السبت، 31 يناير 2009

قفا تركى ..



بعيداً عن جوا الحموضة اللى انا عايشه بقالى أكتر من شهر ..

و بعيدا على ممنوع شرب الكوكا و القهوة و الشاى و النسكافية ..

و ممنوع الطبخ و المسبك و مخلل و المقلى و الفلفل ..

يظهر الحاج أردوجان .. بقفا جديد

كالعادة أردوجان مصممـ أنه يدينا كل شويه قفا .. قفا تركى ماركة RCR

بعد القفا الأول لأردوجان فى قناة الحقيرة .. لما قال جئت إلى هنا لأننى أمثل شعبى و منتخب بالنيابة عنه

واصل أردوجان سلسلة صفعاته .. و المرة دى كانت من منتدى دافوس فى سويسرا

لما رفض أكمال المنتدى الأقتصادى دافعا عن غزة ضد بيريز بيه و المحاور الأمريكى

و قال موجها كلامه لبيريز " تعلمـ جيدا كيف تقتل الأطفال .. و أنا بالنسبة لى منتدى دافوس انتهى "

و لما رجع بلده .. أستقبله شعبه من غير أتوبيسات نقل عامـ ولا أتوبيسات شركات بترول


و قال مخاطبا شعبه

"أنا لست دبلوماسياً متقاعداً.. ولا أتحدث كما يتحدث الدبلوماسيون المتقاعدون لأننى وصلت لهذا المنصب من أعماق السياسة، والبعض لايزال غير مدرك لقوة تركيا، لكننا لا نعمل على ضوء ما يقوله الآخرون، وسنستمر فى موقفنا بالدفاع عن تركيا، وهذا ما يليق بشعبها "

الديمقراطية تطلع راجل .. الراجل يرد على اللى شايف نفسه راجل

ديمقراطية 99.9 % تطلع عيل .. ميعرفش يرد على عيل شايف نفسه راجل

الفرق بان قوى .. لما أوردجان قامـ و أنسحب .. و عمرو موسى مبقاش عارف يعمل أيه

لا عارف يقعد ولا يمشى و قامـ وقف و خلاص .. و بعدين قعد .. حيعمل ايه طيب ؟!!!




-- -- -- -- -- -- -- --




أختلافى مع حماس .. مش أختلاف مع المقاومة الفلسطينية .. أو اتفاق مع فتح

أختلافى مع تمويل أيرانى بحت للحرب على غزة ..

أختلافى مع أن تقومـ حماس برد جزء من جمايل أيران ..

أختلافى مع خالد مشعل .. الذى لمـ يحمل سلاح فى تاريخه

أختلافى مع هنية الذى أختبىء فى المخابىء و تركـ شعبه ..

على الرغمـ أن أسرائيل خبت شعبها المهدد بالصواريخ فى المخابىء

أختلافى مع أدارة الحرب .. و بعد موت 550 واحد ..

يخرج خالد مشعل ليقول لمـ يموت اح من المقاومة حتى الان

أختلافى مع سر علاقة خالد مشعل برئيس وزراء قطر ..

أدون جاسمـ صاحب أحدى قصور هانليا فى اسرائيل

و سر علاقته برجل المال فى فتح .. محمد رشيد الملقب بخالد سلامـ

أختلافى مع هذا الذى يسمى نفسه نصر يخرج من الأستوديو ..

اللى بيفكرنى بأستديوهات سينما مترو .. علشان يقولنا نعمل ايه ..

يقولنا نقومـ و نعمل مظاهرات و القوات المسلحة تضغط

يأخى تييييييييييييييييييييييت

و فى الأخر يطلع يقول يا بيه و الله ما أنا اللى رميت الصاروخ ..

أختلافى مع قادة عرب نسوا ماضيهمـ .. و لما أقول قادة عرب يبقى قصدى الـ 22 واحد ..

من بتاع قطر .. اللى نسوا أنه كرش أبوه و أنقلب عليه و أننا شايلين قرفه هنا فى مصر

مرورا لبتاع الجولان المحتل بتاع المقاومة .. و صولا لمباركـ بيه .. أنتهاءا ببتاع أسراطين

أختلافى مع فرض نصر لغزوة غزة .. على العلمـ أن محدش لغاية دلوقتى كسب ..

