الأحد، 26 أكتوبر 2008

يوم مع مشارى بن راشد العفاسى .. و شكرا يا مصر



بدون مقدمات .. البوست دا مش حينفع فيه الكلامـ أساسا

بعد ما حضرنا حفل توقيع المجموعة القصصية .. بنى أدم مع وقف التنفيذ

و قابلنا محمد تهامى .. أد أيه بنى أدمـ جميل و طيب قوى

دى صور حفل التوقيع ..

بعد الحفل .. قولنا نجرب نحضر حفل تكريمـ الشيخ
مشارى بن راشد العفاسى

أحنا كنا عارفين ان الشيخ مشارى بن راشد العفاسى فى أسكندرية ..

و كان المفروض أننا حنتغدى معاه فى فندق رمادا .. بس منه لله Maga بقى

المهمـ .. طلعنا من حفل التوقيع على مسرح سيد درويش .. اللى هوا دار الأوبرا

كانت حفلة خاصة و بدعاوى .. بس على مين :D

دخلنا و بدأ حفل ختامـ الأغنية الدينية ..

كان من ضمن المكرمين .. الشيخ مشارى بن راشد العفاسى ..

مش حتكلمـ كتير بقى ..

دا فيديو الترحيب بالشيخ
مشارى العفاسى ..

و أنشودة "
شكراً يا مصر "




فيديو أنشاد الشيخ
مشارى بن راشد العفاسى ..



الحفل كان فيه ناس كتير قوى ..

اللى فكره منهمـ المنشد
صلاح الجمل .. و الفنانة صابرين .. و الأذاعى أحمد نور ..

و كانت مفاجأة الحفلة .. الطفلة
منة عرفة

و دى شويه صور ..



الشيخ
مشارى بن راشد العفاسى ..




منة عرفة ..




القاعة ..




فرقة الأنشاد اليمنى ..


صور
الولاد و البنات المتسابقين ..






دى صورة لكل المكرمين فى أخر الحفل ..


دا فيديو .. تكريمـ الشيخ
مشارى بن راشد العفاسى ..




طبعا طبعا .. حفل زى دا ..

لازمـ ولا بد يكون فى دخول للكواليس و للمسرح .. :D

مع
فرقة الأنشاد اليمنى ..




و بما أنى صاحب البلوج .. :D



طبعا للأسف يستحيل التصوير مع الشيخ مشارى بن راشد العفاسى

نظرا لكمـ الزحمة المهولة ..

بس Maga هرا الراجل بوس و أحضان .. لغاية ما قولتله حرامـ عليكـ الراجل :D

من أطرف الحاجات اللى فى الحفل ..

طلعت مندوبة قناة المحور تستلمـ جايزة القناة .. و داخلة تسلمـ على الناس اللى واقفة واحد واحد

و دخلة على مشارى بكل ثقة و بتمد أيديها بالسلامـ ..

راح بكل ثقة هوا كمان مسلمش عليها و أتحرج قوى :D

منه عرفة .. مكنتش عارفة تقرا الورقة بتاعة تقديمـ الحفل ..

يظهر أنها كانت مكتوبة بخط وحش قوى :D





الأحد، 19 أكتوبر 2008

أسبوع .. .. !


الأسبوع العربى بيبدأ من الجمعة ...

الأسبوع الفرنسى و اليونانى بيبدأ من الأتنين ..

أسبوعى أنا بيبدأ من الخميس ..



الخميس .. 9/ 10




يومـ عمل شاق .. زى أى يومـ خميس عندى

قبض عمال .. مرتبات .. عروض اسعار ..

أنتهى يومـ الشغل .. و بدأت الأجازة الأسبوعية ..

روحنا على محطة الرمل .. قعدنا ع القهوة شويه .. كان كله ضحك

بس دا الطبيعى يعنى .. مكنش مبسوط من اليومـ ..

كنت طالب من ماجا الـ IT بتاعى .. فيلمـ If Only ..

قالى انا نزلته و هات الفلاشة .. و كان الفيلمـ دا أجمل حاجة فى اليومـ ..

و أنتهى اليومـ كعادة يومـ الخميس بصلاة الفجر و النومـ ..

بعد مباحثات طويلة مع الزعيمـ .. حول كيفية أيقاظى يومـ الجمعة للفطار و الصلاة

و كان الحديث بيدور فى نطاق .. بكره بالجزمة :D





الجمعة .. 10 / 10



كان لغاية الساعة 12 بالليل .. كان يومـ عادى جدا ..

قابلت خليل .. و أحنا الأتنين بنبقى أجازة السبت .. يبقى مينفعش ننامـ زى الكتاكيت بدرى

قررنا ندخل السينما .. روحنا عند السينما ..

