الثلاثاء، 9 ديسمبر 2008

بين حملة عمرو خالد و جمال مبارك .. شقلبت العلم



كنت من الناس اللى بتتمنى جمال مبارك يكون رئيس مصر القادمـ ..

لعدة أسباب .. أنه شاب متفتح .. تعليمـ أمريكى .. عارف يعنى أيه أختلف معاكـ و أبتسملكـ

أنه رجل أقتصاد مش عسكرى .. كرهى للمعارضة و الأخوان .. .. ألخ

كنت واثق لو نزل جمال مباركـ الأنتخابات كنت حديله صوتى ..



كل دا قبل يومـ 3 نوفمبر .. فى اليومـ دا كان فى
حدثين ..

الصبح مؤتمر الحزب الوطنى .. بالليل الفجر أنتخابات الرئاسة الأمريكية

فجأنا جمال مباركـ .. بخطابه اللى غلط فيه فى المعرضة و أنهمـ عايزيين يرجعوا بمصر 40 سنة لورا

لسه ممرتش 24 ساعة .. كان أوباما بيعتلى منصة التتويج .. و اتحفنا بخطاب تاريخى قال فيه

على الأستعداد للعمل مع الجمهوريين من أجل مصلحة أمريكا ..

قمة الكسفة و الأحباط و الحزن .. لما تسمع من حد أنه حيضرب بأيدى من حديد عز على المعارضة

و التانى الى بلده مش محتاجة .. بيقول حمد أيدى لأيد المعارضة ..

قمة الأحباط .. لما واحد فى عز نصره يتواضع .. و واحد فى عز أنكساره و فشله بيتغر

الأحباط أن اللى عندكـ .. هو اللى أتغر



المهمـ .. عدت الفترة دى لغاية يوم 27 نوفمبر ..

لما أعلن عمرو خالد عن إيقاف حملته فى مصر فقط دون أبداء أسباب

تنافست الجرائد و المواقع الألكترونية على زج أسمـ الأمن بأعلان توقف الحملة ..

أه الأمن اللى بيبلغ بأيقاف الحملة .. بس مش الامن السبب

السبب ..

أننا معندناش سياسة مصر فوق الجميع .. تولع مصر .. تتحرق مصر .. بس محدش ينجح غيرى

السبب .. أنكـ شغال مع عمرو خالد ..

السبب .. أنكـ عايز تخرج عن تقاليد الشعب المصرى العتيد .. و تكون إيجابى

السبب .. أنكـ مش معانا و اللى مش معانا يبقى ضدنا

فيها أيه لما مجموعة شباب تنجح فى عرض مشكلة عويصة ذى التعليمـ و الفقر و بحث حلولها ..

ما أحنا برضه اللى نجحنا فى عرض و ليس حل لمشكلة الأدمان ..

و ساعتها مطلبناش لا حكمـ و لا حزب ولا حتى عز ..

كان كل همنا أن حملة حماية تنجح .. و نجحت و عملنا حفل ختامـ .. و بدأنا فى الحملة التانية

فيها ايه لما ابقى شاب إيجابى .. ولا هيا الايجابية مش بتمشى غير بكارنية الحزب الوطنى

معاك كارنيه الحزب .. تبقى حبيبى و كفاءة .. معكش كارنية الحزب تبقى معارض و مش بتفهمـ و شويه و تبقى أرهابى

لما أتوقفت الحملة ..

أفتكرت جورج بوش لما قال .. اللى مش معانا يبقى ضدنا ..

أفتكرت أوباما لما مد أيده للمعارضين فى عز أنتصاره و نجاحه

و أفتكرت جمال مبارك لما قال أن اللى مش معانا عايز يرجع بمصر 40 سنة

و أفتكرت مقولة " أن الأختلاف فى الرأى لا يفسد للود قضية " .. و قولت يا شيخ أتلهى



سؤال للأذكياء فقط ..

