الأحد، 19 أكتوبر 2008

أسبوع .. .. !


الأسبوع العربى بيبدأ من الجمعة ...

الأسبوع الفرنسى و اليونانى بيبدأ من الأتنين ..

أسبوعى أنا بيبدأ من الخميس ..



الخميس .. 9/ 10




يومـ عمل شاق .. زى أى يومـ خميس عندى

قبض عمال .. مرتبات .. عروض اسعار ..

أنتهى يومـ الشغل .. و بدأت الأجازة الأسبوعية ..

روحنا على محطة الرمل .. قعدنا ع القهوة شويه .. كان كله ضحك

بس دا الطبيعى يعنى .. مكنش مبسوط من اليومـ ..

كنت طالب من ماجا الـ IT بتاعى .. فيلمـ If Only ..

قالى انا نزلته و هات الفلاشة .. و كان الفيلمـ دا أجمل حاجة فى اليومـ ..

و أنتهى اليومـ كعادة يومـ الخميس بصلاة الفجر و النومـ ..

بعد مباحثات طويلة مع الزعيمـ .. حول كيفية أيقاظى يومـ الجمعة للفطار و الصلاة

و كان الحديث بيدور فى نطاق .. بكره بالجزمة :D





الجمعة .. 10 / 10



كان لغاية الساعة 12 بالليل .. كان يومـ عادى جدا ..

قابلت خليل .. و أحنا الأتنين بنبقى أجازة السبت .. يبقى مينفعش ننامـ زى الكتاكيت بدرى

قررنا ندخل السينما .. روحنا عند السينما ..

لاقينا الزمهلوية .. شبه منحرف .. أخر كلامـ .. زى النهاردة ..

قولتله أنا مش حدخل الحاجات دى أبدااااااا .. قالى ندخل أجنبى .. قولتله فل

و احنا بنتفرج على الأفلامـ الأجنبى .. الدنيا بدات تشتى ..

و دا كان اول يومت مع الشتا .. و لما يجى الشتا ..

تيجى سيرة بحرى و القلعة و الكسكسى و امـ على .. أنطلقنا على بحرى ..

روحنا أكلنا أمـ على و كسكسى .. انا أكلت امـ على و خليل ضرب كسكسى ..

طلعنا على القلعة .. و كانت فاضية و الدنيا بتشتى و البحر كان عالى .. و قمة الروعة

قبلنا هناكـ حد بيدعى أنه ساحر .. و راجل بتاع شاى ماشى يقول دا فاشل دا شيطان

الدجال او الساحر .. مسكوا و قاله تعالى انت بقى و أشتغله شويه

و الراجل اللى كان عامل فيها فلوط .. كان بيرتعش من كتر الخوف :D

و كان فى شاب مصرى شكله هوا و أبنه انهمـ عايشين برا مصر ..

الراجل دا ضحكت كمية ضحكـ مكهولة .. أحنا كنا بنضحكـ على ضحكه و الله مش من الموقف ..

صادف أننا و أحنا ماشيين من بحرى الراجل دا ركب معانا ..

فحكلنا أنه عايش فى هولندا و معاه الجنسية

و بيوصينا .. لو جاتلكـ فرصة برا مترجعش .. قولتله أنا بنصحكـ أنت مترجعش :D

و كان بيتكلمت ان هولندا حلوة قوى .. و أزاى أنه بقى بيشوف اليونان دولة من الدرجة الثانية

روحنا .. و كالعادة كان عندى مباراة مع الزعيمـ .. أنا أتسحب و أنا بفتح الباب ..

و هوا نايمـ نص نومة .. و أنا بقفل الباب .. لاقيت حد بيقولى ..

أتفضل يا بيه .. أتفضل يا باشا .. قولتله ألف شكر يا فندمـ :D






السبت .. 11 / 10



كان أول يومـ أقابل فيه البنات الأمريكيات ..

