السبت، 22 نوفمبر 2008

عالم سمسم ..





حاسس أنى حاليا عايش فى عالمـ سمسمـ ..

بس عالمـ سمسمـ بتاع الأطفال غير عالمـ سمسمـ بتاعى ..

عالمـ سمسمـ بتاع الأطفال دا عالمـ لذيذ و بيجى مرة واحدة فى يومـ .. أخره ساعة بس

كله ضحكـ و لعب و حب .. كله عرايس و أغانى و حروف و أرقامـ ..

أما أنا عالمـ سمسمـ بتاعى .. بيرفع شعارى الدائمـ ..

نحن نختلف عن الأخرون تماما ..




النت عندى كان بايظ .. قولت أروح للجهاز العقيمـ اللى أسمه التلفزيون ..

مش معقول حنامـ بدرى يومـ أجازتى .. أعيا :D

المهمـ .. على حظى بفتح التلفزيون الساعة 4 الفجر لاقيت الفيلمـ اللى جاى أسمه

Mona lisa smile

بعيدا عن الاخت جوليا روبرتس اللى مش حتكلمـ عن أدائها

علشان هيا لو عملت فيلمـ صامت و فاضى و رخمـ برضه حتفرج عليه :D

فكرة الفيلمـ جديرة بالأحترامـ ..

أنكـ بتنادى بحاجات جديدة و الناس كلها شيفاكـ أهبل و ساذج و بتهدمـ التقاليد و الأعراف

لما تقول تعالوا نشتغل و نغير بأدينا .. يقولكـ يا سيدى دع الخلق للخالق

لما تقول أنا بحلمـ كمان 20 سنة أنى أكون رئيس مصر .. يقولكـ بلاش فذلكة وحياة أبوكـ

لما تقول حنوصل و حنغير و حنكون أحسن .. يقولكـ أبقى قابلنى




قريت خبر عاجبنى قوى .. و قارنت بينه و بين بلدنا و جامعتنا

أن رئيس جامعة أسطنبول قرر أنهاء مقابلة مع السفير الأسرائيلى بسبب دخول حراس السفير لمكتبه ..

و قال أنه بيستغر بأن السفير هوا اللى طلب الزيارة .. و انه رحب بالزيارة

و على عكس المتوقع لما سأل السفير عن الشخصيين اللى واقفين ... قاله ان دول الأمن الخاص بيه

راح رئيس الجامعة بكل بساطة .. قامـ و قال أتفضلوا أخروجوا كلكوا برا ..

يذكر أن جامعة أسطنبول من أعرق الجامعات التركية .. و تلقى أحتراما و تقديرا عاليا

و أنها أنشئت فى 1453 م .. مع فتح المدينة على أيدى الجيش العثمانى





خبرين ألطف من بعض قرتهمـ .. بيقولوا ..

مصر .. 22 / 11 / 2008

ضبط 20 بقرة و مستودع وقود قبل تهريبهمـ من سيناء إلى غزة

بروكسل .. 22 / 11 / 2008

حملة أوربية لجمع الأدوية لقطاع غزة

عارف طبعا أنى مش محتاج أحط الخبرين كاملين ..

ملحوظة بسيطة جدا ..

لما دخلت أجيب صورة أبو تريكة بتاعة تعاطفا مع غزة لاقيت 5300 صورة

قلت لااااااا .. كلا و حاشا ... و شغلت نظرية المؤامرة بتاعة جوجل يمسح صور أبو تريكة

لاقيت برضه أن الصور موجودة .. و بكل المقاسات و الأوضاع ..

يا خسارة فشلت نظرية المؤامرة ..


قريت تقرير .. بيتسائل عن

هل ديمقراطية أمريكا تستطيع محاكمة بوش .. ؟؟




من الناس اللذيذة اللى مفيش أكتر منهمـ فى بلدنا المحروسة ..

الناس اللى بيتقال عليهمـ .. ع ك ح .. عارف كل حاجة ..

هما برضوا اللى كل حاجة عندهمـ سودا و وحشة و نظرية المؤامرة ..

