أسبوع .. .. !

الأسبوع العربى بيبدأ من الجمعة ...

الأسبوع الفرنسى و اليونانى بيبدأ من الأتنين ..

أسبوعى أنا بيبدأ من الخميس ..



الخميس .. 9/ 10




يومـ عمل شاق .. زى أى يومـ خميس عندى

قبض عمال .. مرتبات .. عروض اسعار ..

أنتهى يومـ الشغل .. و بدأت الأجازة الأسبوعية ..

روحنا على محطة الرمل .. قعدنا ع القهوة شويه .. كان كله ضحك

بس دا الطبيعى يعنى .. مكنش مبسوط من اليومـ ..

كنت طالب من ماجا الـ IT بتاعى .. فيلمـ If Only ..

قالى انا نزلته و هات الفلاشة .. و كان الفيلمـ دا أجمل حاجة فى اليومـ ..

و أنتهى اليومـ كعادة يومـ الخميس بصلاة الفجر و النومـ ..

بعد مباحثات طويلة مع الزعيمـ .. حول كيفية أيقاظى يومـ الجمعة للفطار و الصلاة

و كان الحديث بيدور فى نطاق .. بكره بالجزمة :D





الجمعة .. 10 / 10



كان لغاية الساعة 12 بالليل .. كان يومـ عادى جدا ..

قابلت خليل .. و أحنا الأتنين بنبقى أجازة السبت .. يبقى مينفعش ننامـ زى الكتاكيت بدرى

قررنا ندخل السينما .. روحنا عند السينما ..

لاقينا الزمهلوية .. شبه منحرف .. أخر كلامـ .. زى النهاردة ..

قولتله أنا مش حدخل الحاجات دى أبدااااااا .. قالى ندخل أجنبى .. قولتله فل

و احنا بنتفرج على الأفلامـ الأجنبى .. الدنيا بدات تشتى ..

و دا كان اول يومت مع الشتا .. و لما يجى الشتا ..

تيجى سيرة بحرى و القلعة و الكسكسى و امـ على .. أنطلقنا على بحرى ..

روحنا أكلنا أمـ على و كسكسى .. انا أكلت امـ على و خليل ضرب كسكسى ..

طلعنا على القلعة .. و كانت فاضية و الدنيا بتشتى و البحر كان عالى .. و قمة الروعة

قبلنا هناكـ حد بيدعى أنه ساحر .. و راجل بتاع شاى ماشى يقول دا فاشل دا شيطان

الدجال او الساحر .. مسكوا و قاله تعالى انت بقى و أشتغله شويه

و الراجل اللى كان عامل فيها فلوط .. كان بيرتعش من كتر الخوف :D

و كان فى شاب مصرى شكله هوا و أبنه انهمـ عايشين برا مصر ..

الراجل دا ضحكت كمية ضحكـ مكهولة .. أحنا كنا بنضحكـ على ضحكه و الله مش من الموقف ..

صادف أننا و أحنا ماشيين من بحرى الراجل دا ركب معانا ..

فحكلنا أنه عايش فى هولندا و معاه الجنسية

و بيوصينا .. لو جاتلكـ فرصة برا مترجعش .. قولتله أنا بنصحكـ أنت مترجعش :D

و كان بيتكلمت ان هولندا حلوة قوى .. و أزاى أنه بقى بيشوف اليونان دولة من الدرجة الثانية

روحنا .. و كالعادة كان عندى مباراة مع الزعيمـ .. أنا أتسحب و أنا بفتح الباب ..

و هوا نايمـ نص نومة .. و أنا بقفل الباب .. لاقيت حد بيقولى ..

أتفضل يا بيه .. أتفضل يا باشا .. قولتله ألف شكر يا فندمـ :D






السبت .. 11 / 10



كان أول يومـ أقابل فيه البنات الأمريكيات ..

اللى بيدرسوا عربى فى كلية الأداب جامعة الأسكندرية

قبلتهمـ قبل كده فى رمضان .. بس مكنتش حاططها فى حساباتى

مكنتش أخد أنطباع جميل قوى عنهمـ .. بمعنى أصح كنت متحفز فى لقائهمـ ..

عجبتنى بساطتهمـ فى لبسهمـ قوى .. عجبتنى تلقائيتهمـ فى الكلامـ ..

بيهزروا كتير .. و مش بيزعلوا من الهزار أو رخمين .. لا بالعكس كانوا لذاذ قوى ..



الأحد ... 12/ 10



اليومـ دا كان فرمـ .. كان الصبح شغل لغاية 4:30 ..

