الخميس، 26 مارس 2009

أمبارح و النهاردة ..


أمبارح ..

فى كل مناسبة عائلية ألاقى عمى و عماتى يحكولى أنا كنت بعمل أيه فى ولاد عماتى
بيقولولى كنت بستدرج واحد واحد تحت الطربيزة و أعضهم و أطلع قبليهم أعيط :D

النهاردة ..

وصل حجمـ أعمال الشركة 2 مليون و 500 ألف ..
و الشركة فيها محاسب واحد و مدير مالى واحد و operator واحد و سكرتير واحد و مندوب واحد
هو العبد لله :D


أمبارح ..

فاكر أول يومـ KG2 ..
بابا بيشتغلنى و جايبلى هدوم جديدة و كيس كبيييييييير فيه شيبسى و مصاصات و مستيكة و بسكويت و كل ما تشتهى انفس العيال :D
ماما بتمهد لبابا الطريق .. أيه رأيك يا محمد فى الهدوم الجديدة .. دى اللى انتى مختاراها أمبارح .. بتشتغلنى :D
بابا .. محمد لبس الهدوم الجديدة ولا لسه .. و انا فى سذاجة أيوا يا بابا :D
ركبنا تاكسى طلعنا على المدرسة .. بابا عمال يسرد مميزات المدرسة
أيه دا .. كل دا حوش حيلعب فيه محمد بهدومه الجديدة .. لا يا راجل :D
بابا بيسلمنى لوحدة طخينة .. يالا يا حمادة نلعب كورة .. :D
بدأ البكاء .. أنتهى اليومـ و أنا مش عايز أروح مع بابا من المدرسة :D



النهاردة ..

النهاردة أكملت الـ 24 سنة .. صحة و عافية يا عفروتو :D
24 عاما قضتها فى تراب المحروسة ..
تنقلت فى بيتين بس .. الأول كان فى الشاطبى و التانى دلوقتى فى القبارى
عيشت احلى أيامى فى القبارى .. مكنتش متخيل نفسى أنى من الشاطبى الحقيقة :D
مكنتش متخيل أنى أبقى قاهراوى ولا جيزاوى .. مفيش غير أسكندرية


أمبارح ..

أول صورة و أحنا كلنا فى KG2 .. جدى كان فرحان بيها قوى
جدى كان من الناس اللى لازم تقعد و فى ضهرها صف كتب غريب طويل عجيب
قالى تعالى هات القلمـ و تعالى أكتبلكـ حاجة ..

أخذت هذه الصورة للدكتور محمد محمود قبارى فى أولى حضانة فى المدرسة ..
الأسكندرية فى 9 / 1991

و كان كتبلى فى يومـ سبوعى ..

حبيبى و حفيدى الغالى الأستاذ حمادة .. أننى فى غاية السعادة أن أحضر حفل سبوعكـ الجميل
و عقبال عيد الميلاد ان شاء الله و اتضرع إلى الله ان يطيل فى عمرى و احضر زفافكـ
أرجو قبول هديتى المتواضعة ..
جدو قبارى صادق .. 6 / 4 / 1985

الراجل دا كان بيحبنى قوى .. أول ولد بقى و أول حفيد يشيل أسمه .. و للأسف أخر حفيد يشيل أسمه


النهاردة ..

جدى بقاله حوالى 8 سنين متوفى ..
كل شويه أروح قبره و أقوله أنا عملت لأيه و وصلت لأيه و اعتذرله أنى مطلعتش دكتور
كل ما أشد مع بابا .. أفتكر جدو .. مكنش حد يقدر يقولى بمـ لا بابا ولا ماما و جدو موجود
بفتكر هداياه و بابا نويل اللى جابهولى .. و صورى معاه
معشتش معاه غير 5 أو 6 سنين .. كفاية قوى أن فى أخر أيامه كان بيتسند عليا علشان يصلى الجمعة فى الجامع
بابا حكالى موقف .. ان لما كان جدو بيخطب يوم الجمعة فى المسجد و عيل عيط عياط رهيب
جدى كان حيقول ياريت الأطفال متتعبوهاش و خليهم فى البيت فأكتشف أن حفيده لسه مولود بقاله 10 أيام
و الأيام حتيجى و حيعيط فى الجامع ..