اللى بيدرسوا عربى فى كلية الأداب جامعة الأسكندرية

قبلتهمـ قبل كده فى رمضان .. بس مكنتش حاططها فى حساباتى

مكنتش أخد أنطباع جميل قوى عنهمـ .. بمعنى أصح كنت متحفز فى لقائهمـ ..

عجبتنى بساطتهمـ فى لبسهمـ قوى .. عجبتنى تلقائيتهمـ فى الكلامـ ..

بيهزروا كتير .. و مش بيزعلوا من الهزار أو رخمين .. لا بالعكس كانوا لذاذ قوى ..



الأحد ... 12/ 10



اليومـ دا كان فرمـ .. كان الصبح شغل لغاية 4:30 ..

و بعدين ميتنج الحملة الساعة 5:00 و اتلغى الميتنج

و بعدين كورس الـ HR من الساعة 6:00 لغاية الساعة 10:00

أول يومـ أروح فيه بدرى من كتر الهدا ..



الأتنين .. 13 / 10


بداية كورس اليونانى .. و التحفة الأغريقية " أيوانة " ..

حاجة كده أسكندرانية جادعة تحمل الجنسية اليونانية

و بداية النطق اليونانى .. لغة جميلة قوى .. انا فرحان بيها قوى

و بعد كده طلعنا على كارلوس كافية .. و قابلت البنت الأمريكيات ..

المرة دى ركزت فى أساميهمـ .. Molie .. Anaa .. و بنت مش فاكر أسمها :D



الثلاثاء .. 14 / 10



اليومـ دا كان من أجمل أيامـ الشغل .. كنت مستنيه ..

كان معرض
BLUEXPO معرض تركيا العائمـ ..

فكرة المعرض دى بتدور فى سفنتين من تركيا حيلفوا مصر و ليبيا و تونس و الجزائر

علشان يقابلوا رجال الأعمال العرب فى مجال الأنشاءات و الماكينات ..

عجبتنى قوى الفكرة التسويقية للمعرض ..

لو انت متعرفش عن صناعتى و بلدى أى حاجة .. أنا مش حستناكـ تجيلى ..

لا أنا اللى حجيلكـ .. و بعدين مش حجيلكـ بشويه Data sheets ..

لا دا أنا جايلكـ بمعدات و ماكينات و بتجارب ..

و احنا ماشيين فى المعرض .. ماشى مستغرب .. أنا مش فى معرض تركى ..

انا فى معرض ألمانى .. معقول دى تركيا ..

معقول الأنتاج دا كله تركى ..

شدنى قوى حجاب البنات التركية المسلمة ..

سألت واحدة عن حجابها و قالتلى أحنا المحجبات مش بنلبس بنطلونات خالص ..

يمكن الجيبات مكنتش طويلة قوى و مش قصيرة قوى ..

بس الفكرة أنهم عرفوا يعنى أيه حجاب ..

الحجاب مش بنطلون جينز أسترتش معلش مش عارف أسمه البتاع دا :D ..

بعد الشغل روحت البيت و اتغديت

و طلعت قابلت صحابى على القهوة .. قعدنا و ضحكنا شويه و روحنا



الأربعاء .. 15 / 10



خلصت شغل .. قابلت أسماء و روحنا اتغدينا فى جاد .. كان الأكل تحفة الحقيقة

بعد كده طلعنا على كورس اليونانى .. خلصنا الكورس و قابلنا الأمريكيات و روحنا كارلوس

المفروض اننا حنطلع عليهمـ أسماء عربى .. كانت Anaa شعرها صغير قوى

و كانت بتقولى انت لو شوفتنى من شهر كان شعرى زي شعركـ ..

بعد بحث و تنقيب فى الشخصيات الكرتونية ..

كانت .. صلعت .. شخصية طلعت زكريا فى سوبر هنيدى :D



الخميس .. 16 / 10



كان يومـ شغل فرمـ .. بحس أنى مش بشتغل غير يومـ الخميس أساسا

جاتلى رسالة و أنا فى الشغل من مصعب .. محمد انا فى أسكندرية لو ينفع نتقابل كلمنى

كنت عايز أشوف مصعب قوى .. نفسى أشوف العقلية دى ..