لاقينا الزمهلوية .. شبه منحرف .. أخر كلامـ .. زى النهاردة ..

قولتله أنا مش حدخل الحاجات دى أبدااااااا .. قالى ندخل أجنبى .. قولتله فل

و احنا بنتفرج على الأفلامـ الأجنبى .. الدنيا بدات تشتى ..

و دا كان اول يومت مع الشتا .. و لما يجى الشتا ..

تيجى سيرة بحرى و القلعة و الكسكسى و امـ على .. أنطلقنا على بحرى ..

روحنا أكلنا أمـ على و كسكسى .. انا أكلت امـ على و خليل ضرب كسكسى ..

طلعنا على القلعة .. و كانت فاضية و الدنيا بتشتى و البحر كان عالى .. و قمة الروعة

قبلنا هناكـ حد بيدعى أنه ساحر .. و راجل بتاع شاى ماشى يقول دا فاشل دا شيطان

الدجال او الساحر .. مسكوا و قاله تعالى انت بقى و أشتغله شويه

و الراجل اللى كان عامل فيها فلوط .. كان بيرتعش من كتر الخوف :D

و كان فى شاب مصرى شكله هوا و أبنه انهمـ عايشين برا مصر ..

الراجل دا ضحكت كمية ضحكـ مكهولة .. أحنا كنا بنضحكـ على ضحكه و الله مش من الموقف ..

صادف أننا و أحنا ماشيين من بحرى الراجل دا ركب معانا ..

فحكلنا أنه عايش فى هولندا و معاه الجنسية

و بيوصينا .. لو جاتلكـ فرصة برا مترجعش .. قولتله أنا بنصحكـ أنت مترجعش :D

و كان بيتكلمت ان هولندا حلوة قوى .. و أزاى أنه بقى بيشوف اليونان دولة من الدرجة الثانية

روحنا .. و كالعادة كان عندى مباراة مع الزعيمـ .. أنا أتسحب و أنا بفتح الباب ..

و هوا نايمـ نص نومة .. و أنا بقفل الباب .. لاقيت حد بيقولى ..

أتفضل يا بيه .. أتفضل يا باشا .. قولتله ألف شكر يا فندمـ :D






السبت .. 11 / 10



كان أول يومـ أقابل فيه البنات الأمريكيات ..

اللى بيدرسوا عربى فى كلية الأداب جامعة الأسكندرية

قبلتهمـ قبل كده فى رمضان .. بس مكنتش حاططها فى حساباتى

مكنتش أخد أنطباع جميل قوى عنهمـ .. بمعنى أصح كنت متحفز فى لقائهمـ ..

عجبتنى بساطتهمـ فى لبسهمـ قوى .. عجبتنى تلقائيتهمـ فى الكلامـ ..

بيهزروا كتير .. و مش بيزعلوا من الهزار أو رخمين .. لا بالعكس كانوا لذاذ قوى ..



الأحد ... 12/ 10



اليومـ دا كان فرمـ .. كان الصبح شغل لغاية 4:30 ..

و بعدين ميتنج الحملة الساعة 5:00 و اتلغى الميتنج

و بعدين كورس الـ HR من الساعة 6:00 لغاية الساعة 10:00

أول يومـ أروح فيه بدرى من كتر الهدا ..



الأتنين .. 13 / 10


بداية كورس اليونانى .. و التحفة الأغريقية " أيوانة " ..

حاجة كده أسكندرانية جادعة تحمل الجنسية اليونانية

و بداية النطق اليونانى .. لغة جميلة قوى .. انا فرحان بيها قوى

و بعد كده طلعنا على كارلوس كافية .. و قابلت البنت الأمريكيات ..

المرة دى ركزت فى أساميهمـ .. Molie .. Anaa .. و بنت مش فاكر أسمها :D



الثلاثاء .. 14 / 10



اليومـ دا كان من أجمل أيامـ الشغل .. كنت مستنيه ..

كان معرض
BLUEXPO معرض تركيا العائمـ ..

فكرة المعرض دى بتدور فى سفنتين من تركيا حيلفوا مصر و ليبيا و تونس و الجزائر

علشان يقابلوا رجال الأعمال العرب فى مجال الأنشاءات و الماكينات ..

عجبتنى قوى الفكرة التسويقية للمعرض ..

لو انت متعرفش عن صناعتى و بلدى أى حاجة .. أنا مش حستناكـ تجيلى ..

لا أنا اللى حجيلكـ .. و بعدين مش حجيلكـ بشويه Data sheets ..

لا دا أنا جايلكـ بمعدات و ماكينات و بتجارب ..