مش معقول مشروع قانون عن الصكوكـ .. يخرج الراجل كل يومـ بتصريح

أخر تصريح ليه النهاردة .. قال أن المشروع مش علشان التوريث

كل يومـ تصريح .. علشان يرد على جهل و سوداوية ناس ..

ناس فى يومـ و ليلة بقوا فاهمين أقتصاد و أسهمـ و بورصة ..

هما هما الناس اللى كانوا من يومين فاهمين السياسة الامريكية و الأنتخابات الأمريكية

و اللى كانوا قبليها بيشتموا علشان الدويقة و أراهن ان يكون واحد فيهمـ نزل ساعد حد من المنكوبين

و هما هما اللى حيجروا يقفوا ياخدوا الصكوكـ و هما واقفين حتسمع منهمـ

هيا الحداية بترمى كتاكيت .. و لما تسأله أيه اللى جابكـ للحداية .. يقولكـ علشان الكتاكيت !!








فعلا .. عالمـ سمـ سمـ ..







6 التعليقات:

Superman يقول...

و ما الحياة الا عالم سمسم كبير

انا حرة يقول...

خليتنى افكر فى اسم للفيلم اللى انا عايشة فيه اليومين دول تصدق
"دمى و دموعى و ابتساماتى"..انا مش عارفة ده بتاع مين ولا بيحكى عن ايه بس شكله نكد :D

جوليا روبرتس فى الفيلم ده هى بالظبط الشخصية اللى كان نفسي اكون زيها و فى نفس قوتها..كل بنات سنها كانوا بيفكروا فى حاجة واحدة و باصين تحت رجليهم..هى بس اللى كانت بتبص لقدام..كنت متخيلة نفسي هصلح الكون و هعدل اللى مش عاجبنى لوحدى..بلا خيبة

عجبتنى اوى حكاية الكتاكيت..بس انا برضه مش فاهمة حاجة فى الاختراع الجديد ده يمكن العيب فيا انا اللى مش لاحقة اقرا مع انى كل ما اشوف مقالة الاقى الصحفى بيبدأها بانه هو كمان مش فاهم
ابقى سلملى على خوخة وحياتك :D

samamasr يقول...

يعني إيه عالم سمسم ؟


يعني خوخة ونمنم وفلفل :)

Here i'm يقول...

سولتوووووو ..

فعلا و ما الحياة ألا عالم سمسم كبير ..

بس أنا حطيت اضافتى .. عالم سم سم

Here i'm يقول...

بنت مصرية ..

لا حوار دمى و دموعى و ابتساماتى دا تقيل على قلبى قوى :D .. مش بتاع الحاجت دى أنا :D

بس كلنا بندور فى فلك عالم سم سم ..

اللى كان نفسك تكونى زيها و فى الأخر بلا خيبة .. فكرينى أقطع الأستمارة :D ..أنتى لا تصلحى :D


الأختراع الجديد دا بعد دراسة رهيبة و قراية رخمة .. قررت أقف مع الحكومة فىمشروع القانون دا .. من منطلق .. شايف حاجة حلوة ؟ .. القانون دا ليه مميزات كتيرة قوى أهم مميزاته أنه حيلغى نظم الخصخصة اللى قايم على العمولات و الرشاوى مهما كانت الحكومة اديها نضيفة الموظف اللى تحت الوزير مش مضمون .. كمان فكرة أن الحاجة اللى ملك المصرى و دافع فيها بيخاف عليها اكتر من أبنه .. تخيلى ينفع و انتى راكبة عربيتك تقطعى فرشها أو تكتبى عليها للذكرى الهباب ؟؟ .. أكيد لأ .. تخيلى أن المواصلات بقت ملكك .. و كمان أن الحاجات الخاسرة مش داخلة و الحاجات الأستراتيجية برضه مش داخلة .. و كمان أن اكبر نسبة أستحواذ للفرد فى نوع معين مش حتزيد عن 5 % .. يبقى أرفض المشروع دا و أوافق على لخصخصة ؟!!!

حاضر حسلملك على نمنم و فلفل :D

Here i'm يقول...

سما مصر ..

ما انا بقول أن عالم سمسم عالم حلو بس عالمى بيختلف عن الأخرون تماما :D

لا عالم سمسم اللى أقصده هوا على علوكة و أشرف كوخة :D