الخميس، 19 فبراير 2009

أكاليل الجهــاد ..



لا احد يختلف على ان الأسلامـ هو دين الخلاص لأمتنا ولا أحد يختلف أيضاً أن الأسلامـ دين كل العصور

و لكن ..

هل هناكـ أسلامـ على أراضى المسلمين ؟؟ .. ،
هنا يأتى الأختلاف .. بين فريقا يرى أن الأسلامت موجود فى كل مكان فلن تحتاج إلى جهد او تعب او تكلفة لكى ترى ان اغلب نساء المسلمين يرتدين الحجاب و لن تاخذ من وقتك الكثير لكى ترى كمـ عدد المساجد فى كل منطقة و فى كل حى
و لن تجهد نفسكـ لكى تدخل تبتاع متطلبات يومكـ و تجد على أبواب المتجر أيات قرأنية ..

و الفريق الأخر يرى انه لا يوجد إسلامـ على أراضى المسلمين فالمظهر هوا السائد و الجوهر غائب و الأيات لا تعبر عن ما بالداخل

و أرى نفسى قابعاً فى موقف الوسط بين الفريق الأول و الفريق الثانى ..
فلوجهة نظر الأول بعض الأخطاء كما فى وجهة نظر الفريق الثانى و هذا ما يجعلنى محلقا بين الفريقين ..
كل هذا لكى انطلق للفكرة الرئيسية ..

و هى فكرة الجهــاد ..

الجهاد .. هو احد عقائدنا كمسلمين و ستجد معى ان اغلب من يرفعون شعارات الجهاد فى رأيى أما ثوريين أو انهمـ لا يفقهون من امرهمـ شيئاً فلو أجرينا مقارنة بسيطة دون الدخول فى تفاصيل المقارنة التى لا تحتاج لتفاصيل ..
بين وضعنا الحالى ( وضع قضية الجهاد الأن ) و الجهاد فى السابق ، سنجد أن الأمة الأسلامية لمت تنتصر بالجهـاد ..
و لكن كان الجهــاد أكليل يزين رقبة الأممـ فى اخر المراحل ، و كان الجهاد جائزة لأعمال سابقة مهدت للجهـاد النصر و النجاح ،
كنا ننتصر فى كل معركة نصرة ظاهرة لا يختلف عليها أثنين و يفشل كل من يحاول اخفاء هذه الحقيقة ،
فعندما قاد سيدنا محمد صلى الله عليه و سلمـ معارك الأسلامـ فلمت تكن اول معارك الأسلامـ هى غزوة بدر ..
بل كانت معركة مواجهة الظلمـ و التفرقة و تجارة الرقيق فبنى صلى الله عليه و سلمـ أصول العلاقة بين المسلمين اولا فلا تجد فرقاً بين أعجمى او عربى ألا بالتقوى ولا تجد فرقاً بين غنى او فقير بعد ان كانت سياسات العبيد و الرقيق هى السائدة و لن تجد أصحاب و أنصار سيدنا محمد صلى الله عليه و سلمـ من يوؤد أبنته لأنها بنت بعد ان كان الوؤد شرفاً و تكريماً للرجل و كان العمل و الاخذ بالأسباب أساس حكمـ سيدنا محمد صلى الله عليه و سلمـ فلمـ يكن هناكـ ظالماً أو غشاشا صحابى ،
و هنا مهد سيدنا محمد صلى الله عليه و سلمـ الطريق للجهــاد و النصر و لوجود الأسلامت مستخدما أوامر الله تعالى ..

و عندما ساءت أحوال المسلمين بعد الخلفاء الراشدين إنتهاءاً بفتح الأندلس بدأ الظلمـ و الحفاظ على المناصب و حب الدنيا و قهر النساء و جشع المسلمين .. و هو ما كان أحدى أسباب سقوط الاندلس من المسلمين و بدأت الكفة فى الميل ناحية الغرب بعد أن نقلوا تجاربنا و نجاحاتنا فبعد ان كنا أسياد و حكامـ بلادنا و كنا نصدر العلمـ و العلماء أصبحنا لا نملك مثقال ذرة فى ميزان الأممـ ..