و احنا ماشيين فى المعرض .. ماشى مستغرب .. أنا مش فى معرض تركى ..

انا فى معرض ألمانى .. معقول دى تركيا ..

معقول الأنتاج دا كله تركى ..

شدنى قوى حجاب البنات التركية المسلمة ..

سألت واحدة عن حجابها و قالتلى أحنا المحجبات مش بنلبس بنطلونات خالص ..

يمكن الجيبات مكنتش طويلة قوى و مش قصيرة قوى ..

بس الفكرة أنهم عرفوا يعنى أيه حجاب ..

الحجاب مش بنطلون جينز أسترتش معلش مش عارف أسمه البتاع دا :D ..

بعد الشغل روحت البيت و اتغديت

و طلعت قابلت صحابى على القهوة .. قعدنا و ضحكنا شويه و روحنا



الأربعاء .. 15 / 10



خلصت شغل .. قابلت أسماء و روحنا اتغدينا فى جاد .. كان الأكل تحفة الحقيقة

بعد كده طلعنا على كورس اليونانى .. خلصنا الكورس و قابلنا الأمريكيات و روحنا كارلوس

المفروض اننا حنطلع عليهمـ أسماء عربى .. كانت Anaa شعرها صغير قوى

و كانت بتقولى انت لو شوفتنى من شهر كان شعرى زي شعركـ ..

بعد بحث و تنقيب فى الشخصيات الكرتونية ..

كانت .. صلعت .. شخصية طلعت زكريا فى سوبر هنيدى :D



الخميس .. 16 / 10



كان يومـ شغل فرمـ .. بحس أنى مش بشتغل غير يومـ الخميس أساسا

جاتلى رسالة و أنا فى الشغل من مصعب .. محمد انا فى أسكندرية لو ينفع نتقابل كلمنى

كنت عايز أشوف مصعب قوى .. نفسى أشوف العقلية دى ..

بس للأسف .. مصعب جاه فى يومـ بيبقى مفرمة بالنسبالى ..

كلمت مصعب الساعة 8 و قولتله انا لسه واصل بيتى ..

قالى و انا رايح أركب و أطلع على القاهرة

كنت زعلان قوى انى مش حقدر أشوفه ..

بجد يا مصعب كنت عايز أشوفكـ و الله ..

جالى تليفون الساعة ..

أحنا فى حفلة ختام مهرجان مونت كارلو الدولى فى مكتبة أسكندرية

الحفل كان غريب شويه .. شاب سورى مع فرقته قاعدين و بيغنوا بالعود قصايد .. كانت جميلة الحقيقة

فرقة من تونس .. بنت بتغنى تونسى .. من صعوبة كلماتها قولت دى سعاد ماسى نعمة :D

فرقة من الجزائر ... شاب جزايرى مش بس بيغنى جزايرى ..

لا دا بيغنى قبيلى .. ولا كلمة فهمتها و الله العظيمـ

كانت المذيعة عايز تعمل معاه أنترفيو قالها مش بتكلمـ عربى :D

و فى الختامـ كان فريق وسط البلد .. الأمريكان كانوا مبسوطين منهمـ قوى ..

بعد الحفلة طلعنا على القهوة قعدنا شويه و بعدين طلعنا على " عبده تشكيلة "

عبده تشكيلة .. من أشهر محلات الأكل فى أسكندرية .. محل سوبر ماركت .. بيعمل شويه أكل تحفة

السندويتش بيبقى حلو قوى .. بس اللى يشوف و هوا بيعمل السندويتش ميكلش منه حاجة :D

هو طريقة السندوتشات معفنة .. بس ممتع الحقيقة :D

بعد كده روحنا فى مشروع اللى هوا الميكروباص كان من نوعية Tata

حاجة كده من قديمـ الأزل .. مكنش معانا ولا عربية و كانت الساعة 3:30 الفجر و دا فاضى

أول ما ركبناه حسينا أن فى ريحة حريقة :D

المهمـ .. روحنا و كالعادة بدأ مسلسل الفر و الكر من الأسد اللى فى البيت عندى :D

و على رأى طلعت زين فى فيلمـ أفريكانو ... أن الأسد لا يأكل ألا كل خمسة أيامـ

بما مسكنى اليومـ دا و أنا بفتح الباب .. زعيمى أزيكـ تصبح على خير .. بس :D






الجمعة .. 17 / 10


أكتر يومـ تعبت فيه من كتر الترفيه :D

نزلت من بتنا بعد صلاة الجمعة الساعة 2 كان عندى كورس يونانى ..

خلصت الكورس طلعت على كارلوس كافيه اتغدينا و قعدنا هناكـ لغاية الساعة 12:00 بالليل ...