أمبارح ..

تفوق ملحوظ فى الأبتدائية و الاعدادية .. كان بيصحبه هدايا و دلع و فسح و خروج
كنت لما اجيب النهاية الصغرى .. هيا أسمها كده :D .. كان بابا بيرفض يمضى الشهادة و يزعل منى
ولا مرة سقطت أو طلعت بمادة او حتى جبت النهاية الصغرى غير مرة واحدة بس
لدرجة أنى كنت من ضمن الـ 3 اللى بيحيوا العلمـ فى الأبتدائى و الاعدادى


النهاردة ..

مش عارف أنجح و اخلص كليتى بعد عناء أستمر 7 سنوات فى كلية 4 سنوات
لدرجة ان بابا لما يعوز يمسك عليا حاجة يقولى اه ما أنت فى طب بقالك 7 سنين :D
مش عارف يمكن أكون فاشل أو غبى أو مش عارف كيف تؤكل الكتف ..
دى الحاجة الوحيدة اللى مبجبش سيرتها لما بقف قدامـ قبر جدى



أمبارح ..

كنت احدى لاعبى الباسكيت فى جمهورية مصر العربية :D
كان معايا كارنيه مكتوب فيه .. عضو الاتحاد المصرى لكرة السلة
كان سنى عملى مشكلة .. سنة 85 لما تتصعد للفرقة الكبيرة ..
بتتصعد على ناس أخدت خبرة و كفاءة ... بالتالى بتبقى قاعد أحتياطى طول السيزون
و تستنى السيزون اللى وراه .. علشان مبيبقاش فى غيركـ .. و تبقى الكابتن كمان :D
الدورة الوحيدة اللى كسبتها مع فريقى كانت بطولة رمضانية و دى اللى اتصبت فيها :D


النهاردة ..

بلعب بالعافية كل يومـ جمعة مع أصدقائى اللى كانوا معايا و بطلوا زيى ..
بنلعب ساعتين بعد صلاة الجمعة أو بعد العصر ..
أجمل ما فى اليومـ دا .. أستعادة الذكريات و الضحكـ و الهزار فى اللعب .. :D


أمبارح ..

كنت شاب مأنتخ فى البيت .. خروج و سهر لغاية الفجر و بعد كده نومـ لغاية العصر
مكنتش بروح الكلية غير أول سنة و مكنتش بطيقها من كم الفاكسين
كنت مقضيها مع صحابى يا أما خروج و سهر أيامـ الخميس .. يا أما تلفزيون و كومبيوتر قبل النت :D


النهاردة ..

بقيت شاب active لدرجة بتتعبنى قوى .. بس فرحان بيها قوى
لدرجة بتخلينى مدخلش البيت غير علشان أغير هدومى و أنامـ .. لا أكل ولا غدى و لا عشا
لدرجة أنى كنت بقعد بـ 3 أيامـ مشوفش بابا
وصلت لدرجة .. ان كان بيبقى عندى كورسين فى نفس المعاد فاصل بينهمـ ربع ساعة مواصلات
و محدش يقولى نظمـ وقتكـ .. دى كانت مترتبة ع الشعرة :D




أمبارح ..

فترة قبل الشغل .. روحت القاهرة مرتين .. مرة رحلة و مرة لعمتى فى مدينة نصر
لدرجة انى كنت حاطط عينى فى وسط راسى علشان متوهش


النهاردة ..

دلوقتى القاهرة بقت سفرية كل أسبوع و ممكن فى الأسبوع مرتين
أخر سفرية من الشيخ زايد لمحى الدين أبو العز لـ 6 أكتوبر للشيخ زايد لرمسيس
وصلت لمرحلة أنى مبقتش خايف .. القاهرة بقيت بالنسبالى عادى جدا

أمبارح ..

كنت بحلمـ باول صفقة اعملها و ازاى حيكون شكلها ..
و كنت دايما بجرى ورا أى خيط ألاقيه قدامى .. و كان بابا دايما يضحكـ عليا :D
فاكر اول بيزنس ليا .. مكنتش بسميه صفقة بس كنت بسميه تجارة
كنت بنزل فى معارض .. و كنت بناطح شركات كبيرة و تقيلة
بس الادارة كانت فاشلة و كمان كان فى شراكة .. بس اتعلمت و دا عندى بالفلوس كلها


النهاردة ..