بس للأسف .. مصعب جاه فى يومـ بيبقى مفرمة بالنسبالى ..

كلمت مصعب الساعة 8 و قولتله انا لسه واصل بيتى ..

قالى و انا رايح أركب و أطلع على القاهرة

كنت زعلان قوى انى مش حقدر أشوفه ..

بجد يا مصعب كنت عايز أشوفكـ و الله ..

جالى تليفون الساعة ..

أحنا فى حفلة ختام مهرجان مونت كارلو الدولى فى مكتبة أسكندرية

الحفل كان غريب شويه .. شاب سورى مع فرقته قاعدين و بيغنوا بالعود قصايد .. كانت جميلة الحقيقة

فرقة من تونس .. بنت بتغنى تونسى .. من صعوبة كلماتها قولت دى سعاد ماسى نعمة :D

فرقة من الجزائر ... شاب جزايرى مش بس بيغنى جزايرى ..

لا دا بيغنى قبيلى .. ولا كلمة فهمتها و الله العظيمـ

كانت المذيعة عايز تعمل معاه أنترفيو قالها مش بتكلمـ عربى :D

و فى الختامـ كان فريق وسط البلد .. الأمريكان كانوا مبسوطين منهمـ قوى ..

بعد الحفلة طلعنا على القهوة قعدنا شويه و بعدين طلعنا على " عبده تشكيلة "

عبده تشكيلة .. من أشهر محلات الأكل فى أسكندرية .. محل سوبر ماركت .. بيعمل شويه أكل تحفة

السندويتش بيبقى حلو قوى .. بس اللى يشوف و هوا بيعمل السندويتش ميكلش منه حاجة :D

هو طريقة السندوتشات معفنة .. بس ممتع الحقيقة :D

بعد كده روحنا فى مشروع اللى هوا الميكروباص كان من نوعية Tata

حاجة كده من قديمـ الأزل .. مكنش معانا ولا عربية و كانت الساعة 3:30 الفجر و دا فاضى

أول ما ركبناه حسينا أن فى ريحة حريقة :D

المهمـ .. روحنا و كالعادة بدأ مسلسل الفر و الكر من الأسد اللى فى البيت عندى :D

و على رأى طلعت زين فى فيلمـ أفريكانو ... أن الأسد لا يأكل ألا كل خمسة أيامـ

بما مسكنى اليومـ دا و أنا بفتح الباب .. زعيمى أزيكـ تصبح على خير .. بس :D






الجمعة .. 17 / 10


أكتر يومـ تعبت فيه من كتر الترفيه :D

نزلت من بتنا بعد صلاة الجمعة الساعة 2 كان عندى كورس يونانى ..

خلصت الكورس طلعت على كارلوس كافيه اتغدينا و قعدنا هناكـ لغاية الساعة 12:00 بالليل ...

عرفت أن عيد ميلاد سولتو النهاردة .. روحت مع يوسف جبنا التورتة و الفومـ ..

الفومـ .. فكرة يوسف الصياد الشيطانية

طلعنا على المعمورة .. الساعة 1:00 .. أحتفلنا بسولتو .. مثل أحتفال الأبطال عند الهزيمة :D

كان عيد ميلاد لذيذ قوى .. كانت المعمورة متألقة .. كانت فيها أعداد خفيفة جدا جدا ..

كان معانا أمجد بيه .. و حد طيب قوى ..

كل سنة و انتى طيبة يا سولتيا :D

مشينا من المعمورة الساعة 4:15 .. و صلت بيتى على صلاة الفجر ..

لو طلعت و اتوضيت بابا حيصحى .. أتوضيت و صليت فى الجامع ..