حملة عمرو خالد بدأت من شهر أبريل .. و الأمن كان عارف .. ليه أتوقفت دلوقتى بالذات ؟؟

ليه البوست دا أتأخر مش فى وقت إيقاف الحملة ؟؟

الأجابة فى أخر البوست ..



من ساعة معرفت خبر إيقاف الحملة و أنا أغنية منير ..
علق حلمه .. فى ودنى

على الرغمـ من أنى من عشاق منير ..

ألا أن منير فى الأغنية دى بيستفزنى لدرجة بتخلينى أدندن الأغنية دى فى أى مكان ..

بعد ما أدى و بعد ما خد .. بعد ما هد و بنى و أحتد .. شد لحاف الشتا من البرد

بعد ما لف و بعد ما دار .. بعد ما هدى و بعد ما سار .. بعد ما داب و أشتاق و أحتار

حط الدبلة و حط الساعة .. حط سجايره و الولاعة ..
علق حلمه على الشماعة

شد لحاف الشتا على جسمه .. دحرج حلمه و همه و أسمه ..
دارى عيون عايزين يبتسموا

اللى قضى العمر هزار .. و اللى قضى العمر بجد ...
شد لحاف الشتا من البرد

حط الدبلة و حط الساعة .. حط سجايره و الولاعة ..
علق حلمه على الشماعة

منير بيوصف واحد .. كان ليه حلمـ .. حلمـ عايش علشانه .. بس صاحب الحلمـ دا ميستحقهوش

صاحب الحلمـ دا .. مكنش قد حلمه .. متعبش علشانه .. لما أتكعبل فى أول حفرة جرا و سابه

يمكن أكون فهمت الأغنية غلط .. أو يمكن أكون ش عايز أفهمها غير كده

بس اللى متأكد منه من غير كلمة يمكن ..

أن لا دا أنا .. و لا دا عمرو خالد .. و لا دا شباب صناع الحياة

الحلمـ حيكبر .. الحلمـ حيعيش .. حنشتغل و حنتعب .. و حنورى كل واحد حاول يوقفنا أننا صح

أننا مش بنجرى ورا منصب و لا حكمـ .. أحنا بنجرى علشان مصر أجمل و أحلى

بنجرى بأيجابية مش بسلبية .. بنجرى بطموح و أمل مش بهمجية و تشائمـ

و علشان كده ..



يا جمال ..

شكرا على كمـ الأعلانات و التسويق لحملتنا بدون تكلفة سنت واحد ..

شكرا على أهتمامـ صحف كبيرة بوقف أعلان الحملة ..

شكرا على الدعاية و الضخب الرهيب لمشروعنا المتواضع ..

و فى النهاية شكرا على أيقاف الحملة لا الحلمـ .. و شكرا على وضعنا فى تحدى




صممت يكون فى أخر البوست صورة جمال مباركـ بعيدة كل البعد عن الأهانة و قلة الادب ..

صممت يكون ليا أحتجاج بعيدا عن الطوب و التكسير و الخسائر ..

صممت يكون أحتجاجى أنى أشقلب العلمـ ..

شقلبت العلمـ أحتجاجا على إيقاف حملة التسرب من التعليمـ فى مصر ..




أجابة السؤال الأول ..

كان فى أمل و تفائل من جمال مباركـ و مساعديه أننا حنفشل فى أول طريقنا

حنفشل اننا نجمع 35 ألف متطوع و جمعنا 40 ألف من الفيس بوكـ بس ..

كان عندهمـ أمل و تفائل أننا حنفشل فى وضع نظامـ أدارى .. و وضعنا نظامـ أدارى مالى ناجح

كان عندهمـ أمل و تفائل أننا نفشل فى أجابة طلبات الشركاء .. و نجحنا فى أجابة كل طلبتهمـ

مكنش قدامه غير أنه يمنع الحملة قبل ما يوقع مع الشركاء فى 1 ديسمبر ..