و فعلا النهاردة بالذات .. 25 / 3 / 2009 .. تمت اول صفقة .. كانت صفقة ملابس :D
مش عارف ليه بالذات الصفقة تخلص يومـ 25 / 3 ..
الصفقة تمت براسمال 2000 جنيه و ربح 500 جنيه ..
الصفقة كبر قيمتها مش فى القيمة او الربح .. انا الحمد لله مش محتاج فلوس و شغال كمان
الصفقة قيمتها عندى كانها اول عيل فى عيالى :D


26 التعليقات:

mUsLiM يقول...

ربنا يكرمك يا حبيبى ويباركلك فى عمرك،،

وأسأل الله أن يرزقك العمل الصالح الطيب

بس انا عاوز اقولك حاجه نصيحة من أخ ليك ،،

متتكلمش كتير يا قبارى لأن اللى بيتكلم كتير مبيعملش حاجه ،،

واوعى تقول لنفسك وتفهمها انك نشيط وحلو وايحابى بسم الله ما شاء الله

ياما عرفت ناس بيتكلموا كتير وفيهم نفس النشاط والايجابيه اللى فيك ولا حققوا ولا هايحققوا حاجه

لو انت فعلا عاوز تعمل حاجه لدينك وبلدك ومجتمعك بلاش كلام كتير وصغر نفسك قدام نفسك وحمـّل على نفسك ، والنفس كل ما هاتحمل عليها هاتديك وتستحمل

لكن هاتسيبها كده وتريحها هاترتاح منك على الآخر ،،

وأهم شئ فى طريق النجاح الطاعة ، لأن ما عند الله لا يؤخذ إلا بطاعته جل وعلا ،،

ومش مهم امبارح والنهارده ، المهم بكره وبعده وبعده

وهكذا هم أهل الهمم العالية لا ينشغلون إلا بالمستقبل الموعود،،

وربنا يكرمك يا حبيبى ويباركلك

ونسألكم الدعاء

وياريت الحاجه متنسناش برده :))

ولا مش بتفكرها :)

السلام عليكم

Mohammed يقول...

ربنا يكرمك يا حبيبي ويديك طول العمر
واحفادك يقولولك يا جدو كدة بعد كام يوم
ربنا يعلم اني بحبك اوي يا محمد
ربنا يكرمك يارب ويجعل النجاح من نصيبك

غير معرف يقول...

ربنا يوفقك يا محمد:)

dr.lecter يقول...

ياعم ياعم امسك الخشب بجد ههههههههه

تعالي يااض عند فله احنا عاملين الموضوع لمين لنفسنا ولا ايه

وهات معاك فنون علشان هي مختفيه برده

~ Heba ~ يقول...

الف مبروك وربنا يوفقك كمان وكمان يارب :D

احنا كدة نخاف نحسدك ونخاف عليك من الحسد

عشان كدة يامحمد ماتتكلمش كتير في الحكاية دي لان الناس عنيها وحشة والنجاح والله العظيم بيتنظر قوي .. وانت عارف قد اية الناس بتلتّ وتعجن كتير قوي وعنيها على الناجحين اللي زيك

فمش حتسلم من عنيهم وقرهم وحسدهم لما تقول عملت وسويت ونجحت

والكلام عام طبعا مش بخص بيه اي حد

مش عارفة كلامي مظبوط ولا صح ولالا بس خوف عليك

وبجد انا فرحانالك قوي قوي للي وصلتله وربنا يوفقك اكتر وتبقى اكبر رجل اعمال في مصر والعالم كمان :)

Here i'm يقول...

مصعب ..

كلامك حلو قوى و انا عجبنى كلامك و صدقنى حعمل بيه .. بس على فكرة انا قولت امبارح و النهاردة .. و انا من طبعى انى بقول انا عملت من باب اما بنعمة ربك فحدث و مبقولش حعمل بكرا ايه من باب استعينوا على قضاء حواجئكم بالكتمان ..