اللى أنا شايفه أنه كله غلط .. كله على باطل ..

من حماس لأسرائيل لمصر لقطر لسوريا ..



-- -- -- -- -- -- -- -- -- --


سنة 2008 .. خلصت لا لا قصدى غارت

السنة دى تعبتنى قوى .. حاجات فزيعة حصلتلى ..

يمكن فيها حاجات محدش لغاية دلوقتى يعرفها ..

لدرجة انى حتى تعبت من كتر ما بفكر فيها لوحدى ..

سنة حصل فيها كل حاجة .. كل ما تشتهى الأنفس حصل فيها

لدرجة أن الدكتور اللى روحتله قالى سبب الحموضة و عدمـ الهضمـ هوا نفسانى

قالى عندكـ حاجة تعباكـ نفسياً .. قولتله كالعادة لا أنا فل الحمد لله

يالا الحمد لله على كل شىء ..



-- -- -- -- -- -- -- -- -- --



فى فيلمـ دا .. أتسئل بطل الفيلمـ .. ليه بتكتب مذكراتكـ ؟؟

قال علشان الدنيا و الوقت بيجروا بسرعة و دى الحاجة الوحيدة اللى بتعطلها شويه

دى الاجابة الوحيدة اللى أقنعتنى بفكرة اللى بيكتبوا مذكراتهمـ


-- -- -- -- -- -- -- -- --





أحلامـ كتير فى 2009 .. أغلبها بتتحطمـ قدامـ الأزمة العالمية

أحلامـ بسنة هادية .. من غير مشاكل عويصة تستغرق حلولها شهور زى سنة 2008

أحلامـ .. بخطوة مهمة فى طريق شغلى .. و إن كنت رسملها أخر السنة ..

أحلامـ .. بنجاح عادى جدا .. لدرجة ان مقبول بقت أحدى الأحلامـ

أحلامـ بسنة من غير دعابات سخيفة زى سنة 2008 ..

أحلامـ .. بلغتين أنا عن نفسى بحبهمـ جدا ..

أحلامـ .. بأنى مفقدش حد عزيز عليا تانى ..

أحلااااااااامـ ..



-- -- -- -- -- -- -- --













22 التعليقات:

Yasmine يقول...

اردوغان ادى قلم قوى مش بس للعرب ولا العالم الاسلامى..اردوغان ادى درس لاوروبا قبلهم..اوروبا اللى رفضت انضمام بلده ليها..كانه بيقولهم من غيركم نقدر نكون و يطلعلنا صوت..من غيركم نقدر نكون ديمقراطية قوية و دبلوماسية مسموعة و عامل فعال على المستوى الدولى
وقت الانتخابات السنة اللى قبل اللى فاتت واحدة صاحبتى كانت فى تركيا و قالتلى ان المظاهرات ضد حزب العدالة كانت مالية الشوارع..دلوقتى منظر الاتراك و هم فى استقبال اردوغان خلانى نسيت انها كانت دولة علمانية و اتحولت لدولة بيحكمها نظام اسلامى..نفسي ييجى اليوم اللى نتلم فيه حوالين هدف واحد حتى لو كان الفكر و الاسلوب مختلف

انا تعبت من الكلام عن غزة..باختصار الخاسر الوحيد هو الشعب الفلسطينى اللى لا حكامه نصفوه ولا العرب نفعوه
ربنا يخليلنا النظام العربى اللى كان فى يوم له صوت و فعل و بعدين مشى الفعل و فضل الصوت و اخيرا اتخرس و اتشل و مستنى عربية اسعاف تشيله..بس نجيبها منين دى؟

خلى بالك بس لا تتهم بالعمالة و الجاسوسية..حماس كسبت طبعا و اسرائيل فى طريقها للانهيار و الناس اللى كلموا عمرو اديب من غزة و قالوله دى مش حرب ده انتحار كانوا مأجورين

2008 كانت مرعبة..مش عايزة افكر ولا عايزة افتكر خلينا فى 2009 و ان شاء الله هتبقى احلى على الكل

اكتشفت انى مش بكتب مذكراتى غير و انا فى الارض..و لما بقراها تانى برجع اعيش نفس الحالة و بمر بنفس الاحاسيس من الاول..
اى نعم هى بتخليك تفتكر ايامك عدت ازاى لكن بالنسبالى انا وجعها اكتر من فايدتها بكتير
ده غير انى مرعوبة اموت و حد يقراها فبقيت بحتفظ بالاحداث المهمة فى الذاكرة اللى هى فى الضياع اساسا و استحضرها وقت اللزوم..و اكيد اللى بيثبت هو الحاجة المؤثرة سواء كانت حلوة او وحشة

خليك فى الاحلام و سيبك من الاحباط..مش لايق عليك التشاؤم يا محمد بصراحة :)

dr.lecter يقول...