روحت البيت و مسلسل الكر و الفر أبتدى .. قلعت هدومى و غسلت وشى و نمت

و بابا صحى من هنا .. دخل الاوضة يبص عليا لاقانى نايمـ .. و أنا بضحكـ فى سرى

تانى يومـ بيقولى انت جيت أمتى .. كنت سائل ماما بابا أنامـ امتى .. قالتلى نامت الساعة 3:30

قلتله انا جيت 3:45 .. قالى يا أبن الكلب :D .. قالى عمكـ راح القاهرة و جاه و انت لسه مرجعتش البيت :D



السبت .. 18 / 10


اتغديت اليومـ دا فى البيت ... علشان مزعلش الزعيمـ ..

و بعدين طلعت على كارلوس كان معانا Emile اتكلمنا فى كل حاجة ..

قالتلى أنها شغالة فى مكتبة أسكندرية محرر فنى ..

اتكلمنا عن الأنتخابات الأمريكية .. و قالتلى أنها مع أوباما .. و أنهمـ بيكرهوا بوش جدا جدا

اتكلمنا عن العشاء اللى جمع ماكين و أوباما .. و أزاى ماكين باين عليه الأعتراف الضمنى مش الصريح

و أزاى ماكين غير فريق الدعاية كله .. و انه قال أن أوباما على بعد خطوات قليلة من مجد تاريخى ..

أتكلمنا عن مصر .. كانت بتقول أنها محبتهاش علشان القاهرة .. بس لما جات أسكندرية أتبسطت قوى

قولتلها أن انا لما بسأل عن مصر مش بسأل عن القاهرة .. علشان انا مواطن سكندرى

طلبت منى فانلة أبو تريكة فيها علمـ مصر علشان تديها لحبيبها لما ترجع أمريكا

قالتلى أنها راجعة تانى أمريكا و مش عارفة أذا كانت حترجع مصر تانى ..

قولتلها على مقولة اللى يشرب من النيل لازمـ يرجعله تانى ..

قالتلى دى حصلت معايا من سنتين و رجعت و درست العربى ..

مش عارفة المرة دى أيه اللى حيحصل :D

بعد كده مشينا و روحت لصحابى أتفرجنا على ماتش الأهلى فى القهوة ..

أتعشنا عند جاد .. و روحنا الساعة 12:30 .. و كان بابا فى ذهول :D





20 التعليقات:

حسين هاشم يقول...

:D:D:D:D

حلو اسبوعك ياكموبرى والله
بجد استمتعت وانا بقراااه ع سبيل الفضول بس كان لطيف
استمر

Here i'm يقول...

أيه يا عم انت داخل تقرا نكتة :D

أيه كمية الضحك دى :D

انت احلى يا أبو ألفيس :D ..

Yasmine يقول...

و انا اللى فاكرة ان امبارح كان يوم عالمى عشان عملت انترفيو و رحت مصر الجديدة و عملت مشوارين فى الزمالك:D:D
انا الاسبوع بتاعك ده لو اتقسم على السنة بتاعتى على اخر السنة هكون حجزة سويت فى المستشفى..مش بنق ولا حاجة ربنا يديك الصحة:D
بس ممكن اسأل سؤال غلس..اشمعنى اليونانى؟

Here i'm يقول...

بنت مصرية ...

yaso .. يعنى هالو باليونانى :D .. بلاش الظن :D

المشكلة مش فى الصحة ولا حاجة.. المشكلة أنك مقولتيش بسم الله ماشاء الله :D

يالا أقول أنا سورة الفلق و خلاص :D


الفكرة فى كورس اليونانى .. انى حسيت انى مأنتخ خالص .. و كل ما واحد يقولى تعالى ناخد كورس فى مش عارف ايه .. أقوله المركز دا فاشل .. يقولى طيب ناخد فى مش عارف أيه .. أقوله لا مش مهم .. بقى اللى حواليا مشوا فى الفاشلين من وجه نظرى و أنا لسه قاعد :D .. فأتحركت قبل ما أنام فى الخط :)

و كمان .. لما حاخد يونانى .. حبدا فى الفرنساوى و الانجليش .. فـ قشطة :D

dr.lecter يقول...