الخلاصة بعد كل هذه الأطالة .. انه لكى نقوى و يشتد ساعدنا و نفوق من يتحدنا ..
علينا أولا أن نرجع إلى مقاييس الحكمـ التى تكون نهايتها أكاليل الجهـاد .. علينا ان نقيمـ أولا أسلامنا فى كل شىء ..
قبل أن نقيمـ الأسلامـ فى الجهـاد فقط .. حتى ننجح يجب أن نعدل مع انفسنا .. فالتاجر الفخور بتزين متجره بأيات القران لا يعمل بالأيات .. و المراة المزينة بحجاب المظهر تسىء للأسلامـ أكثر من كونها محجبة

بيتنا يحتاج إلى الترتيب من الداخل .. بيتنا يحتاج إلى العدل و المساواة و رفع الظلمـ عن الفقير و محاسبة الغنى قبل الفقير ..

فـبعد ان يسود العدل و يزول الظلمـ و يرفع الحق عالياً .. فسوف نكلل رؤوسنا بأكاليل الجهاد ..

و ماعدا ذلكـ فى رأيى أنه أبتعاد عن جوهر المشكلة و بالتالى إضافة أوقات سالبة لأوقات فى الأصل سالبة

. .. . .. . .. . .. . .. . .. . .. . .. . .. .

يقول شيخ الأسلامـ أبن تيمية

أن الله ينصر دولة كافرة عادلة ولا ينصر دولة مسلمة ظالمة


14 التعليقات:

Yasmine يقول...

الاسبوع اللى فات كنت فى حفلة للايتام فى اسكندرية..واحدة ست محجبة سابت الحفلة كلها و كل المجهود اللى معمول فيها و جت تكلمنى عن الحجاب..مع انها ما شاركتش ببسكوتة للاطفال ولا حتى فكرت تقعد معاهم

من ساعة ما ابتديت شغل و انا بتعامل مع بنى ادم من اقذر البنى ادمين اللى الواحد ممكن يقابلهم فى حياته..و الناس كلها عارفة انه كده..و هو عارف ان الناس كلها عارفة..الراجل ده مش بيفوت فرض و طول النهار فارش السجادة و بيصلى

انهاردة مديرى طلب منى اكلم عملاء قلتله انى خايفة اتسئل فى حاجة و ماعرفش ارد قالى انا مش عايزك تدخلى فى تفاصيل..انا عايز ادبسهم فى مقابلة و اروح اضحك عليهم بكلمتين عشان يفتحوا حساب عندنا..مديرى معروف بان اسمه مقترن دايما بصفة "المتدين"

من الاخر ده شكل الاسلام دلوقتى و اللى هييجى يقولى ان المظهر مهم هقوله بلاش استعباط كلنا عارفين اللى فيها و شايفين وصلنا لمستوى اخلاقى عامل ازاى

اللى عايز ياخد دول يجاهد بيهم ياخدهم و ممكن ينتصر انتصار شبه اللى حققته حماس كده
و اللى شايف ان القاعدة تمام حاليا و مش ناقض غير اعلان الحرب على الكفرة و الكفار..يبقى يستاهل حكومة بتسيب الدويقة و تروح تبنى مدارس فى السودان

Fatma يقول...

الاهم من ان يكون في اسلام في ارض المسلمين انه يكون موجود في قلوب المسلمين

مظاهر الاسلام لا تمثل بالنسبة لي شيئ لا بالسلب ولا بالايجاب الحقيقة وغير دالة على اي شيئ لا كويس ولا وحش

السلوك والتعاملات والاخلاق هي اللي بتديني فكرة اذا كان الانسان دا بيتقي ربنا في خلقه ولا لأ
ربنا عايزنا نكون ناس صالحين والاخلاق والتعاملات والسلوكيات ورد فيها مليون حديث وايات كتير بتفاصيل كتير ودا ان دل على شيئ فانما يدل على اهمية الاخلاق والسلوك

المظاهر ورد فيها احاديث قليلة وايات اقل مش معنى كدا انها مش مهمة طالما هي امر من ربنا فأكيد مهمة بس ايه الاولى وايه الاهم ؟! قياسا على كم الاحاديث والايات اللي واردة هنا وهنا اعتقد الاجابة واضحة

وفي الاخر كلها اوامر ربنا اللي يقدر على حاجة يعملها بس المهم ما يفتكرش نفسه احتكر الحقيقة وجاب الديب من ديله سواء دول او دول لان الدين "باكدج "على بعضه مش علبة شوكولاته بنقي منها

dr.lecter يقول...