يبقى مش علشان أحنا فاشليين أتوقفت .. علشان أحنا ناجحين أتوقفت ..

أجابة السؤال الثانى ..

علشان كنت بقول أنها بكره حترجع أقوى .. و مجاش بكره

علشان كان عندى امل أنها ترجع .. و كل يومـ بيعدى بفقد الأمل أكتر أنها ترجع ..



فيروز .. 21 / 11 / 1935

كعبلة و نت مفصول و كومبيوتر مفضوح و عيد هما اللى خلونى مكتبش عن عيد ميلادكـ

كل سنة و أنتى طيبة ..

31 التعليقات:

el7aya يقول...

وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ
الله يكون فى عون الاطفال الابرياء اللى كانوا هيستفادوا من المشروع
الله يكون فى عون الاسر التى كانت ستتحول من اسرة فقيرة الى اسر منتجة ومؤثرة فى المجتمع
الله يكون فى عون الشباب اللى كان هيستغل كل طاقته فى خدمة بلده ومجتمعه بدل ما تٌستغل فى مخدرات او بلطجة
يا kabaary انا بسمى الحملة دي حملة فاضحة لانها كشفت عورات كتييرة موجودة فى البلد او كانت الفارقة ما بين من يرد البناء ومن يريد الهدم
حسبنا الله و نعم الوكيل فى من يقف امام الخير
اللهم ارنا فى الظالمين آية

wa3d يقول...
أزال المؤلف هذا التعليق.
ابن الوليد يقول...

بوست رائع

لكن اذكرك بقول الله تعالى

ان يمسسكم قرح فقد مس القوم قرح مثله

فوالله يا استاذ عمرو لن يخزيك الله ولن يضيعك

اوقفوا مشروك لكن مش هيقدروا يوقفوا

المشروع اللى اتنبى جوا كل واحد فينا

كل سنة وانتا طيب

وظلمت فيروز انك تحطها فى بوست واحد مع جمي

جدع حتى النهاية يقول...

اخيرا... عرفت السبب
بقة جيمى هو السبب
على العموم ... انا فرحت جدا كدة
فيه ناس أما بتهاجمك... وبتحاول تعرقلك....... فانت بتعرف انك ماشى صح وتمام ... ولو عندك واحد على المليون من ذرة شك فى عملك ... بيتصلب عودك... وبتقوم من انحناءك .... وبتقول " الحمد لله" ...
وانا بقولهالك أهو ... والله العظيم أنا فرحت جدا جدا .. أما عرفت ان هو دة السبب

مع انى مش معاك من الاول فى تفاؤلك بجمال....

The Seagull يقول...

بجد مش قادرة أوصف لك قد ايه حزينة على إلغـاء المشـروع ده .. بجد حزينة .. مش عارفة ليه دايمـًا اللي يعمل خير للبلد دي لازم يقفوا في طريقه ويخنقوا عليه ويخليه يكره اليوم اللي فكر إنه يعمل حاجة عدلة للبلد دي؟ ليه بجد؟ وقال ايه مصر بتتقدم بينـا؟ .. آآه فعـلاً بتتقدم بينـا بس لورا مش لقدام!!!!!

حسبنـا الله ونعــم الوكيـل
بوست رائع يا قبـاري :)

la tormenta يقول...