مش عارف اعلق بجد يخرب بيت دماغك

انت يااد لو هندور علي مصطلح لكلمه active or energizer مش هلاقي غيرك والله

ده انا بارجع كل يوم من كايرو بعد يوم طويل من الشغل والمحاضرات مهدود ومش شايف ادامي تلحق انت تعمل ده كله

انا مش عارف بصراحه مش مقتنع بالتنميه البشريه ومش لاقي لها وقت اصلا مش داخله دماغي


ماعندكش حته بريطاني او كنديه ؟ لو لقيت ماتنساش اخوك والنبي

علي فكره الامريكان من خبرتي الضئيله معاهم مش زي ماحنا متصورين خالص هم باختصار ناس لطفاء ودوددين بس لما بيكتروا ويبتدوا يتحولوا لمؤسسه او مجتمع بتبتدي حاجات مش لطيفه تظهر

غير معرف يقول...

ربنا يباركلك يا محمد في حياتك


..

ربنا يطول في عمرك

mUsLiM يقول...

ايه ياعم كبارى ده كله

ده انت طلعت مظبط ياعم

بنات أمريكان وأفلام أجنبى ومسرح وحفلات ..

هههههه

انسى انى أشوفك بعد اللى قلته ده

ممكن بس أقيم عليك الحد أنا والأخوه لو تحب نتقابل يعنى ,,

أصل الأخوه فى اسكندريه ايه

بعيد عنك

ههههههه

طبعا بهزر معاك ياعم محمد

بس برده ميمنعش انى مش راضى عن بعض حاجات , كلنا بنقع فيها ,,

نسأل الله السلامه,,

بس جميل ان الانسان يتسغل وقته دايما بدون كسل أو هدم للعزيمه

فالعمر أغلى بضاعة يملكها الانسان

المهم أن ننفق هذه البضاعه فيما يستحــق ,,

يعنى انا شايف لو انت مثلا درست لغه غير اليونانى زى الفرنساوى او الألمانى كان أفيد ليــك

يعنى اليونانى لغه ضعيفه شويه ,,

بس ده ميمنعش ان فى الآخر اكتساب اللغات أيا كانت ثقافة محترمه لعقلية الانسان ,,

ولكن هناك أولويات يجب أن تُراعــى ,,

وربنا يكرمك يا حبيبى ويوفقك ونشوفك كده حاجه كبيره فى المستقبل

وان شاء الله نشوف بعض قريب

والله من وراء القصد

السلام عليكم

Yasmine يقول...

و انا اقول بكره الاسم ده ليه اتاريه يونانى:D:D
و بعدين الناس اللى نفوسهم صافية زى حالاتى كده ما يتخافش من عينيهم و اكبر دليل على كده حفلة عمرو دياب:D

ابقى فكر فى الاسبانى يا محمد..قريب اوى من الانجليزى و الفرنساوى و سهل جدا فى مذاكرته..
قلت افيدك بخبرتى العظيمة بما انى واخدة فيه 3 كورسات و عرفت انه مطلوب فى شركات كتير مع الانجليزى..مش عارفة من غير معلوماتى القيمة كنتوا عملتوا ايه:D

dr.lecter يقول...

الاسباني جامد بس نفضت له خلاص علشان كان له حوار كده من سنتين فشل للاسف فقلت اخليني احسن مؤقتا في الفرنشاوي علشان لما نروح كندا ان شاالله

Fatma يقول...

بتفكرني بشبابي يا واد يا كوبري

بس انا دلوقتي اتهديت خلاص :)

اسبوع حلو اوي

بجد انت انسان جميل يا كوبري

Here i'm يقول...

دوكى ..

تصدق بالله أنا مش عارف أيه حوار أنت نشيط قوى .. و الله أنا شايف نفسى بروطة قوى :D .. الراجل بتاع كورس الـ HR بيقولى أنت الـ Body language بتاعك عالى قوى وز أنا خلاص حفظتك :D .. شاف الفلاشة بتاعتى بيقولى أيه دا .. مقاولات و HR و يونانى و عمرو خالد :D.

