الخميس، 16 أكتوبر 2008

للرجال فقط ... قصدى للخنازير فقط

كنت ناوى أعمل بوست عن فيلمـ If Only ..

و رمانسيته و فكرته اللى شدانى قوى

كنت ناوى أعمل بوست عن معرض BlueXpo التركى ..

و فكرة تسويق المنتجات التركية و الحجاب التركى ..

كنت ناوى أحط صور يومـ كان لذيذ قوى مع بنات أمريكيات

بتدرس العربى فى جامعة أسكندرية و أزاى مهوسين بحاجة اسمها مصــر

قلت معقول حتكلمـ عن الرومانسية و التجارة ..

و البلد كلها بتتكلم
ـ عن التحرش و اللى بيحصل

فكرة بوستى فى الصورة ..
أحترمـ نفسكـ .. اه هيا بتتكتب كده .. أحترمـ نفسكـ

لا هوا أنجليزى ولا هيا فصحى ولا حتى يونانى .. دى بالعامية

أحترمـ نفسكـ .. بقولها ليا و لكل شاب و راجل و عجوز و عيل كمان ..

ما نحترمـ نفسينا بقى شويه ..

لا متقوليش كلامـ من نوعية أصلها أتحرشت بيا الأول

أفرض ياسيدى أنها كانت ماشية عريانة ف
ى الشارع ..

هل دا يديكـ الحق أنكـ حتى تلمسها ؟!!!

و بعدين كل البنات صايعة و قلة الأدب .. أنت كمان قليل الأدب !!



أنا شايف أننا أحنا الشباب اللى السبب فى التحرش من الألف للياء ..

قولى بقى أصل الجواز .. أصل مش عارف ايه التلفزيون و ميلودى

أصل أنا شوفت هيفا و اليسا لابسين كذا ..

أصل أنا شباكـ قوضتى بيطلع على حمامـ نانسى ..

من الأخر و أنا و انت عارفين .. أنكـ ملكش مبررات يا برنس ..



لو راضى تكون مكان الراجل دا فى الصورة .. يبقى أقفل مدونتى و متجيش تانى هنا

لو مش عارف تشوف نفسكـ كده . علشان مكابر و شايف أنه حق ليكـ

أسمحلى أقولكـ أنكـ كده .. اه أنت عبد لجسمـ أى بنت ..

لما تقعد تحومـ و تلف حوالين البنت و مش ناقص غير أنكـ تهوهو ..

يبقى أنت عبد ليها و لجسمها و مش بعيد جزمتها

لما تأمن على كل اللى حواليكـ علشان محدش يشوفكـ ..

و عارف أن فى ربنا شايفكـ و عارف أنت بتهبب أيه ..

يبقى أنت عبد ليها و لجسمها و مش بعيد جزمتها

لما ترخص نفسكـ .. بعد ما وصفكـ ربنا بأنكـ أقومـ من المرأة بما فضلكـ به الله ..

يبقى انت عبد ليها و مش بعيد جزمتها كمان





فككـ من الكلامـ بتاع مامتكـ و أختكـ و و البوقيين الحمضانين دول ..

بما أننا دلوقتى بقينا بنخاف على موزتنا أكتر من أخواتنا و أمنا ..

لو تضمن أن مراتكـ .. أو أنتيمتكـ .. أو حبيبتكـ ..

مش حتروح السوق .. أو تمشى فى الشارع .. أو تركب اتوبيس .. أو تشتغل

يبقى أحب أقولكـ .. أتحرش بكل بنت تشوفها

أتحرش ما أنت مفيش نخوة ولا دمـ و لا أحساس و لا غيرة ..

ما أنت خلاص متفرقش حاجة عن الخنزير ..

و لو تسمح متكملش البوست للأخر علشان الجزء الجاى بتاع الرجالة بس ..




للرجال فقط ..

دى حملة لجمع مليون توقيع لدعمـ مطالب أمى و أمكـ و أختى و أختكـ و مراتكـ و مراتى

بقانون يحميهن من التحرش ..

الحملة دى من 2005 .. أخر تحديث ليها فى 6 / 2008

لينكـ تحميل العريضة للأسف مش شغال ..

بس دا لينكـ

المركز المصرى لحقوق المرأة


الرهان فى موضوع التحرش فى وجه نظرى مش قانون ولا نقاب ..

الرهان فى الراجل المصرى فقط لاغير ..







17 التعليقات:

Yasmine يقول...

اكتر حاجة عجبتنى انك فهمت الهدف من الصورة اللى انا حطيتها

بس عارف..بيتهيألى ان اللى بيعمل كده مش بيهمه انه يكون مكان الراجل اللى فى الصورة ده لانه ما يفرقش حاجة عن اللى بتمثله..كلب جعان مريض لدرجة تخليك تشفق عليه و تبقى عايز ترميله اى حاجة و انت معدى

تخيل نفسك مكان اى بنت مرعوبة تنزل الشارع..بتمشى تقول اذكار و ادعية و هى بتترعش و بتتلفت حواليها زى ما تكون هى اللى عاملة عملة..بالذمة دى حياة طبيعية لما يبقى مشوار للكشك اللى تحت بيتى مغامرة

ده غير كم الكلام الواطى اللى بنسمعه..لا يمكن تتخيل بيوصل لايه مهما حاولت
و الموضة الجديدة بقى التصوير..اه والله بنتصور فى الشارع تقولش كائنات فضائية مثلا ولا من الاثار

الحل فى احترم الست مش عافة مين الحمار اللى فهمهم ان الست دى مستباحة للدرج دى..لما يتعلموا يحترموا ادمايتنا ممكن ساعتها يكون فى حل

Desert cat يقول...