محمد عبده لما سافر بره قال ايه؟

وجدت اسلاما بدون مسلمين ووجدت هنا مسلمين بدون اسلاما

يافرحتي انا باللي عمال ينهي الناس طول الليل عن المعاصي وينصح فيهم وتلاقيه هو اول الناس تعلقا بحب الدنيا ومتعاها

يافرحتي انا باللي راقد لي في الجامع 25 ساعه وزبيبه الصلاه خلاص علي راسه من كتر التقوي وتلاقيه بيتكلم بطريقه سوقيه مع الناس وبيتعامل معامله متخلفه


ثقافه الجهاد

مش هاخبي عليك كام شاب تقدر تقنعه بالجهاد في سبيل الله؟

واحد بيشتغل في شركه كبيييره ومستقبلله مضمون وعايش احلي عيشه وخاطب مثلا او داخل علي زواج او متزوج والحياه بمبي هتيجي تقوله سيبب ده كله وتعالي جاهد معايا

ولا واحد مقضي حياته بالطول والعرض وعايش علي قفا ماما وبابا والحياه لووز هيسيبب ده ليه علشان الجهاد

عارف مشكلتنا ايه يامحمد ودي المصيبه

المجتمع خلانا نتعلق بحب الدنيا وزيفها اكتر واكتر

خلانا بيبقي تديننا تدين سطحي وظاهري وعلي الموضه نظام تراويح رمضان وعمره كل سنه والخ الخ الخ

لكن وقت الجد ابقي قابلني



احكيلك حدوته بسيطه اوي

بعد النكسه كان الشبياب كل يوم مظاهرات وعاوزين نحارب وعاوزين نحارب

راح عبد الناصر امر الداخليه في مره يلموا كام عيل من دول من وسط المظاهرات من بتوع الجامعه
وراح موديههم الجبهه

قعدوا يعيطوا ويلطموا ويقولوا عاوزين نروح لماما زي البنات

مش هم دول نفس العيال اللي عاوزين يحاربوا ويجاهدوا؟

la tormenta يقول...

انت عارف رأيي في الموضوع يا كباري
عشان ما أتقل بس..:D

الاسلام فيه عمق كبييير جداا لذلك ربنا دايما يقول"يا أولي الألباب"

هذا العمق و هذاالرشد لو جاز التعبير اللي موجود في الاسلام احنا عامة لا ندركه و عاجزين عن ذلك!!
لانه غير مؤهلين ..غير مؤهلين بالتعليم الخربان اللي ضيع الناس و أنتج عقول بمواصفات معينة كتييييرة نأخذمنها : السطحيةوالمحدوديةلأنه هي اللي ليها علاقة بموضوعك بس !!
ثم جاءت الحملة اللي قادها عدد من المشايخ و الدعاةبعد 11 سبتمبر و بعد ثبوت فشل خيارات أخرى و الخ من الأسباب المعروفة..هذه الحملةاللي ما عملتش أي توسيع لعقول الناس ..و تناولت الأمور بطريقة اختلطت فيها الأهداف بين الديني و السياسي وكرست السطحية يعني انتقلت بناس كتير من مرحلة اللامبالاة بالدين الى مرحلة النظرة السطحية للدين !!و أنا بالنسبة لي نفس الشي
بمعنى:
الاسلام جاء لمقاصد معينة جاء بهدف يحدث تغيير و انقلاب في المفاهيم و تحديث واصلاح أيضا..
الاسلام خلنا نقول انه رسالة الهية اختصرت على البشر مئات السنين و الاف السنين سيقضونها في البحث عن سبل تأسيس قيم العدالة و الحق و المساواة و الخ
بداية من شريعة حمو رابي الى اخر الزمان
ربنا اختصر على الانسان برسالةلو مسموح هذا التعبير
ولكن لانه عقولنا بالمواصفات السالفة الذكرومشايخنا على قدهم مع استثناءات قليلةعجزنا انه ندرك هذا العمق و تمسكنا بالسطح لانه أسهل

لما تنزل أي مكتبة أو أي كشك يبيع كتب أو حتى الكتب المعروضة قدام المساجد يوم الجمعة عد الكتب اللي تتكلم عن العدالة و الاسلام و المساواة و الاسلام و التحديث و الاسلام ..ثم عد الكتب اللي تتكلم عن الحجاب..السفور..عقاب المرأةالمتبرجة او عذاب القبر أو الرقية الشرعية أو حتى لو كتب تتكلم عن مفاهيم أساسية في الاسلام لاحظ طريقة التناول و المحتوى اللي يشد الناس للوراء!!!

