السبت، 1 نوفمبر، 2008

أنسف حمامك القديم ..




" أنسف حمامكـ القديمـ .. "

دا شعار المرحلة فى البيت عندنا .. و بما أنه تكسير و خبط و رزع و تغيير سيراميكـ

يبقى شيل محمد الليله .. هوا مش شغال فى شركة مقاولات ؟!

محمد .. عايزين حاجات السباكة .. حاضر

محمد .. عايزين حد يعمل العزل .. حاضر

محمد .. السباكـ طلب حاجات زيادة و عايز يبدلها بحاجات تانية .. حاضر

دى وصلت لأنى نطيت فوق العربية الـ 1/2 نقل و بشيل الراجل السيراميكـ

أخر تدبيسة النهاردة .. النقاش و بتاعة الألوميتال ..

فى كلامـ بيدور فى أرجاء البلاط الملكى عندنا أننا حننسف البيت كله ..

ما أنا اللى جايبه لنفسى .. لازمـ أنسحب من لسانى و أقول أنا عارف

أشرب يا محمد .. حاضر






تحتفل جمهوريتنا الصغيرة .. جمهورية الزعيمـ الصغرى

بسلسلة من أعياد الميلاد ..

سيدة القصر الأولى .. اللى هيا ماما .. 31 / 10

الزعيمـ .. اللى هوا بابا يعنى .. 4 / 11

حيطلعلى حد ظريف دلوقتى من جمهورية أخرى .. يقولى أيه دا أنت مامتكـ أكبر من باباكـ

أحب أقوله .. و أنت مال جمهوريتكـ :D

الأحتفالات السنة دى حتواكب الأحتفال بالحمامـ ..

بفكر أجبلهمـ هدية من نوعية الهدايا اللى كنت بجبها لماما فى عيد الأمـ و أنا ضغير

كنت بجبلها طقمـ بهارات .. لما كبرت قولت أيه السخافة دى ..

المرة دى حجبلهمـ أيه .. أجبلهمـ أيه ؟؟

شكلها حترسى على طقمـ بهارات ..







أحساسى قالى انى أستهلكـ .. فكرت تبقيلى حلالى

جريت عليكى أندهلكـ و حصانى ناطط فى العالى

وصلت باباكـ و انا شايل الأحلامـ فى عيونى .. و لسه حبدأ بكلامى ..

الحراس منعونى ..

أقرب اغنية ليا فى شريط محى .. " زى كتير "

حاسس أننا كلنا زى كتير ..

زمان كان فى حراس ... دلوقتى فى بابا و ماما ..

انا لامس الحتة دى فى صحابى .. أغلب الحراس منعوهمـ ..

لسه كنت بعنف معتز على كامـ حوار ..

بس معتز حراسه هما اللى منعينه مش حراسها





if only

لسه الفيلمـ دا شغلنى .. شغلنى من نقطة واحدة بس


أنى بحسد بطل الفيلمـ .. أزاى تبقى عارف أن أقرب و أهمـ حد فى حياتكـ حيموت


و يبقى عندكـ الأختيار .. هوا اللى يموت ولا أنت .. و تختار أنكـ أنت اللى تموت و هوا يعيش


و أزاى أن اللى ضحيت علشانها .. فاكرة أنكـ كنت حاسس انكـ أنت اللى حتموت مش هيا ..


مش عارفة أنكـ كنت متأكد أنها هيا اللى حتموت ..


أزاى تبقى عارف أنكـ لو بعدت عن مكان الحادثة .. تقدروا تغيروا القدر


و لما حبيبتكـ ترفض تغير مكان الحادثة علشان حلمـ حياتها .. توافقها


و انت عارف أن كلامها دا يعنى نهايتكـ انت .. ما هو مش مهمـ .. أهمـ حاجة هيا تكون مبسوطة


أجمل حاجة فى التضحية .. أن للى بتضحيله ميعرفش انكـ ضحيت علشانه

قد أيه أنا بحسدكـ ..




7 التعليقات:

banouta masreya يقول...