بصراحة بوستك بعتبره معجزة حقيقية لأن الولاد حتى المدونين اللى المفروض انهم فئة مثقفة يلقوا اللوم جميعهم على البنات
ويقولك اصلها بتترحش بيا بلبسها
واصلها نازلة الشارع علشان تتعاكس
فى الحالة دى اهديه كل حرف فى بوستك القيم
مودتى

انـــــســــــان يقول...

السلام عليكم

اخى العزيز قبارى احب بجد اهنيك على مدونتك الجميله واقولك يا بختك بيها وعلى فكره ميرسى اوى على ردك فى مدونتى وبجد نورتنى ..

ReEm يقول...

والله قولتها مرة بقى في كل حاجة الغلط

على البنت لحد ما بقيت بحس الرجل كانه

... و الشهوة ملبساه الطوق حول رقبته

و سايقه و مش بعمم طبعا لكن كنت غلط

برضو و قالو ازاي البنت هي السبب

مع انه المفروض الراجل يغلب عليه العقل

بس شكله واخد اجازة طويلة

بوست عظيم اتقال فيه كلمة حق فعلا

Here i'm يقول...

بنت مصرية ..

مشكلتك الأزلية أنك بتشكى فى قدراتى الخارقة :D


اللى بيعمل كده مش شغله حاجة غير أنه يجرى ورا شهواته لغاية ما حتوديه فى داهيه ..

بصراحة أنا بشفق عليكوا .. كتير بيصادف ان بنت تركب جانبى .. و بتكون مرعوبة منى لدرجة بتقلقنى .. ببقى عايز اقولها و الله مش حعملك حاجة علشان انا عارف نفسى .. بس بترسى على أننا بنسيب نص الكرسى بتاعنا فاضى ..


الحل فى أن كل راجل لازم يعرف أن كل بنت فى اشارع مسئولة منه ..

Here i'm يقول...

قطة الصحراء ..

منورة المدونة ..

البوست مش معجزة .. الكلام دا بيتقال كتر وسط أصدقائى .. و بتكون الفكرة انى ححترم نفسى .. بس بتقف على أنى مش بقول لحد ..

ناس كتير قوى شايفين زيى ان لعيب فى الراجل .. بس محدش بينشر الفكرة دى ..

فى حد قالى .. انت كاتب الكلام دا لمين .. ما انا عارفه .. دا يوصل للشارع أولى ..

Here i'm يقول...

محمود ..

منور يا كبير المدونة كلها ..

شكر على أيه بس يا عمنا ..

انت كمان مدونتك حلوة قوى .. و كتاباتك احلى

Here i'm يقول...

ريم ..

و الله فى ناس كتير لسه عندها عقل .. بس الفئة اللى مبوظة الدنيا هما الفاكسين اللى منتشريين..

تشبيهك حلو قوى و صح قوى و فى نفس الوقت قاسى قوى.. بس قاسى على اللى عارف نفسه كده

دايما بتنورينى

Unknown يقول...

مش عارفه أقول غير تعظيم سلام

خالص إحترامي

ياسمين

الشارده يقول...

بقالنا سنين بنقول الكلام ده
بس مفيش حاجه بتحصل
للاسف كانك بتخبط دماغك فى الحيطه

Here i'm يقول...

ياسمين ..

منورة مدونتى .. سعيد جدا بتعليقك .. و كويس ان البوست عجبك

Here i'm يقول...

الشاردة ..

أحنا أتعودنا على كده ..

مشكلة العشوائيات محدش أنتبهلها غير بعد الدويقة ..

التحرش كمان كده .. بس ربنا يستر أحسن نبقى بنضرب دماغنا فى الحيطة

Superman يقول...

علي فكرة المعاكسات و التحرشات مابتضرش البنت بس..
دايمآ و احنا صغيرين كانوا بيقولوا لنا لو ماشي مع بنت و اتعاكست اوعي تتخانق عشان ماتجيبلهاش الكلام..
يعني احنا كشباب لو واحد فينا ماشي مع اخته..خطيبته..زميلته..صديقته..
اي مسمي لبنت يعرفها..و سمع معاكسة لها..الاحساس بيكون بشع..
البنت بتتعاكس و كمان ماتقدرش تتصرف..

لازم يكون في توعية للأطفال من صغرهم..عشان وقت لما يكبروا مايبقوش مسعورين زي الكلاب الضالة و بيجروا ورا اى حتة لحمة!

Here i'm يقول...

ما دى المصيبة يا سولتو ..

أننا خلاص فقدنا الأمل فى اللى موجود و بنقول اللى جاى هوا اللى يعدل الحال ..

كلامك كله صح ..

كل سنة و انتى طيبة يا سولتيا :D

The Seagull يقول...

أحب أحييك بجد على البوست الهايل ده .. بجد احترمت كلامك جدًا :).. بس للأسف مين يسمع ومين يفهم!!

تقبل مروري

Here i'm يقول...

سندريلا ..

شكرا قوى على كلامك .. و على رايك مين يسمع ..

كالانيختا سندريلا :D

leeno يقول...

مع احترامي ليك

مقدرش اقول حاجة تاني