السبت، 20 يونيو 2009

مارينا رايح جاى .. ( 1 )


19 / 6 / 2009 .. أول زيارة لطنط مارينا السنة دى ..

أول زيارة بعد .. سنة شغل .. سنة مذاكرة و كورسات .. بعد مصايب 2008

زيارة بأحلامـ جديدة .. احلامـ مكنتش معايا السنة اللى فاتت .. أحلامـ بسقف أعلى

زيارة ببصة جديدة لقدامـ .. بصة من نوعية .. أنزل و عيش ع الأرض

مش المقصود أنى ملاكـ يا سمح الله .. القصد أنكـ تتعلمـ من تجارب اللى فاتوا .. و مش لازمـ اللى جاى يتعلمـ منكـ

أوحش حاجة .. أن الواحد يكون عبرة و عظة للى بعده ..

زيارة فيها خوف أكتر من السنة اللى فاتت .. خوف من حاجات كتير قدامـ ..

زيارة بزلزال بقوة 5.6 ريختر .. أنا رجعت بفتح النت لاقيت زلزال فى الساحل الشمالى و مطروح

بس انا محستش بحاجة .. لان حسب توقيت الزلزال انا كنت فى البحر .. ببلبط :D

أول زيارة لمارينا .. أحس فيها أن مارينا هادية .. كل الزيارات الى فاتت كانت كلها زحمة و عربيات

زيارة على انغامـ منير .. بطعمـ شجر الليمون .. اول مرة أشوف حد بيشغل حدوتة مصرية فى مارينا :D

الصف فى جامع مارينا 7 فى العصر .. كان فيه عدد 7 أفراد فقط لاغير .. مش عارف يمكن علشان البلد لسه فاضية

السنة اللى فاتت كانت الجوامع بتعمل صفوف .. مش عارف

مارينا النهاردة كانت حاجة تانية .. هادية و رايقة و مياه و هوا و رمى همومـ




20 التعليقات:

ReEm يقول...

هو في امور الزحمة و عدمها نصيحة متقرش

ياقباري لو كترت قر هتلاقي المكان

الزيارة الجاية بيخنقك من الزحمة بس

حلوة حتة الزلزال و انت في المية اهو

امان برضو عن الارض


و مبرووك على المدونة ولو انك قولت هتفضل سودة بس ماجا شكله ايدها شوية غسيل بقت ما شاء الله ناصعة البياض

mUsLiM يقول...

يعنى مش عارف احسدك ولا احقد عليك ولا انق عليك ولا ايه

ناس بتبلبط

وناس ليها جلسات خبرة وتحكيم ومذكرات ،،

معلش يا كبارى

اسمحلى انق عليك واحسدك حسد الانسان لأخيه الانسان وحقد المهموم والتعبان

هههههههه

السلام عليكم

الباب المفتوح يقول...

النصيحة التي أملكها لك
بلبط كويس

Romaya يقول...

إيه جو التشويق دا يا قباري :D

بس عارف انا عجباني اوي جملة انت قولتلها ..
( زيارة ببصة جديدة لقدامـ .. بصة من نوعية .. أنزل و عيش ع الأرض )

يااااه يا محمد بجد انت اختصرت كلام كتير بالجملة دي للمقصود بيه من الموضوع دا

مش هاحسدك ولا هقر عليك زي مصعب :D

هقولك بس استمتع بوقتك وبكل لحظة فيه
اعتبرها اجازة وانسى اللي فات عشان تقدر تبص للي جاي :)

mony يقول...

يوه..هو الواد كان مقهور والا ايه
هو ايه اللى بصة لادام..وسقف اعلى
هو انت كنت ماشى لورا طول حياتك اللى فاتت

مالك!!

ومفروك ع البتاعة عقبال ما نغيروا احنا كمان ونشيلوا ام الالوان الكئيبة دى من حياتنا بقى

Jannah يقول...

يله انبسط عقبالي
:)
أنا بروح ايطاليا ان شاء الله قبل يقفلوا المطارات بسبب الانفلونزا
:D
بس الجديد هذه الصيفية انه زوجنا العزيز مادري وش فيه يرفض ملابس البحر تماما الا بشرط نكون بعيدين عن البشر
يعني تقريبا السنة هاذي مكتوب لنا ما نبلبط
بلبط انت بس يا قباري بلبط ...مو حسد لا سمح الله ;))))

Jannah يقول...

ييييييييييييييي نسيت أقول مبروك على الوطك الجديد

dr.lecter يقول...

جرررررررر بتغظني بقي

ان شالله علي اخر يوليو كده او اول اغسطس قبل رمضان اروحها وتكون فضيت من الزحمه

بصراحه السنه اللي فاتت كانت حلوه اوي الوقت اللي روحته في اخر اغسطس علشان الروقان بس مارينا 4 دي يييع زحمه كييك تحس انك ماشي في محطه الرمل هههههههههههه


مبروك صحيح علي الوك الجديد ايه ده ياعم عملنا ليزك وعملنا لوك جديد وقلق شكلك ناويها ولا ايه يابطه؟ ههههه

Here i'm يقول...

ريم ..

المكان دا زحمته رهيبة و خصوصا بالليل .. و أنا مبحبش الزحمة .. بس بتعايش يعنى .. كان جميل قوى المكان .. تخيلى مكان بيشيل 100 ألف .. شايل ألفين ولا 100 .. تحفة

قالولى لو الزلزال و انت فى المياه مش حتحس بيه .. بس تخيلى بقى لو الزلزال مركزه البحر :D

أسكتى دا أنا زهقان منه بسبب الألوان .. مش عايز يعملهالى سودا :(

Here i'm يقول...