عرفت أن عيد ميلاد سولتو النهاردة .. روحت مع يوسف جبنا التورتة و الفومـ ..

الفومـ .. فكرة يوسف الصياد الشيطانية

طلعنا على المعمورة .. الساعة 1:00 .. أحتفلنا بسولتو .. مثل أحتفال الأبطال عند الهزيمة :D

كان عيد ميلاد لذيذ قوى .. كانت المعمورة متألقة .. كانت فيها أعداد خفيفة جدا جدا ..

كان معانا أمجد بيه .. و حد طيب قوى ..

كل سنة و انتى طيبة يا سولتيا :D

مشينا من المعمورة الساعة 4:15 .. و صلت بيتى على صلاة الفجر ..

لو طلعت و اتوضيت بابا حيصحى .. أتوضيت و صليت فى الجامع ..

روحت البيت و مسلسل الكر و الفر أبتدى .. قلعت هدومى و غسلت وشى و نمت

و بابا صحى من هنا .. دخل الاوضة يبص عليا لاقانى نايمـ .. و أنا بضحكـ فى سرى

تانى يومـ بيقولى انت جيت أمتى .. كنت سائل ماما بابا أنامـ امتى .. قالتلى نامت الساعة 3:30

قلتله انا جيت 3:45 .. قالى يا أبن الكلب :D .. قالى عمكـ راح القاهرة و جاه و انت لسه مرجعتش البيت :D



السبت .. 18 / 10


اتغديت اليومـ دا فى البيت ... علشان مزعلش الزعيمـ ..

و بعدين طلعت على كارلوس كان معانا Emile اتكلمنا فى كل حاجة ..

قالتلى أنها شغالة فى مكتبة أسكندرية محرر فنى ..

اتكلمنا عن الأنتخابات الأمريكية .. و قالتلى أنها مع أوباما .. و أنهمـ بيكرهوا بوش جدا جدا

اتكلمنا عن العشاء اللى جمع ماكين و أوباما .. و أزاى ماكين باين عليه الأعتراف الضمنى مش الصريح

و أزاى ماكين غير فريق الدعاية كله .. و انه قال أن أوباما على بعد خطوات قليلة من مجد تاريخى ..

أتكلمنا عن مصر .. كانت بتقول أنها محبتهاش علشان القاهرة .. بس لما جات أسكندرية أتبسطت قوى

قولتلها أن انا لما بسأل عن مصر مش بسأل عن القاهرة .. علشان انا مواطن سكندرى

طلبت منى فانلة أبو تريكة فيها علمـ مصر علشان تديها لحبيبها لما ترجع أمريكا

قالتلى أنها راجعة تانى أمريكا و مش عارفة أذا كانت حترجع مصر تانى ..

قولتلها على مقولة اللى يشرب من النيل لازمـ يرجعله تانى ..

قالتلى دى حصلت معايا من سنتين و رجعت و درست العربى ..

مش عارفة المرة دى أيه اللى حيحصل :D

بعد كده مشينا و روحت لصحابى أتفرجنا على ماتش الأهلى فى القهوة ..

أتعشنا عند جاد .. و روحنا الساعة 12:30 .. و كان بابا فى ذهول :D





الخميس، 16 أكتوبر 2008

للرجال فقط ... قصدى للخنازير فقط

كنت ناوى أعمل بوست عن فيلمـ If Only ..

و رمانسيته و فكرته اللى شدانى قوى

كنت ناوى أعمل بوست عن معرض BlueXpo التركى ..

و فكرة تسويق المنتجات التركية و الحجاب التركى ..

كنت ناوى أحط صور يومـ كان لذيذ قوى مع بنات أمريكيات

بتدرس العربى فى جامعة أسكندرية و أزاى مهوسين بحاجة اسمها مصــر

قلت معقول حتكلمـ عن الرومانسية و التجارة ..

و البلد كلها بتتكلم
ـ عن التحرش و اللى بيحصل

فكرة بوستى فى الصورة ..
أحترمـ نفسكـ .. اه هيا بتتكتب كده .. أحترمـ نفسكـ

لا هوا أنجليزى ولا هيا فصحى ولا حتى يونانى .. دى بالعامية

أحترمـ نفسكـ .. بقولها ليا و لكل شاب و راجل و عجوز و عيل كمان ..

ما نحترمـ نفسينا بقى شويه ..

لا متقوليش كلامـ من نوعية أصلها أتحرشت بيا الأول

أفرض ياسيدى أنها كانت ماشية عريانة ف
ى الشارع ..

هل دا يديكـ الحق أنكـ حتى تلمسها ؟!!!

و بعدين كل البنات صايعة و قلة الأدب .. أنت كمان قليل الأدب !!



