاتيكان رمز للمسيحية ..

مش الخومينى رمز للشيعة ...

Here i'm يقول...

صبورتى تانى :D

الحكم عجبنى قوى ..

Here i'm يقول...

نورهان ..

علشان صبرى قاعد بس مش حاجى جنبك :D

يا جماعة .. مش البابا رمز للمسيحية و الخومينى رمز للشيعة ..

يعنى انتى لما بتحبى تعملى حاجة فى الجامع اللى تحت بيتكوا مش بتروحى لأمام الجامع ..

محمد الدخاخنى يقول...

فى بعض الأحيان قد نأخذ بعض المواقف من الاشخاص الذين ينتمون للإسلام وإن كانوا اعلامه..ولكن لا يودى بنا هذا إلى التشهير بهم علانية او سبهم وقذفهم..لأنهم فى النهاية رمزا للأزهر الذى هو منبع الإسلام

mUsLiM يقول...

يا كبارى انا لا بدافع عن شيخ الازهر ولا عن الراجل اللى اسمه عادل حموده ,,

كلها مهاترات يعف لسانى عن الدخول فيها أصلا ,,

والشيخ محمد حسان ليس رمز للدعوه السلفيه , فالدعوه السلفيه رمز لنفسها ,,

لا يمثل العالم الا نفسه , ودوره البيان فإن أصاب فقد وافق الحق , وإلا فلا يلومن الا نفسه ,,

والله من وراء القصد

السلام عليكم

Nourhan Sirag يقول...

ايوه اتحجج اتحجج بصبري :D

اولا انا مش بدافع عنه

وياسيدي على عيني وعلى راسي طبعا كل اللي قولته

بس مش معنى انه لبسه اللبس ده عشان هو مش متفق معاه في تصرف هايعمله

انه بكده أهان الاسلام والمؤسسه والمسلمين

مبحبش انا التزييط ده
ده مش نبي ولا اله عشان لما حد يستهزئ بيه يبقى اهان الاسلام

ومع ذلك انا مصره ان عادل حموده غلطان من ساسه لراسه
واحترمت جدا المحكمه لما برأته من تهمة اهانة المؤسسه وانها عاقبته فقط على اهانته لشيخ الازهر

dalia يقول...

من التعليقات شعرت ان فيه اهتمام ومتابعة من المدونين لقضية عادل حمودة مع شيخ الازهر حتى من خارج المهنة وده شيئ ايجابي جدا وكويس يا محمد انك عرضت الموضوع ده ولكن في عندنا في الصحافة اسمها عدم التعليق على احكام القضاء والقضاء هو وحده له الحق في ان يصدر احكام بالبراءة أو الاتهام والمشكلة ان فى صحفيين بيتدخلوا في القضية وهذا خطأ طالما القضاء مازال بيدرسها وده بيعمل رأي عام قد لا يستوعب القضية جيدا ويكتفي بما ينشر عن الموضوع دون أن يكون اطلع على ما نشره عادل حموده في الاصل ، طبعا هذا ليس دفاعا عن عادل حمودة لأن القضاء قال كلمته خلاص وانا مبسوطة منها جدا لأنها لم تضمن الحبس

Here i'm يقول...

محمد الدخاخنى ..

كلامك حلو قوى ..

على فكرة انا اخدت من مدونتك مقولة عجبتنى قوى .. " قارىء اليوم قائد الغد "

سعيد بردك :)

Here i'm يقول...

يا مصعب ..

انا يمكن مش عارف أوصل وجهة نظرى ..

أنا اللى أقصده .. شيخ الأزهر .. مش رمز للأزهر ؟؟ .. كان غلطان بقى او مش غلطان .. أسمه شيخ الازهر ..

أنا مش مع تمجيده أو الخسف بيه .. انا بختلف معاه على طول الخط و الحمد لله الأختلاف مع شيخ الأزهر شايفها نعمة :D

الفكرة أنى مأحطش شيخ الازهر فى لباس بابا الفاتيكان .. انا شايف الصورة من ناحية تانية .. جامع الأزهر مرفوع عليه صليب .. مش هيا هيا .. هيا هيا الوقاحة .. يمكن تعبيرى يكون لاذع و بايخ .. بس مش دى الحقيقة ..

Here i'm يقول...

نورهان ..

عادل حمودة أهان المؤسسة .. دا مش تزييط دى حقيقة ..

زى ردى على مصعب .. مش لما شيخ الأزهر يلبس لبس بابا الفاتيكان .. زى ما الجامع الأزهر يترفع عليه صليب ..

المشكلة .. أن شيخ الأزهر لا يصلح لكى يكون رمز للجامع الأزهر .. بس للأسف هوا رمز ..

يعنى لو اتهان فى مطار من المطارات زى البابا شنودة .. حيقولوا أن شيخ الازهر اتهان ؟؟ ولا محمد طنطاوى اتهان ؟؟

Here i'm يقول...

داليا ..

هيا دى المشكلة .. كل واحد مسك قلمه و عمال شغال .. يا أما بيقول حرية الصحافة .. يا اما بيقول سامح يا كبير

أنا فرحت أن مفيش حبس .. و فى نفس الوقت فرحت أن فى عقوبة ..

عاقلة علي ارض الجنون يقول...

مش معني اني ضد فلان مهما كان اني أحقر من شأنه .. شيخ الأزهر له إحترامه كشيخ أزهر و كإنسان من حقه أن أحترمه .. رجل كبير .. و كوني أختلف معاه لا يعطيني الحق في اني "أهزأه" ..

البوست منطقي جدا و أتفق معاك و تلك رؤيتي

ياسمين

Here i'm يقول...

ياسمين ..

كلامك كله صح ..مش لما اختلف معاك اشتمك و أقتلك .. الأختلاف ميدنيش حق القتل و الأستهزاء