هل تعلم انه في معظم البلاد الفقيرة في أمريكا اللاتينية و حتى في المغرب والكوت ديفوار و ربما بلدان تانية أنا لا أعلم عندهم مؤسسة مهمتها تأدي الفكرة اللي اقترحها عمرو خالد؟ يعني:متطوعين و متبرعين و دراسات و تنفيذ و حملات سنوية للتكافل الاجتماعي وجمع التبرعات بكل أشكالها كل هذا ترعاه الحكومة و تقدم تسهيلات و دعم و اعلانات بانطلاق الحملة و تقارير تقدمها الحكومة و أعضاء المؤسسة و المتطوعين الشباب... الخ و النتيجة مدهشة و تفوق التوقعات
الموضوع نااااااااااجح جدا جدا جدا ..
أقل شي يعطي أمل للنفوس في جو الفقر و البطالة
لكن مصر شاءت انها ماتستفيدش من التجربة!!
ربما اعراضها لانه الفكرة جاءت من داعية اسلامي ؟!و هذاممكن يصبح عنده تأثير على المستوى السياسي
أو ربما لانهم اعتبروا انه أداء المتطوعين لمهامهم يستلزم تغطية أمنية و هذا عبء أمني اضافي على الدولة
مادري..
بس الأكيد انه شيء محزن انه يتم اجهاض الفكرة
أنا رأيي انه الحل هو العمل بتعاون مع جمعيات أخرى أو بالأحرى من خلالها هكذا على الأقل تختفي حجة داعية اسلامي
و لا انت شرايك يا كباري؟:)

انا حرة يقول...

عرفت بالخبر الظريف ده اليوم اللى رحت فيه اسكندرية..قريته الصبح فى المصرى اليوم و اقنعت نفسي انها اشاعة لحد ما صدقت..و فضلت مستنية تليفون من البنت عشان تقولى عايزانا نروح الجمعية تانى امتى..و ما حصلش

انا المتفائلة شايفة ان دى حاجة كويسة..معناها انهم ابتدوا يعرفوا ان فى ناس عايزة تغير..و مش بس عايزة..قادرة..و ده الاهم لان كل الناس من جواها عايزة التغيير ييجى حتى لو ما كانوش بيقولوا كده..بس مش كل الناس بتاخد خطوة عشان ده يحصل..كونهم يقلقوا كده من جمعية خيرية لا ليها هدف فى سلطة ولا فى حكم دى خطوة مش وحشة ابدا

انا المتشائمة بقى شايفة ان مافيش فايدة..مش هيسيبوا حاجة محترمة تحصل فى البلد دى..هم عايزين شعب جاهل تقوم انت تيجى و بكل بساطة و تقول هعلمه..و حتى لو كان فى ناس عايزة تعمل حاجة فده لوحده مش كفاية..و الدليل اهو حملة اتعملت و ناس اتحمستلها و اشتغلت عليها و قبل ما تكمل بخطوة هدوها على دماغهم
دلوقتى انا متاكدة ان المشكلة مش فى عمرو خالد..لو كانت اى جمعية تانية كانت هتتوقف برضه
الفكرة بس فى ان عمرو خالد قدر يحرك عدد كبير من الشباب اللى عايز يعمل حاجة و مش عارف يبتدى منين

مفيش حاجة هتتغير طول ما نفس الناس قاعدين فوق دماغنا..
شفت حمدى قنديل لما سأله عمرو اديب مين رئيس مصر القادم..قاله فى 2011 و فى 2016 الرئيس حسنى مبارك ان شاء الله
على 2021 بقى نبقى نبتدى نفكر نغير..

شكل انا المتشائمة هى اللى هتكسب المرة دى..سلملى على ماجا كتير كتير :)

العلم مش عايز يتشقلب..العلم عايز يتقطع فوق دماغهم بحزبهم الفاكس و دماغتهم التعبانة و امانة سياستهم اللى لا تمت للامانة بصلة و جمال مباركهم و عزهم و صفوتهم و مفيدهم و سرورهم و حبيبهم و جملهم و هلالهم..

بالنسبة لفيروز بقى..فا ايه الكروتة دى؟!:D
دى عايزة موضوع لوحدها يا كوبرى بعيد عن جو الاحباط ده

enjy يقول...