أنا شايف أننا أحنا الشباب اللى السبب فى التحرش من الألف للياء ..

قولى بقى أصل الجواز .. أصل مش عارف ايه التلفزيون و ميلودى

أصل أنا شوفت هيفا و اليسا لابسين كذا ..

أصل أنا شباكـ قوضتى بيطلع على حمامـ نانسى ..

من الأخر و أنا و انت عارفين .. أنكـ ملكش مبررات يا برنس ..



لو راضى تكون مكان الراجل دا فى الصورة .. يبقى أقفل مدونتى و متجيش تانى هنا

لو مش عارف تشوف نفسكـ كده . علشان مكابر و شايف أنه حق ليكـ

أسمحلى أقولكـ أنكـ كده .. اه أنت عبد لجسمـ أى بنت ..

لما تقعد تحومـ و تلف حوالين البنت و مش ناقص غير أنكـ تهوهو ..

يبقى أنت عبد ليها و لجسمها و مش بعيد جزمتها

لما تأمن على كل اللى حواليكـ علشان محدش يشوفكـ ..

و عارف أن فى ربنا شايفكـ و عارف أنت بتهبب أيه ..

يبقى أنت عبد ليها و لجسمها و مش بعيد جزمتها

لما ترخص نفسكـ .. بعد ما وصفكـ ربنا بأنكـ أقومـ من المرأة بما فضلكـ به الله ..

يبقى انت عبد ليها و مش بعيد جزمتها كمان





فككـ من الكلامـ بتاع مامتكـ و أختكـ و و البوقيين الحمضانين دول ..

بما أننا دلوقتى بقينا بنخاف على موزتنا أكتر من أخواتنا و أمنا ..

لو تضمن أن مراتكـ .. أو أنتيمتكـ .. أو حبيبتكـ ..

مش حتروح السوق .. أو تمشى فى الشارع .. أو تركب اتوبيس .. أو تشتغل

يبقى أحب أقولكـ .. أتحرش بكل بنت تشوفها

أتحرش ما أنت مفيش نخوة ولا دمـ و لا أحساس و لا غيرة ..

ما أنت خلاص متفرقش حاجة عن الخنزير ..

و لو تسمح متكملش البوست للأخر علشان الجزء الجاى بتاع الرجالة بس ..




للرجال فقط ..

دى حملة لجمع مليون توقيع لدعمـ مطالب أمى و أمكـ و أختى و أختكـ و مراتكـ و مراتى

بقانون يحميهن من التحرش ..

الحملة دى من 2005 .. أخر تحديث ليها فى 6 / 2008

لينكـ تحميل العريضة للأسف مش شغال ..

بس دا لينكـ

المركز المصرى لحقوق المرأة


الرهان فى موضوع التحرش فى وجه نظرى مش قانون ولا نقاب ..

الرهان فى الراجل المصرى فقط لاغير ..







السبت، 11 أكتوبر 2008

مع شيخ الأزهر ضد وقاحة الصحافة





اه دى وقاحة مش صحافة ..

أنا ضد شيخ الأزهر قالب و قالباً ..

بس دا ميدنيش الحق أنى ألبسه لبس بابا الفتيكان

واحد حيقولى دلوقتى .. دى حرية صحافة ..

أشمعنى فى أيطاليا بيستهزؤا بابا الفاتيكان

و كفاية جهل و رصة من حقوق النشر و الإنسان و مش بعيد يكون فيها حقوق الحيوان

احب أقولهمـ ..

علشان حقوق الإنسان .. من حق شيخ الأزهر أنه يرفع قضية على عادل حمودة

علشان حقوق النشر .. من حقى كمواطن أنى أساند شيخ الأزهر فى قضيته

و أشمعنى فى أيطاليا الدعارة مهنة .. و أشمعنى فى أيطاليا فى مافيا



عادل حمودة أخطىء لما صور شيخ الأزهر فى لبس بابا الفاتيكان

و اللى يغلط لازمـ يتحاسب .. ولا هوا الدنيا كلها تتحاسب ألا الصحفيين



اللى مش عاجبنى تعامل الصحفيين مع القضية ..

الصحفيين فى القضية دى نوعين ..

صحفى بيسخن فى شيخ الأزهر و سماحته و دماسة أخلاقه و بيختمـ بالموقف الرائع للريس

و صحفى مش عايز يتكلمـ فى الموضوع دا علشان عارف أن عادل حمودة غلط فى شيخ الأزهر


النوع الأول ..

دافع عن وجهة نظره .. و قال رأيه .. و أحترمـ رأيه و لكنى مازلت مختلف معاه

النوع التانى ..

دا بقى اللى أنا بعيب عليه .. مش علشان صحفى اللى غلط مقولش أنه غلط ..