بص انا طلع تيتي من المواضيع دي ومش عاوز ارغي فيها

ساعات الصمت بيبقي ابلغ من الكلام في مواضيع احنا عارفين اولها من اخرها

مصيبتنا اننا جايين نعرف الكلام ده دلوقتي

انا دايخ اصلا وعاوز انام بس قلت ماينفعش ماامسيش عليك واقولك مرحب يامعلم وعودا احمد وان شالله تكون وفقت الفتره اللي فاتت


بص يامحمد اوعي تتشاءم صدقني والله انت من الاسباب اللي بتخليني اتفاءل ويبقي عندي امل رغم كل شيء
وعاوزين نشوفك ياعمنا والله ليك وحشه مووت

يلاا فوتك بعافيه

Fatma يقول...

مالك يا كوبري

انت مش عاجبني بقالك شوية وطلعت شايل جواك كتير ومخبي زي مانا كنت حاسة

Here i'm يقول...

انا حرة ..

تركيا مبقتش دولة بيحكمها نظام أسلامى .. كل الحكاية ان تركيا زى ما قولتى أدت لأروبا الجزرة .. و دا دور العصاية .. عصاية العالم العربى .. الجيش التركى جاهز للأنقضاض لو تم تحويلها أسلامية أو ظهرت حاجة زى دى على السطح


ما دى المشكلة .. اللى الخسران دايما هوا احنا سواء كنا فلسطنيين او حتى عرب



لا ماهو خلاص .. انا بقيت من العمالة و الجاسوسيين .. فقولت أتكلم .. دا كفاية عليا ماجا :D


2008 دى كانت كوارث بالنسبة لى .. بس على رايك خلينا فى 2009


لا فكرة المذكرات دى بتدور فى دماغى الأيام اللى فاتت .. بس انا اساسا مش فاضى أمسك ورقة و قلم و أكتب .. يااااااااااا مش بتاع الحاجات دى انا :D


و الله مش أحباط .. تقدرى تقولى بعد ما العاصفة عدت و طلعت سليم .. قولت اقعد أشوف اللى حصل دا عدى ازاى .. الحمد لله

Here i'm يقول...

دوكى ..

ياعم انت واجع دماغى ليه ما تدخل تتخمد و تنام ... و بعدين ممنوع الزيارة ليلا .. بتعشى انا و المدام و بناتى :D

و الله زى ما قولت يا دوك .. الواحد تعب من الكلام .. بس اهو تقدر تقول انه تسجيل للتاريخ :DDD

مش تشائم و الله يا دوك .. انا الحمد لله مش من شيمى التشائم دا .. الحمد لله على نعمة التفائل

Here i'm يقول...

فنوووووووووووون ..

يا بنتى كلنا أساسا مخبيين .. محدش من جوا فاضى :)

انا فل الحمد لله .. كل حيعدى و ربنا يخلى برسيل اللى بيطلع اصعب البقع :D

غير معرف يقول...

إزيك يا محمد,يارب تكون بخير :)

mony يقول...

والله كنت حاسة
انت عايزلك اعدة وكوبايتين حمص شام..شو بدك تتروق:)

اصبرلى يا محما هانت والله:)

mUsLiM يقول...