من غير مصاريف ولا سنت واحد؟؟؟ العملة دى عندنا؟؟ احنا معندناش سنت فى ثقافتنا......المهم انا معرفش حاجة عن سبب ايقاف الحملة بس طالما فى ايمان قوى كدة بالقضية يبقى كان لازم تقاوموا اكتر من كدة الامن مش هيعرف يسحل الاف الناس المفروض ان انتوا مجموعة كبيرة محدش يعرف يوقفها ولو سحلوا شوية منكم مش هيعرفوا يسحلوكوا كلكم....يللا اكيد الحملة هترجع بس لو كان فى ايمان حقيقى بيها منكم

Here i'm يقول...

الحياه ..

بتفكرنى بكلام واحد صاحبى مش حقول أسمه

بس هوا نفس كلامك بالظبط كده .. و كان الأكونت بتاعه فى الأول أسمه الحياة ..

تعرفه ؟؟ :D

Here i'm يقول...

أبن الوليد ..

كلامك حلو قوى .. هوا فاكرين أنهم لما يمنعوا الحملة احنا حنسكت و حنفكنا ..

ميعرفوش اننا بنشتغل بأقتناع مش بغسيل دماغ ..

كان لازم أقول لفيروز كل سنة و أنتى طيبة ... معلش بقى

منور بلوجى المتواضع

Here i'm يقول...

جدع حتى النهاية ..

تخيل بقى فرحتك دى زائد كم الدعاية اللى اتعملتلنا من غير ما يحسوا ..

عملولنا عاية من غير ولا قرش ..

بصراحة أحنا كلنا فرحانين علشان أساسا أحنا شغالين و مكملين .. فما بالك بقى بكم دعاية رهيب ..

Here i'm يقول...

سى جل ..

أحنا كمان كلنا كنا محبطين و زعلنين .. لغاية معرفنا أن دى مش نهاية المطاف و أننا كلنا مكملين .. يمكن حنكمل من غير اعلام و من غير شو أعلامى .. بس مش مهم .. المهم ان الحلم مش حيموت ..

ان شاء الله اللى جاى خير .. و زى ما قولت قبل كده أنهم سعدونا بطريقة غير مباشرة لو كانوا عرفوا كم الضجة دى حتحصل مكنوش عملوا كده :D

يالا أدينا بنتعلم من مصرنا الحبيبة

Here i'm يقول...

تورمنتا ..

كلامك كله صح .. أحنا عندنا فوبيا من الدين .. فى تخوف من أى حاجة فيها دين

على الرغم من أنهم جربوا عمرو خالد قبل كده و عارفين أنه مش من النوعية اللى بيخافوا منها ..

بس تعملى أيه للدماغ الناشفة ..

الحملة على فكرة مكملة فى كل الوطن العربى .. فى السودان و المغرب و الجزائر و اليمن ..

الناس كلها بتستفاد و أحنا رافضين المساعدة و الأستفادة من أى حد ..

ما يا تورمنتا صناع الحياة دى جمعيات أهلية مشهرة .. فى فى مصر أكتر من 25 جمعية صناع الحياة .. و فى فى كل الوطن العربى .. و فى أوربا أسمها رايت أستارت فونديشن .. أحنا مش بنشتغل من تحت السلم .. أحنا ورقنا كله سليم و شغلين صح .. بس مهما تقولى !

Here i'm يقول...

أنا حرة ..

داخلة برجلك الشمال أسكندرية أنتى :D

الحملة على ما أعتقاد فى القاهرة أتوقفت تماما .. بس احنا فى اسكندرية شغالين بس من غير اى أعلام و لا أعلان و شغالين تحت الجمعيات بدون أسم صناع الحياة :(


حاضر حسلملك على ماجا .. بس متنسيش أن الأفلام العربى اللى فى عالمنا السمسمى دايما بتنتهى بأنتصار الخير على الشر .. :D

بس الفيلم دا مستمر بقاله 26 سنة .. تفتكرى الـ fin بتاعته أمتى :D

شوفتينى و أنا بألطم فرنساوى .. أجنن

فيروز انا عايز اعملها بوست وهمى .. بس دا عايز وقت .. و فى الأخر أنتى حتكتبى كلمتين ببوستى كله .. يبقى بلاش :D

Here i'm يقول...

