الجمعة، 3 يوليو 2009

ميدان جمال مباركـ و تكييف كاريير و أنا موافق





كل ما تحتاجه هو مدونة و موقع أخبارى مصرى و جريدة فاشلة ومجموعة تعليقات

يا حبذا بتويتر مع كوب كوكا توت مشبرة من الديب فريزر مع رشفة تلازمها كلمة " حيخربوها "

حتى تنعت و يكتب على صدركـ .. مثقف

و تحتاج أيضا إلى حجرة 10 م × 10 م و مكتب مسوس و أضاءة خافتة و نظارة قراءة

لكى تتمكن من ألقاءها على المكتب عندما تغضب و كرسى أشبه بكراسى الاعتراف

و نظرة للسماء عبر نافذة المكتب مع رفع القدمين على المكتب

مفكرا فى المقال اليومى غدا .. انا حكتب لشعبى !!

حتى تنعت و يكتب على صدركـ .. زعيمـ

فعلها جمال مباركـ و أستمر فى حملته لأفقر قرى مصر .. هل أحد يرى عكس ذلكـ ؟؟

نعمـ .. كل هذا من تراكمـ حكمـ والده .. و لكن أيستمر الحال أمـ نغيره ؟؟

خرج علينا مثقافينا و زعمائنا .. لكى ينبذوا و يتهكموا من تسمية ميدان فى قرية الزرابى بجمال مباركـ

و كل ما خدش حيائهمـ .. و أراق دموعهمـ .. و تقعشر أبدانهمـ .. ليه يسموه جمال مباركـ ؟؟

لمـ يخدش حيائهمـ ان فى مصر أفقر قرى فى العالمـ و خدش حيائهمـ أن الميدان بأسمـ جيمى

لمـ تزرف دموعهمـ على حال أبناء بلده .. لمت تقشعر أبدانهمـ من الفقر و الجوع

لمـ تقشعر أبدانهمـ من ملابس الأطفال المشردة ..

و لكنهمـ أكتفوا بكلمة " يا حرااااااااامـ " .. حفاظا على الجو المأساوى

يا سادة يا مدعون .. أرحمونا بقى .. وحياة أبوكوا خليكوا فى تكيفاتكمـ المركزية

يا سادة يا مثقفون .. فلتنزلوا للقرى و تبحثوا .. او لتتحدثوا عن الديمقراطية و أيران

يا سادة يا زعماء .. الوطنية أن تحل مشاكل الوطن .. مهمومـ لا تكفى بل مهمومـ و أيدى بتشيل معاكوا

و الله .. لو إن كتابة ميادين مصر كلها بأسمـ جمال مباركـ سترفع عن فقراء مصر الفقر

فأنا موافق ..

موافق كمواطن لا مثقف ولا فيلسوف ولا زعيمـ ولا خطيب ولا الجوهرى حتى




أيها المثقفين و الزعماء .. انزلوا و عيشوا ع الأرض ..

يا سادة .. لو ذهبتمـ لهمـ لأقاموا لكمـ أفراح و سيقيموا لكمـ ضريحاً بعد عمر طويل

يا سادة .. هؤلاء على أتمـ الأستعداد بتسمية طفل من اطفالهمـ بأسمـ من يساعدهمـ .. مش بس ميدان

يا سادة .. هؤلاء يحتاجونا كلنا .. من جمال لعلاء مروراً بالشيوعيين و الاخوان و الأشتراكيين

يا سادة .. هل تتخيلون ان تقف أمراة و تقول لكـ ..

كل اللى عايزاه أن بنتى تعرف تستحمى و تنشر غسيلها .. نفسى تطلع من هنا

مع العلمـ .. انه لا يوجد صرف ولا مياه و لا كهرباء والحمامـ Share بين 100 بنى ادمـ




حاولوا ان تذهبوا و تروا تلكـ القرى.. لا تذهبوا إلى الصعيد .. فقد تستهلكـ السيارة أو يضيع وقتكـ هباءاً

فقط حاولوا أن تذهبوا إلى قرى القاهرة الكبرى .. او إلى عشوائيات القاهرة

لا تقولوا نتصدق و نزكى و نعطى و نهب .. قولوا ذهبنا و رأينا و ساعدنا و سنساعد

يا سادة يا أفاضل .. أما السكوت أو المساعدة ..



سؤال ..

حتى ترى أننا نجيد الكلامـ و التحدث فقط ..

قارن بين عدد الذين كتبوا عن كارثة الدويقة .. و عدد الذين ذهبوا و ساعدوا



ملحوظة ..