تعرف يا محمد إنت عندك أصول غير متينة فى تفكيرك ،،

وأصل هذه الأصول أن المسلمين ســواء ، وأن المسلم المصرى لا يفضل على المسلم الفلسطينى ، وأنه لا مجال للمحاباه بين مسلم مصرى ومسلم فلسطينى

طبعا هاتقولى الدويقه ومش الدويقه والنغمة بتاعتك دى ،،

يا أخى الدويقه اللى حصل فيها مكنش ضرب بالطيران ، ولا ليفنى راحت فلسطين أعلنت فيها الحرب على الدويقه ، ولا القتل كان يوميا وبدم بارد ، ولا كان فيه حصار على الدويقه لأعوام والعرب بيتفجروا

اتق الله يا أخى

ثم فلتعلم أنك أكبر المتشددين ، تصم الغير بالتشدد وأنت أولى به فى نظرى ،،

ثم مسألة حماس

انا لم أجد فيما أعلم من الحركات الإسلامية حركة إسلاميه على وعى بالسياسة مثل حمــاس

انا مش فاهم دعم إيرانى إيه اللى كل شويه بيتكلم عنه أبو الغيط بتاع هاتولى الست دى

هذا الرجل الذى يفتقر إلى أدنى درجات اللباقة والفصاحة ،،

وبعدين فرضا فيه دعم إيرانى ، وحتى لو فيه سلاح بيروح غزة من إيران ،

مستنى ايه من حماس

تقول لإيران ، لا ، مش عاوزين سلاح انتى وحشه يا إيران علشان ليكى سياسة معينه

مستنى ايه ، لو عملوا كده يبقوا أغبى الناس حقـا

لابد من الاستفاده من كل فرصه أمام المجاهدين خاصة فى هذا الوضع

ثم انك مستغرب لعلاقة قطر بحماس ، يا أخى استغرب الأول لموقف سوريا ،،

سوريا التى تنص فى قوانينها حتى الآن على حكم الإعدام لمن ينتمى لجماعة الإخوان المسلمين

وهذه حماس ، إخوان مسلمين وبكل صراحه

ومع ذلك تدعمهم ، وهم يرحبون بذلك ، ولا يهمهم أوضاع سوريا الداخليه

لأن بكل بساطه مش مهمة حماس الشئون الداخليه للدول العربيه

هما فى موقف معين المفروض إنهم يستغلوا كل دعم مقدم إليهم

ويتربصوا لأى فرصه للدعم من الدول العربيـة ،،

حماس صمدت فى وجه حصار ظالم ، ولله الحمد انتصرت

نعم حمـــاس انتصرت ولله الحمد

هاتقولى مات أكثر من ألف شهيد ، هاقلك فى حرب اكتوبر اتقتل منا أكثر من عشرة آلاف مقابل الفين من الصهاينه

يبقى احنا خسرنا ...؟!!

لا طبعا ،،

المهم أن أهداف الظالمين لم تتحق

بل على العكس دارة الدائرة عليهم ، وعادة فلسطين وقضيتها كمحور لقضايا الأمة الإسلاميــة

وفشلت فى القضاء على حماس وعلى روح الجهاد فى غزة

وفشلت فى تغيير الوضع الأمنى هناك وإعادة عباس وزمرته

وفشلت فى منع إطلاق الصواريخ ونزل أكثر من مليون ونص يهودى فى الملاجئ

وبصراحه مش عارف أرد عليك ازاى لما بتقول هنية كان فى مخبأ

يعنى عاوز القادة السياسيين لحركات الجهاد يخرجوا للطائرات أو يكشفوا عن أنفسهم ..؟

لا طبعا ، هذه مهمة قادة الجهـاد لا قادة السياسة لأن مقتل الواحد منهم يفت فى عضد المقاومه

هذا فضلا انهم مش فى ملاجئ هم فى أماكن زى أى مكان قاعد فيه فلسطينى ، بس مش معروف

والدليل على كده استشهاد سعيد صيام ، مكانش فى ملجأ ولا حاجه كان فى بيت عادى بس مش معروف لحد لغاية ما كشفه العملاء

واتق الله فى الحديث عن مجاهد كخالد مشعل ، هذا الرجل الذى قاوم وجاهد منذ نعومة أظافره ولا أدرى هل تعلم تاريخه الجهادى أم لا ،،

ولكن يكفيه شرفا أنه تم تدبير مكيده لقتله منذ عشرات السنين ، ولكن نجاه الله منها

وهو منذ يومه مستهدف من الصهاينه ،،

وعلى كل حال اقرأ براحتك يا عم

و على فكره ربنا رحمك منى على المنتدى لأنى كنت هاسلخك والله

بس حظك المنتدى واقع

ومتنساش تدعيلنا بقى ياعم ،،

وربنا يهدينا ويهديك يا قبارى

انا وانت ، ومش هاحط تحتك 100 خط ولا حاجه زى ما انت عملت معايا

وإن كان كلامك إذا نظرت له بموضوعيه ما لمتك أبدا، فأنا فى أحوج الناس الى الهداية والتوبة

نسأل الله لنا ولك السداد والتوفيق يا أخى الكريم

والله من وراء القصد

السلام عليكم

Unknown يقول...