أنجى ..

تعبير من غير ولا سنت .. دا تعبير عام .. دايما بيستخدم فى الأفلام الأجنبى .. و أنا حقيقى دايما بقوله يعنى .. لو ضايقك .. فأننا نأسف للأزعاج ..

أحنا مش بتوع مظاهرات ولا طوب ولا مواجهات .. الفكرة أننا لينا حلم و شغل بنحب شغلنا يبان للكل .. شغلنا بان فى حماية ... و حيبان فى الحملة دى كمان .. بس ليه أساسا تحاربنا . لا قولنا حكم و لا سلطة و لا يحزنون .. يبقى ليه تحاربنا

Founoon يقول...

بلد فاشلة في كل شيئ الا انها تجهض الاحلام قبل ما تتولد

انا مش فاهمه ليه ولصالح مين

وقالك الشباب اللي ابصر ايه هو اللي يبني مش بيهد

طب فين يا عمنا !!! فين ؟

ظلمت فيروز لما حطيتها في الموضوع دا

بقى جارة القمر جنب جيران السو !

dr.lecter يقول...

ولا يهمك ياواد انا قلت لك ميت مره عاوزين دعم من جهات لها سلطه علي الحكومه زي اليونسيف بس يظهر ان الحكومه كانت كلمتها اقوي


جمال مبارك صدق او لا تصدق بادعيله

بس مش هاقولك بادعيله بايه خليها مفاجاه

la tormenta يقول...

اااه فهمت الحين

طيب يعني يا كباري خلاص مافي مخرج للموضوع ؟انتهى ؟!!!

mony يقول...

اول مرة اشوفكـ متعصب ومتنرفز..
اكيد انا واحدة من الناس مقدرة جدا لتعبكوا ف الحملة دية..
بس انت عارف شباب ايجابى..ودعاية لعمل خيرى من العيار التقيل..وتحريك مصر لخطوة ادام..لازم كل ده يموت..ده الطبيعى ف بلد ديموخرابى زى مصر..
سياستهم كده..عاجبك يبقى تحط لسانك جوة بقك وتخرس مش عاجبك يبقى تلم هدومك وعلى بلد تانية تكون فيها الحلم والطموح اللى بتقول عليهم
مصر يا سيدى الفاضل بلد معمرة بالسلبية والتشاؤم والباب المقفول..
يبقى ليه تلعب ف حاجة غيرك يا بابا:)
مش قادرة اقولك معلش...عارفاك مش بتحبها:)
بس كل اللى ااقدر تقوله"لكل مجتهد نصيب"
وربنا يعدى المحنة دى ع خير

ليا عتاب لو سمحت:)
حضرتك مش عجبانى الطريقة اللى قدمت بيها يوم ميلاد فريوز...نتعدل ها:)

اقصوصه يقول...

تدوينه جميله

استمتعت بقرائتها

بانتظار جديدك

تمنياتي بالتوفيق :)

Here i'm يقول...

فنون ..

حتى البناء أحتكاروه .. مش معقول مش شايفيين حد معاهم بيشتغل .. مش معقول ان اللى بيشتغل لازم يكون معاهم و بس .. و الله انا فى وقت معين كنت عايز اكون معاهم .. بس لازم اعترف ان فى غيرى شغال .. مش أنا بس اللى بشتغل .. سياسة احتكار حب مصر و بناء مصر .. سياسة فاشلة


فعلا و الله جارة القمر جنب جيران السو .. نأسف

Here i'm يقول...

دوكى ..

منتظر مفاجاة دعائك لجيمى !!

ما هما برضه واعيين .. مفيش حد من الحكومة لغى الحملة .. دا عمرو خالد اللى لاغاها .. أحنا منعرفش حاجة .. دا حيكون ردهم ..