لو كنت من متابعى المدونة .. فانت تعلمـ موقفى من جمال مباركـ

ولا تنسى .. لست من مؤيدى نظرية البديهيات !!

لو كنت من زوار المدونة .. فلتقرا هذه الموضوعات قبل التعليق

أهداء إلى جمال مباركـ .. بلادنا لا ترحب بالناجحين

بين حملة عمرو خالد و جمال مباركـ .. شقلبت العلمـ









15 التعليقات:

Maga يقول...

والله يا عمنا عندك حق

مع اعتراضي على عائلة مبارك و الحكومة مش شايف ادنى مشكلة انهم يسموا اى مكان باسمه طالما هوا اللى طور وهو اللى جمل سواء بقة بفلوس الشعب بابوه باي حاجة
وسبحان الله ياكباري فى نفس الوقت اللى اتكلموا فى الموضوع دا ويوميها تقريبا فى الاسماعيلية سموا اسم شارع فى الاسماعيلية باسم الخلوق حمص بسبب جول فى ماتش لعب ومحدش اتكلم او فتح بوقه او حتى حد سمع تعالى مقارنة بسيطة اوى شارع باسم لاعب كورة علشان جاب جول فى لعبة ولا شارع باسم واحد طور وجمل منطقة عشوائية انهى الاولى ( مع اعتراضي على الموقفين )بس انا مش شايف ادنى مشكلة ومش حكاية يعني نتكلم فيها ونعمل فيها سيناريو وحوار
فعلا شعب فاضي والله

ســـــاره يقول...

للأسف احنا بنمسك في الشكليات وبس
دايما بتهمنا المظاهر ..
يعني ازاي ميدان يتسمى جمال؟!!
مش الحمدلله اوضاعهم بتتحسن بفضل الله ثم جمال!!

شوف اي حد ضد جمال مبارك حيهاجموا لمجرد انه جمال مبارك حتى لو ايه ماعمل!!

بالمناسبة الصورة الأولى حلوة اوووي عجبتني جدااا والله ..المنظر ده اول ماشفته في فيلم الشبح لفت نظري جدااا وبقيت اقارن بينه وبين فينيسيا..يعني تخيل ياكباري لو الأماكن الحلوة دي كان فيها اهتمام ونظافة وتحف معماريه ممكن كانت تبقى عاملة ازاي..!! :)

Fatma يقول...

لا ماعلش اسمح لي الموضوع مش بالسطحية دي
مين جمال مبارك ؟ ايه صفته ؟ منين ال 83 مليون اللي اتصرفوا ع القرية عشان يتعمله فيها ميدان ؟ دي فلوسي وفلوسك لو عايزين يسموا الميدان باسم يسموه على اسم حد قدم حاجة للبلد حتى لو تافهه انما مين دا معلش
بعدين الموضوع ماحصلش عليه هوجة زي مانت متصور مش اكتر من خبر مستفز كان لازم مايمرش مرور عادي لان كل دا تحضير للي بعد كدا الخبر مش ميدان اتسمى جمال وخلصت الحكاية كل دا تهيئة نفسية للشعب للي جاي بعد كدا ودي في حد ذاتها حاجة مستفزة جدا

دا غير ان تحسين اوضاع قرية فقيرة مش انجاز يشكر عليه الحزب دا واجبهم ومش تفضل من حضاراتهم دي ضرايبنا
20 % من دخل كل بني ادم كفيلة انها تحسن اوضاع كل قرى مصر مش قرية واحدة لومش عارفين يصرفوا الفلوس في مكانها صح يسيبولنا ضرايبنا واحنا هنساعد بيها الناس ونبقى نجيبلهم فاتورة

Maga يقول...

خلاص بسيطة يا فنون ميعملش حاجة واهو كدة كدة بنضرب على قفانا وهو واجع دماغه ليه ونعيش احنا بقة ونضرب دماغنا فى الحيط
بس انا لا شغلنى اللى تبقوليه ولا اللى بيقوله كباري
انا اللى شاغلني انه فى نفس اليوم اتسمى شارع باسم حمص لاعب كورة
ايه اللى حصل يعني ولا حاجة ولا يمكن كمان حد سمع بالحكاية

Here i'm يقول...

ماجا ..