الخلاصة انه مناخ عام شامل كامل من سياسة و اقتصاد و اعلام و ثقافة.. تكاثف حتى ينتج ناس عندهم مدارك ضيقةو تعاملهم مع الحيااااة عامة خاااطئ وحتى لما جاءوا يتدينواامتصت عقولهم صغائر الأمور فصاروا يعلقون الايات و يلبسون زي معين ثم يغشون و يسرقون و يرتشون و ينافقون !!ثم تهيج مشاعرهم في لحظة معينة و يبدأون في الكلام عن الجهاد!!

اللي يتكلمون في الجهاد في الواقع يتكلمون في انتحارعلى الأرجح لانهم فاشلين أو مكتئبين أو عندهم مشاكل اقتصادية أو تعبوا من الوضع السياسي الضاغط فراحوا طولوا ذقونهم و اعتبروا نفسهم تدينوا ثم بعد شوي قرروا انهم هم الصح و انهم يمتلكون الحقيقة المطلقة ثم قرروا انهم يجعلوا كل الناس مثلهم بالقوة ثم صاروا يتكلمون في الجهاد و مادري ايش!!
و الحقيقة انهم باختصار ليسوا أشخاص متديننين هم أشخاص مكتئبين هذه هي الكلمة المناسبة لحالتهم وما يجب هو انهم يواجهواالحياة بالحياة و الشجاعة و ليس بالموت و الانتحار تحت غطاء ديني !!

الله عز وجل لما رزق الشهيد الجنة فهذا لانه ترك الحياة و المال و الأهل و كل شي في سبيل نصرة الحق ..نصرة القيم اللي يريدها الله على الأرض..مو لأنه مسك كافرأو معتدي و قتله..لانه مو صعب على ربنا انه يتهي موضوع كل الفاسدين في ثانية يعني!!
ولكن شاء الله انه تكون الجنة لمن ينصر القيم و لا يمكن ان ينصر القيم الا شخص عنده قيم أساسا يعيشهايوم بيوم!!منطقية يعني
و لذلك الجهاد من وجهة نظري و أكبر مجاهد هو اللي يجتهد على نفسه أولا ثم على مجتمعه و يحاول يدفعه للأمام على مستوى تخليق الحياة العامة و التوعيةو الاصلاح و يتفانى في ذلك و يبذل في ذلك جهده ووقته و ماله
لانه الاسلام اليوم محتاج للناس احياءيشتغلون و يجتهدون و يصححون غلطات عمرها قروون و ليس للأموات ..
أما غير هذاأشوفه كلااااام فاااضي و تضييع وقت

"وبرده" طولت :D


موضوعك واااايد حلو وزين اني فكرت أدخل هالمدونة اليوم

leeno يقول...

ما شاء الله فنون و انا حرة مسابوليش كلام اقوله


بس انت ليه دايما بتحب تحرق دمنا كدة؟؟؟؟


لازم تفكرني ان الاسلام بقى عبارة عن واحد مطول دقنه و وحدة مخمرة و غير كدة محدش بيسأل اصلا ؟!!!!

Yasmine يقول...

و انا بدعبس على الكومبيوتر لقيتنى كاتبة ده من اكتر من شهر و نسياه.. هو بيتكلم من زاوية تانية بس المضمون قريب من موضوعك
مش خسارة فيك يا كوبرى والله :D

"فقد وصل الى سدة الحكم (او اغتصب السلطة) فى كثير من بلاد العالم الثالث افراد من المواطنين, كانت اطماعهم اكثر من اصلاحاتهم و و كان جهلهم اشد من قدرتهم, و كانت رؤيتهم اقصر من خطواتهم, و كان كلامهم بديلا عن اعمالهم, و نتيجة كل ذلك, ولانهم كانوا او زعموا انهم اول وطنيين يصلون الى الحكم, فقد ادمجوا الوطن فى شخوصهم, و حطموا الشعوب بديكتاتوريتهم, و استبدلوا بالقانون رغباتهم, و استغنوا عن المؤسسات بنزواتهم, و تداعت نتائج هذه الشمولية السياسية و العشوائية الادارية و الجهالة الثقافية حتى ادت الى اغتراب المواطنين عن الوطن, و انهيار الاوضاع الاقتصادية و الادارية و الثقافية, و انتشار الفساد و المحسوبية, و اهدار القوى البشرية و الفكرية"
"الاسلام و السياسة" -المستشار محمد سعيد العشماوى