عجبتنى نصايحك يا مصعب ..

ربنا يكرمك يارب ..

Here i'm يقول...

ريلف ..

ربنا يخليك يا محمد يارب .. و انت عارف و الله انى بحبك بس الظروف و الله ملخبطة معايا و مش بعرف اشوفكوا خالص و الله .. مشغول قوى يا محمد و الله و انت عارف ..

ربنا يخليك يا أبو الرومانسية كلها :D

Here i'm يقول...

سما مصر ..

ربنا يخليكى يارب و يكرمك يارب

Here i'm يقول...

لاكتر ...

مسكت الخشب :D

انا لما عرفت كنت فى ذهول اساسا من الموضوع .. ربنا يخليكوا يارب .. ألف شكر يا جماعة

Here i'm يقول...

هوبا ..

ربنا يخليكى يارب .. و ربنا يديم المعروف

انا عارف و الله ان كلامك خوف عليا و انا بشكرك جدا عليه يا هوبا

و انا و الله بتمنالك السعادة و ربنا يكرمك يارب

leeno يقول...

كل سنة و انت طيب

ربنا يكرمك و يوسع رزقك

و ان شاء الله منها للي اعلى منها

الموضوع مكتوب بشكل رائع جدااا

انا نفسي ارجع البنت الاكتيف جداااااااا دي بقالي فترة مليش نفس لحاجة

على العموم مش عايزة اوجع دماغك

كل 25\3 و انت و عيالك :D بخير

la tormenta يقول...

هييييييييييه أنا جيت
انا واصلة من كم ساعة و جيت أشوف مدونتك ..مع العلم اني في بيت جدتي الحين وراح أغيب اسبوعين تاني ;)
حتى تعرف مقامك عندنا يا بو فهد :D
كل سنة و انت طيب
والله يعينك ..ماراح تشوف عينك غير الخير لأنك تستاهل و الله يحب الناس المجتهدين و اللي عندهم ارادة و اصرار
بالنسبة للجامعة ركز معاهم شوي حتى تخلص منهم و تاخد الشهادة
صحيح انه الشهادة مو مقياس لاي شي بس مهما كان راح تسهل عليك شي خطوات و تفتح لك أبواب يمكن بشكل اسرع
المهم لا تقارن بين اليوم و البارحة لانه أصلا انت الحمد لله و ما شاء الله عندك مخزون كافي للغد فما تتوقفش عند ايش اللي كان زمان..اللي جاي أقوى و أحسن ان شاء الله

la tormenta يقول...

ييييييييييي نسيت أقول مبروك على الصفقة ..أول الغيث قطرة برافو
عقبال لما نشوفك عملاق المال و الأعمال و السيجار في اليد و حركااااات :DDD
وماحد يقدر يكلمك..اييييييه الكبر لله :DDD

Here i'm يقول...

لين ..

و انتى بصحة و سلامة يارب ..

شكرا على كلامك يا لين ..

و ان شاء الله ترجعى Active اكتر من الاول كمان

و كل سنة و حعتبرها عيلتى مش عيالى :D

Here i'm يقول...

سوريزززززززززززا ..

أسكتى أنا قعدت أقول راحت فين البنت دى .. اختفت فين كده .. و لاقيتلك رد بتقولى فيه انك مسافرة ;)

حمد لله على السلامة المؤقتة و عقبال حمد الله عل السلامة كلها :D

الله يكرمك يا سوريزا .. و أنتى و الله أكيد عارفة غلوتك عندى قد أيه ...

و شكلك كده حتتضربى بسبب فهد دا :D

الشهادة موقفالى حاجات كتير قوى .. موقفالى تانى خطوة فى الـ career path بتاعى .. الله معين .. شوفتينى و انا بتكلم زيك أهو :D

بسم الله ماشاء الله .. عينى عليكى باردة .. نمسك الخشب ;)))

Here i'm يقول...

سوريزا تانى :D

حتصدقينى لو قولتلك أنه مش طموحى اكون بيزنس مان .. بس لو جات مش حقولها لأ أكيد :D

أهم حاجة السيجار دا :D

Fatma يقول...