Here i'm يقول...

تورمنتا ..

لا طبعا أكيد فى مخرج .. و أحنا شغالين على المخرج .. و عدينا كمان .. و شغلنا أن شاء الله حيبان ..

بس عارفة .. لما تكونى انتى صاحبة الفكرة و الفكرة بتشتغل فى الجزائر و المغرب و السودان و اليمن و بلدك لأ .. و من غير أسباب ..

ان شاء الله شغالين و أحسن من الاول كمان

Here i'm يقول...

مونى ..

لا مش معقول مونى عندنا .. أبويا الروحى فى كفاح لما كنا بنحارب الانجليز عند غريب فى السويس .. منورة يا حاجة :D

شويه متعصب و متنرفز .. انا الخبر أتقالى من واحد سيس و هوا بيضحك فى الموبيل و انا مكنتش عارف أرد .. قالى شوفت يا فالح مش قولتلك ..

ديموخرابى .. دا وصف رهيب .. بس مينفعش اعيش كده و عيالى يعيشوا كده .. حرام و الله نفضل كده سلبيين و هدامين ..

لا يا فندم حتعدل بس من غير ضرب وحياة بابا :D

Here i'm يقول...

أقصوصة ..

شكرا على ذوقك ..

و منور المدونة .. و كل سنة و انت طيب

mony يقول...

شويه متعصب و متنرفز .. انا الخبر أتقالى من واحد سيس و هوا بيضحك فى الموبيل و انا مكنتش عارف أرد .. قالى شوفت يا فالح مش قولتلك ..


ههههههههههههه..تحسه قاصد استفزازكـ..
"اعتذر عن فترة غيابى..لانى كنت ف فترة نقاهة" وشط أليط جدا:)

Here i'm يقول...

فترة تفاهة ..؟؟

ليه بس يا بنتى بس .. :D

أتلهى و روحى ذاكرى :D

la tormenta يقول...

أمريكا اللاتينية هي صاحبة الفكرةللأمانة بس
عمرو خالد اقترح انها تتعمل فمصر ..كان مفروض تكوم موجودة قبل عمرو خالد ..و مو شرط داعية ديني
ولكن مادري شلون الأمور تنتظم بحصوص عمرو خالد و اللي معاه حتى أصبح التنفيد موجود في بلاد تانية.. وهدا شي جميل زيادة الخير خيرين..
في المغرب فيه مؤسسة اسمها مؤسسة محمد الخامس تؤدي نفس الدور و بنفس المعنى و عندها نشاطات أوسع ومنظمة بشطل جيد من كم سنة
على العموم أتمنى فعلا انه الموضوع يتحل لانه مو زين انه فكرة متل هادي وراها ناس متحمسين و جاهزين و نتايجها مجربة ومضمونة يتم اجهاضها هكدا
الله يعين :)

dalia يقول...

كويس يا محمد انك عبرت بالقوة ديه عن رأيك في توقف حملة عمرو خالد بعكسى انا حسيت انى ضعفت قوى لدرجة انى مقدرتش اكتب حاجه خالص عارف لما الواحد يتصدم في اللحظة الاولى بيجيلوا شلل ، بس عجبنى انك ربط بين الخطابين ده دليل على انك متابع جيد للاحداث وتستاهل بجد انك تكون في صناع الحياة

relove يقول...

محمد
الحملة شغالة صح ؟
انا اتصلم بيا تاني
والمفروض حخلص امتحانات وانضم للحملة
طمني ياعم
ومش حقولك ليه مطنشني ولا كانك تعرفني
شوفت (مقولتش) ...!!
علي فكرة اغنية منير يا محمد
بتتكلم علي الموت
واسال شعب المنايرة كله
اللحاف اللي هو الكفن ...
ربنا يهون علينا وقت ما يتشد لحافنا ...

samamasr يقول...

البقاء والدوام لله يا محمد