و ياريتها جات على الشارع و بس .. اعلان صفحة كاملة فى المصرى اليوم من ماكدونالذ مجانا للحضرى و حمص و ابو تريكة و فتحى مدى الحياة .. صاحب مستشفى فى الدقى مدى الحياة علاج لحمص .. اه عارف انها حاجات خاصة و كل واحد حر فى ماله .. بس مين أولى ؟؟

Here i'm يقول...

سارة ..

زى ما انتى قولتى .. بيتحارب علشان هوا جمال مبارك .. على فكرة انا ياما كتبت و قولت انه كان غلط فى و فى و فى .. و معنديش مانع لما حاجة تانية تظهر اول و أعيد .. بس لما يعمل نقول عمل و اتحرك ..

المنطقة دى كان مخطط لها فعلا انهم يحولوها زى فينيسيا و يخرجوا الصيادين .. بس أستحالة .. الناس دى لو خرجت من هناك تموت .. كاتبوا على بيوتهم بالفرانكوا عرب .. a7na zay elsamk yomt lw 7'arg mn elmia

Here i'm يقول...

فنون ..

جمال مبارك أمين سياسات الحزب الوطنى .. و يظهر أنك مقرتيش كويس الخبر.. جمال خصص 83 مليون جنيه للمشاريع فى القرية و بعد كده روح على القاهرة .. أجتمع المجلس المحلى للقرية تانى يوم و الناس طلبت تغيير أسم الميدان إلى جمال مبارك علشان المكان دا اللى قال فيه جمال مبارك و أجتمع فيه مع الناس ..

بالتالى الـ 83 مليون بتوعك مش رايحين فى تجديد الميدان ..

طيب ما تطلعى تبوصى الناحية التانية .. المعارضة .. أيمن نور زار الأسكندرية لطرق الأبواب لأنتخابات الرئاسة .. هاتيلى حد أخد الخطوة بتاعة جمال من المعارضة .. حتقوليلى جمال معاه الامكانيات .. و حقولك الراجل أستخدمها ..


لا الخبر أترد عليه بغباء رهيب .. قريتى الدستور تانى يوم .. تابعتى تعليقات الزوار فى مواقع الأخبار على الخبر .. قمة الأستفزاز .. لو مارحش اهو مارحش .. لو راح لا يا عم الحلو الميدان لأ .. كله ألا الميدان ..

طيب ضرايبك مراحتش فى حتة تانية .. مش احسن ما هيا رايحة كل يوم على تصليحات كوبرى أكتوبر .. متكلمتيش ليه عن ضريبك و فلوسك لما بيتصلح بيها كوبرى كل شهرين 3 .. موحعتكيش ليه ضرايبك لما بتروح فى جراج رمسيس اللى بقاله 100 سنة بيتبنى و لسه ..


و الله لو سابولنا الفلوس ما حنطلعها .. مش حنطلعها غير للخدامة اللى أساسا بتسرق أكلنا ولا السايس بتاع الجراج اللى رايح جاى كل يوم ياخد مننا أتاوات ..

يا ست الكل .. الناس دى لا عايزة تعليم و لا عايزة ديمقراطية ولا عايزة ثقافة و فن .. الناس دى عايزة عيشة نضيفة و بعد كده كلمينى على ضرايبك و ضرايبى و الميدان ..

أول زيارة لجمال مبارك لقرية كنا بنقول مفيش تانية .. راح التانية .. قولنا حيزهق .. راح التالتة و الرابعة .. فين بقى المعارضيين اللى خايفين على البلد .. فين أنتى ياللى خايفة على الضرايب .. ساعدتيهم ازاى و لا حتساعديهم ازاى .. فين انا و فلان و علان من البنى أدمين دى ..

البوست الجاى حوريكى صور و قوليلى رأيك .. و بكاميرتى .. و اتفرجى بقى و قوليلى الميدان ..

و على طريق ماجا .. و ربك أسمى مصر كلها جمال مبارك لو حيشيل الفقر من الناس التعبانة دى ..

ألا صحيح .. كان فين الناس من لفتات مصر مبارك .. اللى مالية مصر كلها ..

Romaya يقول...

اخيرآآآآآ ظهرلي البوست .. احمدك يارب
يا اخي دانا نزلت الفاير فوكس علشان مدونتك بالذات .. يلا ولا الحـّوجه (H)

-----
هسألك سؤال واحد يا محمد

هي قرية الزرابي هي القرية الوحيدة الفقيرة في قرى صعيد مصر ولا في قرى اكثر فقرآ منها؟؟

ولا دي بداية اسم وشعار جديد يسمى
شعبية جمال مبارك؟!!