مش معقول أقوله النهاردة أنه غلط .. طيب أفرض مثلا أنا غلطت قبل كده زيه .. أيه العمل !!



لو فرضنا أن عضو مجلس شعب .. أخوانى .. عمل نفس الصورة ..

كان حيبقى ايه رد فعل الصحف القومية ؟؟

طيب لو كان عضو مجلس الشعب .. وطنى .. و عمل برضه نفس الصورة

كان حيبقى شكل جرايد المعارضة أزاى ؟؟


أنا شايف أن عادل حمودة أخطأ ..

و اللى يغلط يتحاسب ..

كان ريس .. كان وزير ... كان غفير .. يتحاسب

مش معقول الصحفيين يكونوا فوق القانون !!!






الأحد، 5 أكتوبر 2008

يوم فى ضيافة عمرو خالد

تحديث



قبل ما أتكلم فى أى حاجة .. أحب أحكى موقف حصل يومـ الوقفة

عمرو خالد جاله شاب عنده 19 سنه معاه أستمارات 1000 متطوع

و وعد أ / عمرو أنه حيجبله 35000 ألف واحد لوحده

كان رد أ/ عمرو أنه لو دا حصل حيمسكه مدير أعماله لمدة عام كامل






عيش و ملح .. دا الأسمـ المبدئى لحمة صناع الحياة الجديدة

الحملة المرة دى بتركز على شقين مهمين .. شق الأقتصاد و شق التعليمـ

زى ما كانت حملة حماية بتركز على شق الصحة ..

حملة عيش و ملح .. تهدف فى المقامـ الأول ..

إلى تأكيد فكرة أن الشباب العربى قادر لو توفرت لديه الأمكانيات أن يغير وجه العالم



الفرق بين الفقير و البائس ؟

الفقير هو القادر على التعاطى مع ما يدور حوله ..

أما البائس هوا الذى يفقد التعامل مع كل من حوله ..


هدف الحملة .. تحويل 7000 أسرة من أسرة بائسة لأسرة ناجحة منتجة

7000 أسرة .. بمعدل حد أدنى 5 متطوعين لكل أسرة




الحكاية ببساطة ..

أكيد فى أسر فى مصــر خرجت أولادها من التعليمـ بسبب الفقر و ضيق ذات اليد

أنا حوصل للأسر دى عن طريق بحوث الحالات ..

حسأل فى المدرسة .. مين المتسرب

حسأل فى منطقتى .. مفيش حد فقير يا أخوانا خرج عياله من المدرسة

حسأل فى العشوائيات .. حسأل عند الميكانيكى .. حسأل فى كل حتة

بعد ما حوصل للأسر المعدومة دى .. حشوف أيه الحاجة اللى تقدر تشتغل فيها الأسرة دى

لو الأب مثلا يجيد الصيد .. أعمله مركب صيد

فى مثال من بنى سويف .. كانت الأم بتجيد الفول و الفلافل .. و تم عمل لها محل فول و فلافل

و هكذا .. طيب فرضا أن الأب أو الأم لا يجيدوا شىء

مش حيبقى عائق قدامى .. ححرك لجنة التدريب و حأطلب منها تدرب الأسرة على أقرب مهنة تجيدها الأسرة

و فى نفس الوقت .. بتتحركـ اللجنة التعليمية مع الواد أو البنت و بتعدها و تدرسلها المناهج التعليمية

و فى نفس الوقت .. بتتحرك لجنة دراسة الجدوى .. لدراسة أسعار السوق و الخامات

و مع كل الخطوات .. بيتم تصوير الحدث .. سواء شراء أو تركيب أو تعليم أو تدريب ..

بحيث تكون فى داتا مجمعة مصورة فى الأخر .. علشان تكون زى كاتلوج للناس بعدى

دى الفكرة ببساطة ..





-*- لو فى مشاكل فى تحميل الورق ياريت تبلغونى ..

التحميل كالأتى .. كليك على اللينك حيفتح صفحة فيها جدول ..

كليك على free فى أخر الجدول تحت ..

و بعدين حتفت صفحة جديدة فيما مستطيل للدونلود فى أعلى الصفحة

لو حد حابب الداتا أبعتهاله ميل .. مفيش مشكلة


بالنسبة للأسئلة ..

بنت مصرية .. مدونة انا حرة

سألت عن البرنامج الزمنى للحملة ..

كل اللى معروف حاليا عن البرنامج الزمنى ..

بيدور فى الأتى ..