سعادة الباشااللى مستنى بوسته من زمان.....
ازيك اولا ..... ثانيا بقة بالنسبة لموضوع غزة.....أنا سئمت بجد من موضوع ادانة كل الأطراف دة ..... انا كنت زيك كدة من أصحاب المواقف المتزنة ..... واما ااجى أقيم موضوع من حيث المخطىء والمصيب ... استسهل ... واقوم بادانة كل الأطراف ..... والواقع انه اسلوب جيد .... مريح للضمير ..... ولكن فى مجزرة غزة الأمر يختلف برمته .... بكل صراحة لا أستطيع أن أدين ولو لذرة حماس .....أستطيع أن أنقل فى هذا الموضوع جزء من مقال الرائع أحمد خالد توفيق عن غزة .... الدكتور أحمد بأسلوبه السلس ...وأفكاره المسلسلة ... أجده أكثر اقناعا منى .....

Unknown يقول...

يقول الرائع أحمد خالد توفيق : "اليوم رأيت صبيًا في عمر أولادي أُلقى كالكيس الفارغ على الأرض جوار سلة المهملات، في مستشفى بغزة لأنه ميت على كل حال، والأطباء مشغولون بمن لم يلفظوا الأنفاس بعد .. هذا الصبي كان حيًا يلعب صباح اليوم. رباه !.. جهاز الإنسان العصبي لم يُخلق لتحمل هذا .. ثم يطالبونك بألا تنفعل ويسدون أمامك الشوارع ببوكسات الأمن المركزي التي يمكن أن ترهب الجيش الإسرائيلي نفسه، ويصدر عدد روز اليوسف حاملاً عنوان (العصابة) يتصدر الصورة (بشار الأسد) و(حسن نصر الله) ، ومليئًا بالشتيمة لأعداء إسرائيل جميعًا: حماس وإيران وحزب الله، كأنهم من قتلوا هذا الطفل. مع اتهام كل من يعترض بأنه حنجوري يريد أن يقاتل حتى آخر جندي مصري .. بصراحة لو أصدرت (ليفني) هذا العدد لما كتبت أفضل من هذا .. هذا عدد مكتوب بمزاج وصنعة وإيمان بلغ مرتبة اليقين.
مئات الرسائل في بريدي الإلكتروني، كلها تحمل عنوان (غزة) .. رجاء تمرير الرسالة .. رجاء تمرير الرسالة .. كل الشباب يمرر الرسائل التي تخبر الغرب بالوضع الحقيقي في غزة. مقالات د. (إبراهيم حمامي) الغاضب دائمًا تنهمر عليّ .. بين الخطابات خطاب من طبيب شاب يقول: "كلما نظرت إلى غزة شعرت أن جميع الأطراف المعنية تستحق الاحتراق في جهنم ابتداءً من اسرائيل الكافرة ابنة الكلب، مروراً بأمريكا ذات الألف ناب، وحماس ذات التصرفات الحمقاء في الدفاع عن شكلها العام بغض النظر عن الشعب , و مصر المخنثة (التي تورطت في مستنقع لا يمكن الرجوع منه و لا يمكن أن تطالب الحكومة بأن تفعل أي شيء في أي شيء )......مرورا ً أيضا بجميع الشعب، حتى ذلك الرجل الجالس أمامي في الميكروباص يعدد طرق القضاء على العدوان، بعد أن استطاع فهم كل الملابسات و القدرات لدى الطرفين، و بدأ في المحاكمات و اصدار القرارات. لا أرى للوضع الحالي حلاً إلا الحلول الإلهية.. إن التهدئة ليست حلاً ووقف النار ليس حلاً و العدوان ليس حلاً و الحرب العربية - إن وجد شيءٌ كهذا - ليست حلاً."
بصراحة أوافقك على كل شيء باستثناء لوم حماس.. على الأقل الآن .. لا اقدر أن ألوم شخصًا يواجه بصدره العاري النيران وأطنان القنابل الذكية لمدة أسبوع كامل، دون أن يستسلم أو يتوقف عن قذف الصواريخ .. شخصًا حوصر على مدى أشهر كاملة، وهو بالتأكيد في وضع لا يُقارن بوضع حزب الله في حرب 2006.. حزب الله كانت حدوده مفتوحة والأرض واسعة والإمدادات تصله. تأمل كيف يتكلم هؤلاء الرجال أمام الكاميرا وهم يعرفون أن الجيش الإسرائيلي كله قادم لذبحهم الآن، وكيف أن كلاً منهم ودع أولاده وكتب وصيته .. هل حقًا تستطيع أن تلومهم وتنام ؟
ترى الهليوكوبتر الإسرائيلية تحلق متلكئة في السماء، كبطة فخور تبيض بيضة هنا وبيضة هناك .. أمامها كل الوقت .. لا يبدو بيضها مخيفًا قاتلاً لهذا الحد، لكنك تتساءل: لو كانت لدى حماس صواريخ مضادة للطائرات، ألن تلقن هذه البطة الفخور درسًا ساخنًا ؟.. صاروخ واحد .. مملكتي مقابل صاروخ واحد ".. انتهى كلام الدكتور .... عذرا للأطالة .. تحياتى ليك