مصعبينو ..

عارف يا مصعب و الله .. المثل اللى بيقول اللى ميعرفش يقول عدس .. دا حقيقى :D

أنا محكتش حصلى أيه .. علشان الأحراج :D .. بس أكيد حبقى أحكيلك على أنفراد :D

قول عدس كده يا مصعب :D

طالعة من بوقك سكر :D

Here i'm يقول...

الباب المفتوح ..

و دى عايزة توصيه :D

منور البلوج .. و عجبتنى قوى تصميماتك للمدليات :)

Here i'm يقول...

مروة ..

اه فعلا .. فكرة زيارة مارينا و البحر .. هيا فكرة نضافة من الهموم و الحاجات اللى كنت شايلها فى الوقت اللى فات ..

كل يوم السقف بيعلى يا مروة .. بس بيزيد الخوف معاه .. بس أن شاء الله خير

متقلقيش انا الحمد لله بجيد الأستمتاع بوقتى جدا :D

Here i'm يقول...

مونى ..

أيه يا بنتى مبتروحيش الأمتحانات ولا أيه .. دورت عليكى صدفة كتير قوى مشوفتكيش :D

لا مش مقهور .. بس تعبت الفترة اللى فاتت قوى .. الحمد لله على خير بس

الله يبارك فيكى .. بس مش عاجبنى .. انا عايزه أسود :(

Here i'm يقول...

جنة ..

فى اعلان لسمنة عندنا أسمها جنة .. بتتفرجى عليه :D .. بيفكرنى بيكى قوى :D

اه بتبسط انا .. من أجمل الحاجات اللى فيا أنى بعرف أستغل الأجازة تماما :D

لا تلاقى بس جوزك بعد الجواز .. الكرش زاد شويه :D و قلقان من المنظر .. اول ما حيشوف اللى حواليه حيقلع هوا :D

يا ستار من عينكوا يا جدعان :D

Here i'm يقول...

جنة ..

قولت حقولك فى الرد الاولانى .. الله يبارك فيكى .. نسيت ..

ىىىىىىىى .. نسيت أقولك الله يبارك فيكى :D

Here i'm يقول...

لاكتر ..

اه طبعا بغيظك :D

دى محطة الرمل بتبقى أرحم .. دا أحنا بنوصل من مارينا 7 لمارينا 5 فى ساعة :D

ما أنا قولتلك .. ليزك و نيو لوك .. و لسه زراعة شعر .. ألاقى عندك دكتور شعر كويس .. دكتور شعرى يا دكتور أتصلوا بفريق ماربيلا :D

اتقل بس .. هيا كلها سنة و الأحلام متتحققش و اتجه للأنحراف .. أنحرفت و اخواتى كلهم متجوزين و محترمين :D

ســـــاره يقول...
أزال المؤلف هذا التعليق.
ســـــاره يقول...

اول حاجه المدونة حلوة اوووي بجد يامحمد
ماتغيرش اللون وتقلبه اسود
حقيقي كده تفتح النفس :)

تاني حاجه هعلق على حكاية زرع الشعر D:
بجد والله انت كده احلى ..انا مش متخيلة شكلك بشعر ابدااا..كده لايق عليك جداااا

بالنسبة لمارينا ..فأيوة يابختك ياعم D:
روح وغير جو ماتتخيلش قد ايه الواحد بيكون محتاج رحلة يجدد بيها نفسيته :)
احنا دايما بناخد في مارينا 4 ومرة اخدنا في 5 بس 4 احلى بكتييير.. لفيت مارينا كلها بجد 4 تحفه والجو العام فيها ممتع جدااا ..ابقى افتكرني بالله عليك وانت بتاكل فريسكا .. : )

ربنا يوفقك يارب وابقى طمني على نتايجك ماتنساش

Here i'm يقول...

سارة ..


لا حول ولا قوة ألا بالله :D .. انا الوحيد اللى مش عاجبنى اللون الأبيض :( .. انا و حد تانى يعنى :D .. بس مش حبه خالص و الله مش عارف ليه ..


يخربيتى أجنن و انا حتى أقرع .. يا بنتى من حكمة ربنا على البنات .. انه خلانى أقرع .. تخيلى يعنى كوبرى و مسبسب شعره .. كان زمانى مغتصب فى أى صحراء من 12 ذئب أنثوى :D


اهو كله ألا مارينا .. دى بقيت واحدة من عيلتى :D .. مارينا 4 خرافة .. بس جربى تنزلى مارينا 7 فى شاطىء سبورت .. حيعجبك ..

قصدك فريسكا مارينا البحرية .. ولا فريسكا أسكندرية اللى بتتباع فى مارينا بس اللى زى البسكويت و الحلويات :D .. تفرق :D

ادعيلى يا حاجة بالله عليكى .. :)

The Seagull يقول...

أنا كمـان مش بحب اللون الأبيض برضه :( بيجيب لي حول في عينيـا وبحس إنه أنا مش شايفة بجد :(

الظاهر إنه كل اللي بيعمل الليزك ما بيحبش الألوان الفاتحة :D

جميلة أووي زيارتك والأجمل إنها بأفكار وأحلام جديدة وروح جديدة

ربنـا يعينك إن شاء الله وتحقق كل ما تتمنـاه :)