حتى 30 / 11 / 2008 .. جمع داتا للمتطوعين و العدد المطلوب 35000


حتى 15 / 12 / 2008 ... جمع داتا للمشاريع للعرض

1 / 1 / 2009 ... الأعلان الرسمى للحملة عن طريق أ / عمرو خالد فى الأعلامـ

31 / 12 / 2009 .. أنتهاء الجزء الأول من الحملة .. لو نجحت حيكون فى تارجت تانى لسنة 2010


بالنسبة للمواعيد ..

الموضوع مش محتاج وقت فراغ كبير يعنى ..

انا مثلا و أعوذ بالله من قول أنا ..

طالب فى الفرقة الرابعة كلية التجارة .. محاسب فى شركة مقاولات

باخد كورسات HR .. و مدير أحدى المشاريع فى الحملة

الموضوع بسيط قوى يا جماعة .. بس عايز اللى يشتغل حيشتغل

فى واحد فى صور الدويقة أسمرانى و لابس شنطة .. الولد دا أنا أعرفه ..

شغال فى كارفور 12 ساعة .. و الله 12 ساعة .. أزاى راح هناك و قعد و ساهمـ ..

أنا فى الفريق بتاعى .. بيكون فى أجتماع أسبوعى ..

كل واحد بيشيل مهمة و بيجى بيها كاملة الأسبوع اللى جاى


معاد أسبوعى معتقدش أنه كبير ..



داليا .. مدونة دقى يا ساعة الجامعة

شكرا على مكالمتكـ الجميلة قوى .. بجد شرفتينى

و حسستينى أن فى أهتمام .. و بالنسبة للسبق .. أنا مش ناسى


و أتمنى أنى أكون رديت على أسئلتكـ فى التحديث دا ..



نورهان .. مدونة مصرية

دكتور لاكتر .. مدونة نوستالجيا

أتمنى أكون عرضت الفكرة صح ..

و أتمنى تكونوا معانا أن شاء الله ..



أنتظروا فى التحديث القادمـ .. مشاريع جنوب الصعيد .. أن شاء الله




- - - - - - -





فى صلاة التهجد ليلة 27 .. جالى تليفون الساعة 2 صباحا

المكالمة كانت بتدور أننا يومـ الأحد الموافق 28 لازمـ نكون فى القاهرة و أن التجمع الساعة 6 صباحا

حاولت أعتذر علشان ظروف شغلى و علشان عرفت انه فطار عادى و مش حتفرق معايا يعنى

بس أتقلى كلمة غريبة قوى " مفيش أعذار .. أنت مدير مشروع ولازمـ تكون موجود "

أنا بصراحة حسيت أن فى حاجة فى الموضوع ... منين فطار عادى و منين مفيش أعذار

المهمـ .. كالعادة كنت الساعة 6 فى محطة سيدى جابر .. ركبنا الأتوبيس .. و وصلنا

المكان كان فى شارع يوسف عباس .. متفرع من شارع صلاح سالمـ .. مدينة نصر

مركز الكشافة العربى .. مكان شيكـ قوى .. كل حاجة فيه حلوة الحقيقة .. قاعة الأجتماعات جميلة و شيك

الأكل كان نضيف .. المكان كله عاجبنى الحقيقة .. فى على الجدران صور الكشافة العربية

نرجع لموضوعنا .. بعد ما وصلنا أتكلمـ مدير صناع الحياة على مستوى الوطن العربى ..

و بلغنا أعتذار أ/ عمرو خالد عن المجىء لظروفه الخاصة .. و قلنا أنه بعتلنا فيديو مخصوص لينا

تعالوا نشوف الفيديو ..



الفيديو للأسف مش كامل .. بس جايب النقط المهمة

المهمـ .. الفيديو كان صاعقة لينا .. الفيديو أدانى دفعة جامدة قوى

فى كلامـ كتير قوى مش فى الفيديو .. يمكن علشان الكلامـ يخصناعلشان كده منزلش

بس أوعدكوا الفيديو التانى يكون عندكوا ..

عمرو خالد بيتكلمـ فى 35 الف متطوع تكون أستمارتهمـ جاهزة فى 30 / 11

عمرو خالد بيقول انا لو عايز أجمعهمـ فى ساعة حجمعهمـ بس أنا عايزكوا انتوا اللى تشتغلوا

عمرو خالد بيقلنا الناس بتقول أن صناع الحياة مش حتنفع من غير عمرو خالد ..

و انا عايز لما أموت تكون صناع الحياة أحسن .. الحتة دى قصرت فيا قوى

كان احساسه فيها عالى قوى ..

معقول فى حد بيبقى عايز اللى يجى بعديه يكمل و يستمر

معقول مفهوم الشعلة و ازاى تكون من أيد لأيد موجود عندنا

عمرو خالد بيكلمنا عن أن الأعلامـ مش حيبقى سند دائمـ لينا ..