بالشفا:D
انا لما بشوف واحد من هولاء الكائنات اللى اسمهم عمال بسيبلهم البيت و امشى و بما ان ماما واخدة توكيل العمال عندنا و بتحب وجودهم فى البيت بس عشان تستفزنى بفكر جديا انقل المقر على بيت جدتى..بجد بتنكد لما بييجوا

يعنى بابا و ماما الاتنين برج العقرب برضه..عشان تعرف بس انه برج العظماء فعلا :D
انا بابا عيد ميلاده فى يناير و بفكر من دلوقتى اجيبله ايه..كل سنة اجيبله قميص او بارفان و ياخدهم و هو مبتسم ياعينى و اخيرا قالى صراحة انه زهق..صعبة اوى الهدايا لما تبقى لناس قيمتهم اكبر من انها تبان فى هدية ولا فى كلمة و يا ريتنى حتى بعرف اقول الكلمة دى

بعيدا عن محمد محى لانه بيجيبلى حساسية بس انا لسه شايفة الحدوتة دى مع اتنين اعرفهم فى الاسبوعين اللى فاتوا
واحدة امها رفضت عريس بنتها بتحبه عشان مش عارفة تقول ايه لبنت خالتها على ام العريس اللى اكيد هيبقى لبسها بلدى اوى فى الفرح

و التانية رفضته عشان ساكن فى منطقة شعبية و كفاية انها عايشة فى اسكندرية و ده مجتمع صغير فحاجة تكسف ان الناس كلهم يبقوا عارفين ان بنتها بتحب الولد ده..مع انه دكتور

مش عارفة بجد هيحسوا بايه لما يصحوا فى يوم يلاقوا ولادهم تعساء و هم السبب فى كده..ازاى بيعرفوا يناموا اصلا

بس انا مقتنعة ان الجواز اولا و اخيرا قدر..و ده اللى قلته للبنتين..لو قدرك هييجى و هتكملوا انشاله حتى بعد عشرين سنة
ما يمنعش ان فى بنات احيانا بتبقى عايزة الحرق..فى حد ادنى ما ينفعش تنزل تحته اصل اكيد مفيش ام ولا اب ممكن يوافقوا يجوزوا بنتهم لواحد هيخليها تشحت من اولها

مفيش حد يستاهل تضحية..ده اللى توصلتله اليومين اللى فاتوا دول..خصوصا ان مفيش حد بيقدر و كتير بيعتبروه حق مكتسب ليهم..بس تصدق حلوة فكرة الفيلم..يا ريتها تنفع مع حد واحد فى حياتى..و ساعتها مش هبقى بضحى عشانها هيبقى عشانى لانه اكيد الحياة بعدهاهتبقى لا تطاق
انانية اوى انا:D

مش عارفة مالى بقيت رغاية كده بس تقريبا عشان ويك اند بعد 5 ايام طحن :D

Here i'm يقول...

ما أنا كنت كده .. مبتعملش فى أى حاجة .. لكن جات الفرصة اللى الكل كان مستنيها علشان يفرمنى :D


بابا و ماما برج العقرب برضه و برج العقرب كله عظماء.. بس لكل قاعدة شواذ :D ..


لا أسمعى محى .. عامل شريط تحفة .. الفكرة أن معقول فى حد عارف مصلحتى أكتر منى .. ما يا أما أنا عبيط .. يا أما بابا أو ماما سوبر مان .. و بابا و ماما ناس عادية جدا و سوبر مان دا شخصية خياليه أساسا .. يبقى فى أيه بقى .. بس فى بنات و ولاد عبط و أهلاليهم بينقذوهم .. و تقدرى تقولى أن معتز صاحبى من العبط .. و أنا واقف فى صف حراسه .. علشان مش أول مرة يعملها :D



أنا عجبتنى فكرة التضحية .. مشغلنيش هل فى ناس تستاهل التضحية ولا لأ .. بس لو الواحد قاعد شويه و حط أسامى الناس اللى يعرفها و علم على اللى تستاهل التضحية فى ورقة .. أكيد حيلاقى لستة ضخمة جدا .. و دا حيساعد على أنه ميضحيش لحد علشان التانى ميزعلش :DD

أن شايف أن التضحية حق مكتسب فعلا للبنى أدم اللى بحبه ...