كنت حالفة ما اتكلمش عن السياسة زهقا و مللا و تعبا من كلام كتير مالوش معنى ولا بيجيب نتيجة
و بعدين طلعت عيلة و رجعت فى كلامى.
بعيدا عن الكلام الكبير اللى مكتوب فوق لكن الفكرة نفسها شدتنى
الفقرة اللى فوق دى بتقصر فساد الدول على فساد حكامها
ناس وصلوا للحكم باى طريقة مش ده المهم
لكن انجازاتهم كلها وقفت عند نقطة واحدة..الكرسى
و نتيجة لحبهم المبالغ فيه لكراسيهم و خوفهم لدرجة الرعب على مناصبهم السياسية كان الفساد بكل اشكاله و صوره

مش عارفة ليه و انا بقرا الكتاب ده افتكرت مناقشاتنا فى الكلية
اللى كانت بتنتهى دايما بهجوم حاد عليا و على اللى رأيهم من رأيي
لانى ببساطة مش مقتنعة ان السبب الوحيد لتخلف دول بحالها هو ظلم حكامها او فسادهم

زمان قال فقهاء المسلمون:"حيثما يوجد العدل, يكون شرع الله"
اكيد ما كانوش يقصدوا العدل فى اتجاه واحد
يعنى العدل فى توزيع ثروات المجتمع على افراده و بس
لان التوزيع ده فى حد ذاته مش هيكون عادل غير لو كل واحد خد على قد عمله
بمعنى ان فى جزء تانى للقصة ما يقلش اهمية عن الحكام..الشعوب نفسها

باى حق شعب نايم..سلبى..نمام..معين نفسه حاكم على خلق الله..اكبر همومه دخول الحمام بالرجل اليميم ولا الشمال؟
و اهم قراءاته بتكون اليفط اللى فى الشارع او اخبار الفنانين و الكورة و صفحة الحوادث
يطلب انه يلاقى حكام لطاف و ظراف و يعاملوه كويس و يحموه قبل ما ينام؟
الناس ما احترمتش المرور الا لما طلع قانون بالحبس و الغرامة
بس على فكرة هم مش هيطلعوا قانون يحبس السلبيين و المنافقين و النايمين
ولا هيجرموا ضيق الافق و انعدام الضمير و اختفاء الاخلاق
ولا هيطلعوا قوانين تنضف البلد الا لما اللى فيها ينضفوا
عايزينها تتعدل..اتعدلوا انتوا الاول و بطلوا تلوموا الحكام عشان احنا ما نستاهلش الاحسن منهم
ابدا بنفسك و اعرف دينك و التزم باوامره و بعدين نام على القهوة و بطل تستحمى و عيش فى دور الضحية و لوم الحكام و علق عليهم فشل هو فى الاساس فشلك انت و فشل فى تربيتك و ضعف فى ايمانك

من اشهر الجمل اللى اتقالت فى السينما "فى اوروبا و الدول المتقدمة بياكلوا مع الكباب طحينة"
الحقيقة انه فى اوروبا و الدول المتقدمة
الناس بتموت نفسها من الشغل 5 ايام فى الاسبوع عشان يلاقوا الكباب و الطحينة
و عندنا الناس بتريح خمس ايام فى الاسبوع و تنام يومين ..فلا بتلاقى الكباب ولا بتشوف الطحينة
هم فاسدين ما قلناش حاجة لكن احنا مش احسن منهم كتير
و مش محتاجة نباهة عشان نعرف البيضة الاول ولا الفرخة..البيضة بتطلع منها الفرخة..لو كانت البيضة فاسدة تطلع الفرخة نضيفة بامارة ايه؟ََ!

mUsLiM يقول...