محمد فوزي يقول...

تحليلك العبقري اللي اوردته بعد جملة اردوغان وتلخيصك للمسأله على إنه كيف تمنح الديموقراطيه القوه بينما يمنح التزوير ولي رغبات الناس الضعف والتخبط في منتهى الروعه وأحييك عليه بشده

إنما في نقطة حماس وفلسطين انا متفق في كثير من النقاط مع ما قاله مسلم ولو إني أتمنى عليه أن يتجنب الأسلوب الزجري اللي يبدأ وينهي كل إختلاف بإتق الله , انا مش عاوز اتدخل ويمكن تكونوا اصحاب بس انا نفسي فعلا اننا كلنا نناقش افكار بعض من منطلق التآلف والتوحد مش التشاحن والتحزب
وأرجو إنه ميزعلش مني

وعاوز اقول حاجه , كل من انتقد ايران او حزب الله واتهمهم بأنهم لا يجيدون إلا الخطب تجاهلوا عن غفله أو عن عمد أن مصدر السلاح الحمساوي لا يأتي إلا من هذين المصدرين وأعتقد إن ده مساهمه عظيمه جدا

وبإختصار شعب محاصر محتل يقاوم ويستشهد من أفراده الكثير , ام يستسلم ويموت كل يوم من الجوع والمهانه

والسؤال التاني هل اهل غزه مع حماس ولا ضدهم ؟ مش معقول هنكون احنا اكثر رأفة بهم منهم

كل اللوم يوجه في نقطة انه لا يجب أن يكون هناك صراع داخلي ويجب أن يكون هناك تنسيق بين من يتفاوض وبين من يحمل السلاح والنقطه التانيه هي الحاجه إلى المزيد من اللغه الديبلوماسيه عند الحديث مع الأشقاء وخصوصا مصر

باقي النقاط بما فيها كابوسية 2008 متفق معاك فيها جدا

كل التحيه

la tormenta يقول...

سؤال بس
ايش يعني عبارة قفا في العامية المصرية؟و شكرا :DDDDDD

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

Here i'm يقول...

سما مصر ..

أنا الحمد لله بخير .. أنتى أزيك ؟؟

على فكرة أنا بعتلك رسالة خاصة و مستنى منك الرد ..

Here i'm يقول...

مونى ..

بلاش أنتى بصدفك بسلاطاتك ببابا غنوبك :D

Here i'm يقول...

فارس الأسلام .. مصعب ..