و بعدين ميتنج الحملة الساعة 5:00 و اتلغى الميتنج

و بعدين كورس الـ HR من الساعة 6:00 لغاية الساعة 10:00

أول يومـ أروح فيه بدرى من كتر الهدا ..



الأتنين .. 13 / 10


بداية كورس اليونانى .. و التحفة الأغريقية " أيوانة " ..

حاجة كده أسكندرانية جادعة تحمل الجنسية اليونانية

و بداية النطق اليونانى .. لغة جميلة قوى .. انا فرحان بيها قوى

و بعد كده طلعنا على كارلوس كافية .. و قابلت البنت الأمريكيات ..

المرة دى ركزت فى أساميهمـ .. Molie .. Anaa .. و بنت مش فاكر أسمها :D



الثلاثاء .. 14 / 10



اليومـ دا كان من أجمل أيامـ الشغل .. كنت مستنيه ..

كان معرض BLUEXPO معرض تركيا العائمـ ..

فكرة المعرض دى بتدور فى سفنتين من تركيا حيلفوا مصر و ليبيا و تونس و الجزائر

علشان يقابلوا رجال الأعمال العرب فى مجال الأنشاءات و الماكينات ..

عجبتنى قوى الفكرة التسويقية للمعرض ..

لو انت متعرفش عن صناعتى و بلدى أى حاجة .. أنا مش حستناكـ تجيلى ..

لا أنا اللى حجيلكـ .. و بعدين مش حجيلكـ بشويه Data sheets ..

لا دا أنا جايلكـ بمعدات و ماكينات و بتجارب ..

و احنا ماشيين فى المعرض .. ماشى مستغرب .. أنا مش فى معرض تركى ..

انا فى معرض ألمانى .. معقول دى تركيا ..

معقول الأنتاج دا كله تركى ..

شدنى قوى حجاب البنات التركية المسلمة ..

سألت واحدة عن حجابها و قالتلى أحنا المحجبات مش بنلبس بنطلونات خالص ..

يمكن الجيبات مكنتش طويلة قوى و مش قصيرة قوى ..

بس الفكرة أنهم عرفوا يعنى أيه حجاب ..

الحجاب مش بنطلون جينز أسترتش معلش مش عارف أسمه البتاع دا :D ..

بعد الشغل روحت البيت و اتغديت

و طلعت قابلت صحابى على القهوة .. قعدنا و ضحكنا شويه و روحنا



الأربعاء .. 15 / 10



خلصت شغل .. قابلت أسماء و روحنا اتغدينا فى جاد .. كان الأكل تحفة الحقيقة

بعد كده طلعنا على كورس اليونانى .. خلصنا الكورس و قابلنا الأمريكيات و روحنا كارلوس

المفروض اننا حنطلع عليهمـ أسماء عربى .. كانت Anaa شعرها صغير قوى

و كانت بتقولى انت لو شوفتنى من شهر كان شعرى زي شعركـ ..

بعد بحث و تنقيب فى الشخصيات الكرتونية ..

كانت .. صلعت .. شخصية طلعت زكريا فى سوبر هنيدى :D



الخميس .. 16 / 10



كان يومـ شغل فرمـ .. بحس أنى مش بشتغل غير يومـ الخميس أساسا

جاتلى رسالة و أنا فى الشغل من مصعب .. محمد انا فى أسكندرية لو ينفع نتقابل كلمنى

كنت عايز أشوف مصعب قوى .. نفسى أشوف العقلية دى ..

بس للأسف .. مصعب جاه فى يومـ بيبقى مفرمة بالنسبالى ..

كلمت مصعب الساعة 8 و قولتله انا لسه واصل بيتى ..

قالى و انا رايح أركب و أطلع على القاهرة

كنت زعلان قوى انى مش حقدر أشوفه ..

بجد يا مصعب كنت عايز أشوفكـ و الله ..

جالى تليفون الساعة ..

أحنا فى حفلة ختام مهرجان مونت كارلو الدولى فى مكتبة أسكندرية

الحفل كان غريب شويه .. شاب سورى مع فرقته قاعدين و بيغنوا بالعود قصايد .. كانت جميلة الحقيقة

فرقة من تونس .. بنت بتغنى تونسى .. من صعوبة كلماتها قولت دى سعاد ماسى نعمة :D

فرقة من الجزائر ... شاب جزايرى مش بس بيغنى جزايرى ..

لا دا بيغنى قبيلى .. ولا كلمة فهمتها و الله العظيمـ

كانت المذيعة عايز تعمل معاه أنترفيو قالها مش بتكلمـ عربى :D

و فى الختامـ كان فريق وسط البلد .. الأمريكان كانوا مبسوطين منهمـ قوى ..