التنمية البشرية علم مهم قوى حاليا .. كفاية أن أستراتيجية المنظمة لازم يكون الـ HR موجود فى كل كبيرة و صغيرة .. انا كنت فاكره بيعمل أنترفيو و خلاص .. طلع الموضوع كبير كبير يعنى .. كفاية أن الحلقة اللى فى النص بين أصحاب الشركات و الموظفين و أزاى تجيب لكل واحد حقه ...


على فكرة برضه الـ HR مش تخصصى .. بس مجال بفتحه لنفسى و أهو ..


لا و الله يا دوك متلقيش .. فى سويسرى بس دمها سم و تقيلة قوى :D .. ها دايس ؟؟

الأمريكان على المستوى الشخصى ناس بسيطة قوى بس سياسيا أمريكا فوق الجميع و دا أنا بقدره فيهم

Here i'm يقول...

سما مصر ...

ربنا يكرمك يارب .. على فكرة طلبك فى دماغى بس و الله البلوج عندى تعبنى قوى لا عارف أضيف و لا أمسح ... بس برضه طلباتك أوامر :)

Here i'm يقول...

مصعب ..

تصدق أنا عندى مكن واحد كده بالظبط .. أبن عمتى عمرنا كله متربيين مع بعض و أنتيمى كمان و دقنه دى طويللللللة :D.. بيقولى نفس الكلام دا:D

اليونانى فى أسكندرية لغة مفيده قوى .. كشركات سياحة أغلبها يونانيين دا غير أكتر من فرصة .. على فكرة اليونانى دا خطوة فى لغات كتير انا بحب اللغات قوى أساسا


منور يا مصعب

Here i'm يقول...

بنت مصرية ..

دا أنا لما عرفت ان ياسو دى يعنى هالو باليونانى ضحكت ضحك :D

أنتى متتكلميش خالص على حفة عمرو :p .. هوا أنا لاحقت أنسى :p


الأسبانى كان فى دماغى و أنتى عارفة كده :D .. بس حصل كام حاجة خلتنى أبعد شويه يعنى .. على فكرة اعرف شركة جامدة جدا طالبة أى لغة بالأضافة للأنجلش .. شركة نار نار نار :D

Here i'm يقول...

لاكتر ..

فكر فى أستراليا الأيام دى ... أنا بفكر و الله

Here i'm يقول...

فنون ...

أنتى أتهديتى :D .. و كمان بفكرك بشبابك :D

دا أنتى فى ريعان شبابك يا حاجة :D

أنتى اللى حد جميل قوى يا فنون :D

و متخديش على كده :D

غير معرف يقول...

هو الكورسات دي يعني بتفكر بمرحلة الشباب :(

أنا كمان عجزت بقى :D

فكرتوني بأيام الكورسات :(


أول سنة اتخرجت فيها من الكلية

كانت أيام حلوة بجد :(


بجد :(

The Seagull يقول...

ماشاء الله عليك يا كباري :D .. ربنـا يوفقك إن شـاء الله ويحقق لك مرادك .. على فكـرة أنـا درست يوناني ولاتيني سنتين في الجامعة .. ومش عايزة أقولك كانوا ممتعين أوي قد ايه :D وكنت بجيب فيه الدرجة النهائية كمان :D.. بس دلوقتي الحمد لله مش فاكرة ولا كلمة منهم :D

mony يقول...

جبار انت..امريكان وبتاع وهيصة:)
انا بحقدك عشان مش بتعد ف البيت:)
مش زيى وزى امثالى..
لا بس كده احلى ياكبكب والله..عشان متحسش بزهق وملل ف حياتك
استمر يا كابتشن

leeno يقول...

فكرة حلوة اووووووي انك تسجل انت بتعمل ايه فاسبوع

حبقى اجربها

اسبوعك حافل