كلنا عارفين أن المسلمين سواء .. هوا فى حد قال غير كده ! .. بس هوا ليه الكلام ا مش بينطبق أو بمعنى أصح الناس مش بتقوله غير على مصر و المصريين .. دى قاعدة و انا متفق عليها .. بس حاليا القاعدة مختلة .. و بالتالى مصالحى تأتى أولا .. و الكلام دا حيتفسر لوحده بعد ما نتكلم عن حماس


بالنسبة للدويقة .. يا مصعب أنت متنفضتش للدويقة زى غزة .. متنفضتش للعبارة زى غزة .. على فكرة أنا مش بقول أحتمالات .. أنا واثق من أنها حقائق .. اللى ماتوا عندنا فى العبارة 1035 ماتوا فى ساعة أو أقل دول ماتوا على مدار أول 10 أيام فى غزة .. أنت يفرق معاك سواء كان الموت بالسلاح أو بالطيارة أو العبارة !! .. دى تبقى مصيبة لو يفرق معاك .. أنا أتبرعت لغزة بعد ما بدأ العدوان .. و قولت أن التبرعات مهمة .. بس ساعة الحصار مكنش ينفع أخد فلوسى و أبعتها لغزة و على بعد ساعتين جبل قاعد على أنفاس ناس ..


بالنسبة للتشدد و التعصب .. كلنا يا عزيزى متشددين .. كلنا متشددين لأرأئنا و فكرنا .. ولا أنت شايف غير كده ؟؟



بالنسبة لأتقى الله .. تسلم أيدك على جملة دى .. أحلى ملة قولتها .. اللهم أجعلنا من المتقيين


علشان نتكلم على حماس .. مينفعش نقارن بين نصر 73 و غزوة غزة فى 2009 .. فى 73 أنت مات منك أكتر عدد و دا شىء بديهى بالنسبة للتناسب بين سكانك و سكان أسرائيل .. حاجة متوقعة .. أما المكاسب فكانت واضحة و صدقنى و الله العظيم أنتوا لو شوفتوا فيها ديفو واحد فى المكسب مكنتوش سكتوا .. لكن ربنا نصرنا نصرا باين ليك قبل ما يبان ليا .. يظهر أنك ناسى أو الدنيا خلتك تنسى أننا الدولة الوحيدة اللى فى محيط أسرائيل أراضيها محررة تماما .. عارف دى مصر يا مصعب .. أنت تقلل من مصر مش مهم .. حكومة مصر تقلل منها مش مهم .. علشان مصر لما تنتصر يا عزيزى العالم كله بيقول أنتصرت .. الأرض و التحرير بيقول أنتصرت .. سينا كلها بتقول أنتصرت .. أبعد عن نقطة 73 و المقارنة بينها و بين حماس علشان نكمل نقاشنا .. علشان لو شكيت فى نقطة زى دى .. يبقى حعمل زيك و أقول " و العاقل يعلم أين الصواب " :D


بالنسبة لنصر حماس .. هل نجحت حماس فى فك الحصار على شعب غزة ؟؟
أسرائيل خسرت و حماس خسرت .. بس أسرائيل كانت أكتر خسارة .. تقدر تقول أن المباراة انتهت بهزيمة الفريقين 1-0 لصالح حماس .. حماس خسرت بنية تحتية و خسرت ضحايا .. و على فكرة أنا مش ضد ضرب أسرائيل بالصواريخ فى أول الأزمة .. بالعكس أنا معاها .. بس أنا ضد حماس حاليا اللى كانت قبل دعم أيران تقول لا للسياسة و نعم للكفاح .. اللى كانت شايفة أن المرجعية لكل الفلسطنين هى حركة فتح .. اللى كانت بتقود حرب فى الضفة و فى غزة و فى كل الأراضى المحتلة .. حماس أتغيرت تماما يا عزيزى ..


بص السؤال دا واضح و صريح .. ولا يحتاج أى بلاغة لغوية أو أى شىء .. متى و أين رفع خالد مشعل سلاحه مع المقاومة و ضد الأحتلال ؟؟ ..

و متقليش حادثة الأردن .. أسرائيل لو تطول تغتلنى و تغتالك حتعملها فما بالك بالفلسطنيين

بالنسبة لهنية .. انا مش ضد أن القادة تدخل المخابىء .. أنا ضد أنه سايب أهله و بلده و شعبه يواجه مجازر للطيران و هوا مختبىء .. أسرائيل من أول صاروخ .. و دخلوا المخابى .. مستعدين للحرب .. و دا اللى قلل خساير أسرائيل من صواريخ حماس .. ليه هنية مجهزش أهله و شعبه للحرب ؟؟ .. ليه ميعملهمش أنفاق زى أنفاق السلاح و الطعام ؟؟ .. ليه مفيش مخابىء و غزة دى ملكه لا فتح تقوله بم ولا اسرائيل تقوله كخ ؟؟ .. فهمت أنا قصدى ايه ..