ايه الحلاه دى يا عم كبارى ..؟ :)

وبالفصحى كمان ،،

عجبتنى انا بقى جملة (( محلقا بين الطرفين )) :))

على كل حــال ،،

لا شك أن كلامك رائع ، ولا أستطيع أن أقول غير ذلك ، فالجهاد كما قال صلى الله عليه وسلم ذروة سنام الإسلام ، وعموده الصلاة

فالجهاد هو القمة ، كما عبرت أنت عنه بلفظ " الإكليل " وعموده الصلاة التى هى رأس العبادات

فمن صلحت صلاته صلح فيه كل شئ

إذن فكلامك جيد رائع فى نظرى ،،

إلا أنه يجب التنويه على مسألة وهو عدم الإحتجاج بهذا الكلام للقول أنه لا يجب الجهاد الان الا بعد هداية الناس

لا

الجهاد فرض على الأمة لإخراج المحتل الغاصب منذ سقوط الأندلس

ولكن يجب أن تكون هناك حكمة فى تناول الأمور والسير فى مسار الجهاد والإصلاح معا

كمال أنك قد أغفلت حق الخلافة العباسية والأموية والعثمانية ، وقلت أن الحال تدهور منذ نهاية الخلافة الراشده

وهذا فيه ظلم !!

فمرت الأمة الإسلامية بعد ذلك بكثير من فترات العدل والإصلاح كفترة سيدنا معاوية بن أبى سفيان رضى الله عنه وهو خير الملوك ، وكذا عمر بن عبد العزيز ، وكذا هارون الرشيد ، وكذا غيرهم الكثير

................

الأخت بنت مصرية ،،

والله يا أختى انا مش عاوزك تظلمى كل من أظهروا التدين كمظهر خارجى ، هناك أتقياء أوفياء أعلمهم باطنهم كظاهرهم ولا أزكى على الله أحدا

والله على ما أقول شهيـد

ومش عارف ايه اللى مدايقك فى مسألة دخول الحمام بس :))

الوا مش كل هم الناس المسألة دى لأن ببساطه كل الناس تقريبا عارفه انها تدخل برجلها الشمال الحمام وتخرج باليمين

ليه كل واحد ماسك المسألة دى ويقول كل همنا ندخل الحمام ازاى ..؟

انا مش شايف كده بصراحه

كما أن الاهتمام بالمسألة دى جيد لأنها من الدين ومن سنة النبى صلى الله عليه وسلم

لكن لكل شئ قدره ، هى مهمه وهناك أهم ،،

...........

دكتورنا العزيز ليكتر :)

مسألة وجدت إسلاما بلا مسلمين دى مش صحيحه فى نظرى

صحيح فى الغرب بعض العدل والحرية والقرى فى التعامل

لكن أيضا هناك زنا وخمر وفساد اجتماعى وأخلاقى ، وهناك ظلم وضحك على الناس وربا وسفك للدماء

هناك الكثير والكثير من المساوئ

وكما قال شوقى رحمه الله : -

وإذا أصيب القوم فى أخلاقهم ... فأقم عليهم مأتما وعويلا

والسلام عليكم

Here i'm يقول...

أنا حرة ..

تخيلى بقى ان شعبنا بجلالة قدره أكتر الشعوب أيماناً فى العالم بنسبة 100 %

كان السؤال ..

هل الدين أهم شىء فى حياتك .. ؟

الأجابة كانت .. نعم طبعا ..

نتخيلة واحد بيرد و هوا مغصوب على السؤال .. عيب يقول لأ .. أه أه طبعا الدين اهم شىء فى حياتى ..

على فكرة كانوا مسلميين و مسحيين ..

انتى متخيلة .. ؟؟

Here i'm يقول...

فنون ..


" الدين المعاملة "

على ما أعتقد مفيش أعمق ولا أوضح من الجملة دا ..

دينك متوقف على معاملتك و اخلاقك و علاقتك و أدبك ..

مفهمش حد ممتاز فى الجانب الدينى و صلاة و صوم و بيعامل الناس وحش او أخلاقه زباله أو غشاش و حرامى

Here i'm يقول...

دوكى ..

عارف يا دوكى .. اللى حاربوا فى 73 .. كان فيهم مهندسين و دكاترة و كان فيهم اللى مش لاقى ياكل و كان فيهم اللى سايب مراته حامل و راح يحارب ..