بس الأختيار هوا اللى بيريح من التفكير فى أن الشخص دا يستاهل ولا لأ ..

Reem يقول...
أزال المؤلف هذا التعليق.
Reem يقول...

ممكن تتخيل النتيجة النهائية عشان ما تحسش بقرف و تعب العمال بس خلي بالك انه ممكن ما تطلعش زي ماهتتخيلها

********

اكبر اصغر مش مهم طالما الحمدلله البيت
عامر بالحب و ان شاء الله العمر كله

و كل سنة و هما طيبين و بصحة و سعادة

********

هو انا مابسمعش محي بس هو الاهل غالبا
بيحكمو على الزمن ده حسب زمانهم و ده
ساعات غلط يعني مثلا في مجتمعي مبدأ بنت
اتقدملها عريس تحفة من كل حاجة كونها
بتحبه حتى لو كان احسن راجل في العالم ده سبب كافي للرفض بمبدا انه مش
هيثق فيها و بكرة يطلقها و كدة و ممكن
كمان يجوزها اول واحد يتقدم ده غير الامور المادية كمان و رفض لتفهات عجيبة مو من مواخيذنا و مو من قبيلتنا

بس ساعات زي ما قولت خبرة الحياة بتخليهم يعرفو انه اللي عايزنه ولادهم هيكون سبب تعاستهم

على حسب الاهل بقى و في الاخر الزواج بالذات فعلا نصيب

*********

التضحية دي بقى بفكر فعلا الغيها لفترة من حياتي حاليا و ابقى حاطة مبدأ ريم والطوفان من بعدها
برجع في كلامي ساعات و انسى ساعات بس في حاجات قدرت اطبقها

صبري سراج يقول...

انا هعلق على آخر نقطة

مفيش حد بيغير القدر.. احنا بنتوهم اننا بنغيره لكننا في الحقيقة بنروح له برجلينا

مرة واحد راح لسيدنا سليمان وقال له انا عرفت اني هموت انا عايزك تأمر الريح تنقلني الهند عشان مموتش.. فسيدنا سليمان امر الريح انها تنقله للهند ولما وصل الهند مات.. فسيدنا سليمان كان مستغرب واتكلم مع عذرائيل فملك الموت قال له انه كان مستغرب من وجود الراجل ده هنا رغم انه كلف إنه يقبض روحه في الهند!!

الخلاصة محدش بيغير القدر يا عم كوبري

وبالنسبة لأعمال المقاولات المنزلية فسبقتك لها من سنتين وبرضه طلعت ع العربية النص نقل وحملت السيراميك.. وشلت اسمنت على كتفي كمان

dalia يقول...

انا كمان جربت شعار المرحلة اللي عندكوا متفكرنيش كانت ايام صعبة قوى ياااااه الحمد لله عدت على خير ، اما بالنسبة للفيلم if only لم اشاهده ولكن قصته كما تعرضها بتفكرني بفيلم زى النهاردة نفس الفكرة البطلة بضحي بنفسها علشان خطيبها من غير ما يعرف . اعتقد ان التضحية ديه مش سهلة ابدا ومش كل الاشخاص يقدروا يعملوها ولا انت رأيك ايه يا محمد ؟

leeno يقول...

الحمدلله البيت في الصيف اتبيض و عملنا بلكونة كمان و كانت ايام سودة الحمدلله ههههههههههههه

كل سنة و بابا و ماما طيبين

عارف المشكلة فين اننا اكتر ناس عارفين مصلحتنا و كمان عارفين نصيبنا و عارفين ماشيين على فين و قلوبنا بتقاوح و بتعاند خايفة من الوجع و الألم و بنبقى ماشيينله برجلينا

محدش بيغير القدر احنا بس بنروحله


حالة الحب اللي في الفيلم نادرة جدااااااااااااااااااااااااااااااااا
موجودة يمكن بس معتقدش ان في الواقع ممكن تلاقيها يمكن كل كم مليوم و كم جيل لما تتكرر الحالة دي بس اكيد اتوجدت و لو مرة في الحياة