بالنسبة للدعاء .. أمى خوتتنى بمصعب :D .. كل ما تصلى تدعيلك و زهقتنى فى مصعب :D .. أول نجاح ليك يرجع للست دى أمى .. على فكرة هى لا تقبل الهدايا .. و أبنها نتن و بيقبل الهدايا :D

Here i'm يقول...

جدع حتى النهاية ..

و الل أنت منورنى .. و بقيت عندى فى البلوج trade mark :D .. انا مش ضد حماس انا ضد أنها ترفع مصالحها على مصالح شعبها .. أنا ضد أنها تاخدلها حتة أرض و تجرى تعمل فيها اللى هيا عايزاها .. و ياريت عملت الصح ..

Here i'm يقول...

جدع حتى النهاية .. تانى و تالت :D

كلام الكاتب احمد خالد توفيق .. رائع و يحترم .. و أنا على فكره مكنتش بلوم حماس طول الحرب .. و لو تلاحظ البوست الوحيد اللى عملته كان بعد الحرب .. حتى فى المنتدى مكنتش بتكلم عن الحرب و كنت بقول التبرعات مهمة دلوقتى .. أنا كنت بتكلم بس وسط أصدقائى المقربين .. لكن مكنتش برضا أتكلم عن خطأ حماس طول الحرب .. لكن و ماذا بعد الحرب ؟؟ .. أنا ضد فكرة أن حماس كسبت علشان أسرائيل معرفتش تحقق مكاسبها .. أنا ضد القول أن النصر لازم يجى بموت ضحايا بالألاف .. عندما يأتى نصر 73 فمرحبا بالشهداء .. و لكن شتان بين نصر 73 و نصر حماس ..

وصلت وجهة نظرى يا عزيزى

Here i'm يقول...

محمد بيه فوزى ..

مصعب اللى هوا مسلم اللى هوا الفارس الملثم .. صديق عزيز .. و يمكن هوا مش بيبقى حاد فى ردوده غير على الناس اللى يعرفها و يحبها .. و أنا كمان على فكرة مش بعرف أتخانق غير مع صحابى .. لو حد مبعرفهوش .. بحافظ على لباقتى لأبعد الحدود .. علشان كده تلاقى مصعب حاد فى تعامله معايا .. ضرب مصعب زى أكل الزبيب .. بس أنا مش بحب الزبيب :D


كويس ان تحليل موقف اردوغان عجبك .. بس انا عايز اسألك سؤال .. ليه مكناش بنسمع عن صواريخ حماس ولا عن قوة حزب الله غير بعد عداء ايران و امريكا الصحيح .. أو بالظبط قبل ما يطل علينا المدعو بوش بخاطبه اللى صنف فيه ايران ضمن محور الشر ؟؟؟

حزب الله لا يحارب من أجل لبنان .. حزب الله يحارب من أجل أيران .. أحمدى نجاد يقول أضرب يبقى أضرب ..حزب الله ضرب أهله و نزل الشارع .. حزب الله ندم على لسان رئيسه حسن نصر و قال أنه لو كان يعلم أن أختطاف الجنود كان حيعمل كده مكنش عمله ؟؟


حماس .. حماس الأيام دى بتنقاض ناحية أيران .. أيران هيا الدعم المادى و مش بعيب على حماس كده .. علشان عارف ان مفيش حد وقف معاها .. بس لما أيران تؤمر حماس على لسان وزير خارجيتها فى لقائه مع مشعل فى سوريا أن تنسحب من مفاوضات القاهرة ؟؟ يبقى فى حاجة غلط ..

Here i'm يقول...

تورمنتا ..

قفا للى هوا أول العمود الفقرى من ناحية الرأس و اللى حتلاقيه فى ضهر الرقبة على طول :D

مسمعتيش الفنان محمود عبد العزيز .. و هوا بيغنى للقفا .. أه يا قفا اه يا قفا اه يا قفا :D

Here i'm يقول...

الرابطة و بناء الأمة ..

دخلت أشوف المحاكمة لاقيت كله بيقول أنا ضد من غير اى حيثيات أو نقاش .. و انا عارف أن الموضوع مش محتاج حيثيات :D بس النقاش أهم من فك كبت