انا مش بقول مفيش شباب حيحارب .. لا فى .. بس انا أحارب لمصر و لأرضى مش لحماس .. اللى عايز يروح يحارب مع حماس حيروح .. و فكك بقى من اللى بيقولك الأمن و امن دولة و الكلام دا .. دول بيروحوا أفغانستان و الشيشان لغاية دلوقتى .. و بعدين مع ما مجدى حسين راح و وصل و رجع كمان ..


ثقافة حب الدنيا دى بقيت فينا كلنا بس مش معنى كده أن لما بلادنا تحتاجنا أقولها لا معلش أنا بحب الدنيا

Here i'm يقول...

سوريزا ..

كلامك عجبنى قوى .. و خصوصا أن اللى يقيم و يشد و ينصر القيم لابد ان يقيم القيم فى حياته يوم بيوم ..

علشان كده .. مبحبش أسمع من واحد كلام هو أبعد ما يكون عنه ..

كلامك فى مجمله مهم جدا ..

و كويس أن البوست عجبك

Here i'm يقول...

لين ..

القصة و الله مش حرقة دم و لا حاجة و لا بتعمد احرق دمى و دمكوا ..

الفكرة أنه أمتى كلنا و أولهم أنا نصحى بقى ..

الأسلام لازم يطلع من قلبنا و يتشاف فى تعاملاتنا و أخلاقنا قبل ما يكون مظهر

Here i'm يقول...

أنا حرة .. تانى :D

و الله يا فندم الواحد مش عارف يعمل أيه من غير سموك :D .. مجاملة :D

دا بوست لوحده يا فندم :D

بصى انا متفق معاكى و دا دايما وجه الأختلاف بينى و بين مصعب .. لما بقوله الشعب يتحمل المسئولية 80 % .. يقولى لأ :D لغاية ما الكورنيش كله فى بحرى سمعنا :D

مثلما تكونوا يولى عليكم .. بيبان كده فى الدول المتقدمة أمريكا عرفت انها أختارت غلطت بوش و بعد كده اعتذرت للعالم و لنفسهم اولا بأنهم أنتخبوا أوباما .. دى باكستان شعبها اتحرك و أسقط مشرف و بقى قيد الأقامة الجبرية ..

الشعوب هى اللى بتحرك اى حاجة .. و هيا اللى سمت الثورة ثورة مش انقلاب ..

دمتم يا حاجة :D

Here i'm يقول...

مصعبينو ..

شوفتنى و انا بكتب فصحى و محلق .. أجنن أنا عارف .. :D

الواحد مبيحبش يكتب فصحى علشان أمثالكوا ياكلوا عيش يابنى .. انا لو عايز أقعدك فى بيتك حقعدك بس اهو سيبك تسترزق :DDD

الله ينور على سعادتك .. لازم نخرج المحتل بحكمة فى تناول الأمور والسير فى مسار الجهاد والإصلاح معا .. مش أسرائيل تقعد تحضر لغزو غزة سنة أو اكتر و أحنا من أول يوم جهز الجيوش و أطلع بيها .. طيب ازاى تنتصر ؟؟ .. علشان كده اتهزمنا فى 48 و 67 علشان كده كسبنا برضه فى 73 لما أخدنا بالأسباب .. و ان شاء الله حننتصر تانى لما حناخد بالأسباب ..


لما كنت بقول الخلفاء الراشدين مكنش قصدى الـ4 خلفاء فقط .. كان قصدى كل اللى مشوا على شكلتهم .. و علشان كده بيسمى عمر بن عبد العزيز خامس الخلفاء الراشدين رغم انه مكنش الخامس .. أنا كان القصد كله كل من حكم بالعدل و القران و السنة .. و بالتالى العدل تدهور من ساعة ما أبتعد القران و العدل و السنة .. صح ؟؟


بنت مصرية .. مكنش قصدها فكرة دخول الحمام باليمين غصب علشان الناس بتدخل بالشمال .. متهتمش بدخول الحمام بالشمال و أنت حرامى و مرتشى و فاسد .. قصدها الاولويات يعنى


بالنسبة للدكتور أنا فهمت رده لما أفتكرت الجملة اللى قولتها اللى كانت بتعبر عن الفرق بين العربى و الأجنبى .. فاكرها ؟و زى ما قولت الأخلاق ثم الأخلاق ثم الأخلاق