بعد الحفلة طلعنا على القهوة قعدنا شويه و بعدين طلعنا على " عبده تشكيلة "

عبده تشكيلة .. من أشهر محلات الأكل فى أسكندرية .. محل سوبر ماركت .. بيعمل شويه أكل تحفة

السندويتش بيبقى حلو قوى .. بس اللى يشوف و هوا بيعمل السندويتش ميكلش منه حاجة :D

هو طريقة السندوتشات معفنة .. بس ممتع الحقيقة :D

بعد كده روحنا فى مشروع اللى هوا الميكروباص كان من نوعية Tata

حاجة كده من قديمـ الأزل .. مكنش معانا ولا عربية و كانت الساعة 3:30 الفجر و دا فاضى

أول ما ركبناه حسينا أن فى ريحة حريقة :D

المهمـ .. روحنا و كالعادة بدأ مسلسل الفر و الكر من الأسد اللى فى البيت عندى :D

و على رأى طلعت زين فى فيلمـ أفريكانو ... أن الأسد لا يأكل ألا كل خمسة أيامـ

بما مسكنى اليومـ دا و أنا بفتح الباب .. زعيمى أزيكـ تصبح على خير .. بس :D






الجمعة .. 17 / 10


أكتر يومـ تعبت فيه من كتر الترفيه :D

نزلت من بتنا بعد صلاة الجمعة الساعة 2 كان عندى كورس يونانى ..

خلصت الكورس طلعت على كارلوس كافيه اتغدينا و قعدنا هناكـ لغاية الساعة 12:00 بالليل ...

عرفت أن عيد ميلاد سولتو النهاردة .. روحت مع يوسف جبنا التورتة و الفومـ ..

الفومـ .. فكرة يوسف الصياد الشيطانية

طلعنا على المعمورة .. الساعة 1:00 .. أحتفلنا بسولتو .. مثل أحتفال الأبطال عند الهزيمة :D

كان عيد ميلاد لذيذ قوى .. كانت المعمورة متألقة .. كانت فيها أعداد خفيفة جدا جدا ..

كان معانا أمجد بيه .. و حد طيب قوى ..

كل سنة و انتى طيبة يا سولتيا :D

مشينا من المعمورة الساعة 4:15 .. و صلت بيتى على صلاة الفجر ..

لو طلعت و اتوضيت بابا حيصحى .. أتوضيت و صليت فى الجامع ..

روحت البيت و مسلسل الكر و الفر أبتدى .. قلعت هدومى و غسلت وشى و نمت

و بابا صحى من هنا .. دخل الاوضة يبص عليا لاقانى نايمـ .. و أنا بضحكـ فى سرى

تانى يومـ بيقولى انت جيت أمتى .. كنت سائل ماما بابا أنامـ امتى .. قالتلى نامت الساعة 3:30

قلتله انا جيت 3:45 .. قالى يا أبن الكلب :D .. قالى عمكـ راح القاهرة و جاه و انت لسه مرجعتش البيت :D



السبت .. 18 / 10


اتغديت اليومـ دا فى البيت ... علشان مزعلش الزعيمـ ..

و بعدين طلعت على كارلوس كان معانا Emile اتكلمنا فى كل حاجة ..

قالتلى أنها شغالة فى مكتبة أسكندرية محرر فنى ..

اتكلمنا عن الأنتخابات الأمريكية .. و قالتلى أنها مع أوباما .. و أنهمـ بيكرهوا بوش جدا جدا

اتكلمنا عن العشاء اللى جمع ماكين و أوباما .. و أزاى ماكين باين عليه الأعتراف الضمنى مش الصريح

و أزاى ماكين غير فريق الدعاية كله .. و انه قال أن أوباما على بعد خطوات قليلة من مجد تاريخى ..

أتكلمنا عن مصر .. كانت بتقول أنها محبتهاش علشان القاهرة .. بس لما جات أسكندرية أتبسطت قوى

قولتلها أن انا لما بسأل عن مصر مش بسأل عن القاهرة .. علشان انا مواطن سكندرى

طلبت منى فانلة أبو تريكة فيها علمـ مصر علشان تديها لحبيبها لما ترجع أمريكا

قالتلى أنها راجعة تانى أمريكا و مش عارفة أذا كانت حترجع مصر تانى ..

قولتلها على مقولة اللى يشرب من النيل لازمـ يرجعله تانى ..

قالتلى دى حصلت معايا من سنتين و رجعت و درست العربى ..

مش عارفة المرة دى أيه اللى حيحصل :D

بعد كده مشينا و روحت لصحابى أتفرجنا على ماتش الأهلى فى القهوة ..

أتعشنا عند جاد .. و روحنا الساعة 12:30 .. و كان بابا فى ذهول :D