كل سنةوانت طيب يا محمد

امبارح دا عيشناه عشان نعرف نعيش الجاي صح مش عشان يعطلنا

انا واثقة انك هتبقى حاجة كبيرة

طولة العمر ليك يا حج :)

Here i'm يقول...

فنووووووووووووون ..

و انتى بصحة و سلامة يا رفيقة عيد ميلادى :D

و الله شهر العظماء :D

أمبارح انا بكتبه علشان أشوف الفرق بينه و بين النهاردة .. بكرا و طموحات و افكار بكرا ليا أنا بس ..

طولة العمر يا حاجة :D

mUsLiM يقول...

اه يابنى نصايحى دى خلى بالك المفروض تبروزها عندك وتكتبها بمية الذهب

هههههههه

وبعدين مقلتليش ايه اخبار دعاء الحاجه انت ناسينى ولا ايه ياعم :))

ربنا يكرمك يا ابو فهد

هههههههههههههه

ويوسع رزقك آميــن

يلا أسيبك انا بقى

السلام عليكم

la tormenta يقول...

خلاص يا كباري
من اليوم و طالع أقصد من 25 مارس
انت بو فهد :DDDDDD
خلاااااااااااااااااص
ماكو فكة
ههههههههههههههههه
الشعرتين اللي باقيين براسك ممكن تشدهم الحين يا...بو فهد :DDDD
و بالمرة شجع معاي المنتخب السعودي (و أنا أساندك يوم ماتش الجزاير)

ييييييييييي ماقلت لك اني انا من اليوم قررت ما شجع غير الخليج و بسسسسسس
المغاربة 3/4 ما عندهم أصل ..أنا أدافع عنهم و ألمع صورتهم الخايسة و في الاخير يطولون لسانهم علي!!!!!
يله..ثرثرة خارج النص عفوا:D

جعل الله أيامك كلها أعياد و فرحة و نجاح دوم ان شاء الله :)

Superman يقول...

لسه قاري البوست ده دلوقتي..
ياريتي شفته قبل ما نتقابل إمبارح :D

جامد اوى الاسلوب بتاع السرد..واضح انك ادمنت الفلاش باك و الرجوع..

يلا..عقبال 100 سنة..و صفقات كتير..
و تفتح قباري جروب..و تعمل مسلسل "قباري"..
و يعمل دور البطولة نور الشريف برضه..
و يطلع يقول "انا محمد قباري..انت مين؟" :D

Here i'm يقول...

مصعب و سوريزا ..

أختلفتوا على كل حاجة و اتفقتوا على فهد و أبوه :O

ملقتوش غيرى اللى تتفقوا عليه .. ماشى ماشى جميل قوى الكلام دا :D

صبرا جميلا :D

Here i'm يقول...

سوريزا تانى :)

لا بقى على فكرة انتى اللى غلطانة .. نينا مقصدتش حاجة خالص على فكرة ..

هى كانت بتهزر مع صحابها علشان عارفهم من زمان على ما اعتقد

و انتى روحتى داخلة فيها شمال :D

بس عجبتينى و انتى بتدافعى عن المغاربة فكرتينى بيا لما كنت بتخانق علشان مصر :D

Here i'm يقول...

سولتو ..

مش بقولك خبرة يابنى :D

علشان تعرف بقى .. شوف تاريخ البوست و شوف معاد ما اتقابلنا أمتى .. علشان تعرف انى انفع فى التجارة ;)


لا لا لا دالى مين دا الفاكس الظالم :D ... قول نجيب ساويرس ولا حاجة :D

الجواز و سنينه يقول...

انا نادر كده ما بقعد اقرأ بوستات طويله إلا إذا كانت مميزه
انا قريت البوست ده و اللى بعده كمان
بجد ربنا يكرمك و يتم عليك نعمته
انت لسه صغير و الدنيا قدامك ان شاء الله
ربنا يرحم جدك
بجد اثر فيه اوى
تحياتى

Here i'm يقول...

الجواز و سنينه

ربنا يخليكى يارب و رأيك أسعدنى قوى و زيارتى اسعدتنى أكتر و اسمحيلى انط عندك فى البلوج :D