علشان الحملة مدتها سنة .. و علشان كده الموضوع عايز رجالة سواء بنات أو ولاد




بعد الفيديو .. مكنش التصفيق بتاع كل مرة

مش دا التصفيق بتاع فيديوهات أو مكالمات عمرو خالد

فى صوت وشوشة غريب فى القاعة .. عمرو خالد بيطلب مننا 35 الف متطوع نهاية نوفمبر .. أزاى ؟

معقول حنعمل حملة مدتها سنة .. معقول حنساعد 7000 اسرة .. معقول حندير 35 الف متطوع


علشان كده لاقيت أجابة مقنعة لوجود مصر كلها فى القاهرة اليومـ دا ..

الموضوع مهمـ قوى .. ايه دا بجد .. حلمـ و حيتحقق




المفاجأة بقى .. شركاء الحملة ..

اليونيسكو ..


اليونيسيف ..


برايس وتر هاوس لأدارة الشركات و المنح


أسلاميكـ ريليف .. منظمة مسلمى أوربا


المركز الثقافى البريطانى


المركز الثقافى الكندى




الدول المشاركة فى الحملة .. على مستوى صناع الحياة

مصــر ..

الجزائر ..

المغرب ..

السودان ..



دا الموضوع مينفعش فيه خسارة .. حياة أو موت ..

ليه كان الموضوع مفاجأة بالنسبالنا .. ؟

فى رأيى أننا كنا حسين أن حملة التسرب من التعليمـ حتفشل ..

و يمكن علشان كان معاد الأعلان عنها فى رمضان و أتأجلت و دا أدانا شعور قوى أنها أتلغت

يمكن علشان المرة دى فى مشاريع و دراسات جدوى و عمالة و شغل شغل مش تطوع و بس

بس كانت مفاجأة رهيبة ..


المهمـ .. بعد ماشوفنا الفيديو .. عرضولنا فكرة المشروع من تانى

و البرنامج الزمنى للمشروع .. و مواعيد الاعلان عن الحملة ..

و بعد كده روحنا فطرنا فى المطعمـ .. و كان الأكل نضيف قوى

و بعد الفطار .. كله بيسلمـ على كله .. كنت واقف مع جروب فى 7 أفراد من 7 محافظات

واحد كان مهندس من أسيوط بس شغله فى أسوان و ماسكـ مشروع فى صناع الحياة أسوان

واحد من البحيرة .. واحد من الشرقية .. بنت من أسوان .. واحد من المنوفية

بنت من القاهرة .. واحد من العريش و دا بقى أنا فاكره قوى علشان حملة حماية

بعد الفطار ..

كان فى الـ Work Shop عن المتطوعين و أسباب ترسبهمـ و عودتهمـ و كيفية التعامل معهمـ

يمكن انا كنت فى أخر مجموعة اللى كانت بتتكلمـ عن

" وضع تصور كامل لحملة جذب متطوعين جدد و كيفية تصميم أستمارة المتطوعين"

و بعد كده أنتهى اليومـ الساعة 10 مساءا



كنت مندهش قوى .. البنات أكتر من الولاد ..

معقول البنات دى حتسافر أسوان و أسيوط و سوهاج الساعة 10 بالليل من القاهرة

ايه اللى يخلى البنات دى تيجى و تشتغل و تسافر و تتعب ؟

انا من أسكندرية و المسافة ساعتين زمن و كنت بتنطط علشان أروح ..

لو انا صحيت 6 صباحا .. البنات دى صحت أمتى ؟

أكيد فى رسالة عايزيين يوصلوها ..

أجمل حاجة فى لقاءات صناع الحياة .. أنكـ بتشوف شباب نضيف صاحب رسالة واحدة

" التنمية "







دى وئاثق اليومـ ..


الورقة الأولى .. التعريف بالحملة

لينكـ التحميل

http://www.MegaShare.com/498885





الورقة التانية .. Work shop عن جذب المتطوعين

لينكـ التحميل

http://www.MegaShare.com/498890






أهمـ ورقة .. الورقة الثالثة .. أستمارة التطوع

لينكـ التحميل

http://www.MegaShare.com/498893



لو حد حابب يشتركـ .. دا إيميلى

Kabbary13@hotmail.com



و دى بقى صور اليومـ ..














-.-.-.-.-.-.-.-.-.-



صناع الحياة فى الدويقة ..

الصور اللى جاية دى ملهاش علاقة بالموضوع ..

بس تعالوا نشوف شباب صناع الحياة عملوا أيه لأهل الدويقة ..





















-.-.-.-.-.-.-.-.-.-.-.-

Life Makers

-.-.-.-.-.-