و سواء كنت بأيد جمال ولا لاء
اللي عمله واجب مادام بيقدمه لبلده كما يقال .. متبقاش تفضيل منه عالشعب زي ماقالت فنون !

وياسيدي مش هنهاجم ولا حاجه
بس هو يستمر دا لو ناوي فعلأ في بداية عملية الاصلاح دي .. ومتبقاش بروبجندا وخلصت الحكاية

الموضوع مش حكاية انا مع ولا ضد
ومع دا هيعمل ايه؟ وضد دا بيعارض ليه؟!

ورغم كل دا في ناس بتتفرم زي اصحاب القري دي وغيرها كتير وسط الحزبين دول
ادنى شيء بيطلبوه هو اقل احتياجات الحياة اللي متوفرتيش حتى
او دعا اسرة بكاملها لمربع من اربع حيطان يسترهم

وخلينا معاك يا محمد انشالله حتى يسمي مصر كلها .. مصر جمال مبارك ونلاقي التغيير فعلآ ..

بس يا خوفي لتكون تخليد لأسمه مش أكتر !

Fatma يقول...

يالهوي يا كوبري

لا اقرا ردي تاني بليز

انا فين قولت ان ال 83 ملوين اتصرفوا على الميدان !!!!!!!! ميدان ايه اللي ممكن حد يتصور انه اتصرف عليه المبلغ دا

وبالتالي ردك كله عليا غلط

بالنسبة للنقطة الاخيرة احب اقول لحضرتك ان طبيعي في العالم كله يتم تسمية مشاريع باسم رؤساء الجمهورية او الملوك او وات افر

انما ماسمعناش عن ميدان اتسمى باسم ابن رئيس جمهورية قبل كدا مصر ليها السبق الحقيقة !!!!

وبعدين المحجوب عملكم في اسكندرية طفرة ليه مافيش ميدان باسمه ؟ ولا منصب المحافظ اقل من منصب امين لجنة السياسات ؟ ولا عشان المحافظ مش ابن الريس ؟
ياشيخ بلاش كلام فاضي كله رسم على كبير وتهيئة الرأي العام لقبول جمال عشان يتم انتقال الحكم بهدوء مش اكتر ودا سبب اعتراضي في الاساس

Here i'm يقول...

فنون ..

أنا فهمت من ردك أنك بتقولى أن 83 مليون من ضمنهم تطوير الميدان و كده ..

و بعدين أنتى نسيتى أنك كنتى بتقولى ان الفلاحين لو أختاروا و كان فى انتخابات ديمقراطية .. أكيد حيجبولك الاخوان .. و المثقفين زى ما قولتى مش حيبجيبوا الأخوان .. و بالتالى حتظهر أيران مصرية .. فيها أيه لما الراجل يروح يكسب أصوات الناس دى ..

و بعدين أيه الكلام الكبير دا .. تهيئة لقبول جمال .. قوليلى مين مرشحك لأنتخابات الرئاسة ؟؟ .. على فكرة يا جمال يا دمار .. يا جمال يا مصر كلها حتبقى المحلة .. يا جمال يا أما كل اللى أنتى شايفاه حيتنهب و يتسرق .. أيه رأيك ؟؟

Here i'm يقول...

مروة ..

يا خساااااااااااااارة :D
بس مجوبتيش على سؤالى .. هيا الساعة كام ؟؟ :D

جمال مبارك يا مروة دى مش أول قرية يزورها دى القرية على ما اعتقد الرابعة أو الخامسة

اللى عمله واجب مش بيتعمل .. اللى عمله زى بالظبط لما يقولك لواء شرطة يساعد أمراة .. ما دا واجب اللواء .. بس مفيش واجبات بتتعمل و مفيش أبلة بتعاقب ..

لو شوفتى منطقة زينهم .. شوفتى كانوا أزاى و بقوا أزاى ..

القرى اللى زارها حصل فيها حاجات ..
و بعدين لو شعبية مش أحسن من اليفط و الميكروفونات

Fatma يقول...

ردك اثبتلي انهم نجحوا نجاح منقطع النظير الحقيقة :)

انت اهو بتقول يا جمال يا هتبقى فوضى ودمار ودا بالظبط اللي بيحاولوا يوصلوه

اخوان مالهمش امل في الانتخابات خالص الا لو اترشحوا مستقلين وفي الحالة دي لازم موافقة نسبة كبيرة مش فاكرة كام من مجلس الشعب والشورى والمجالس المحلية اللي الاغلبية فيها حزب وطني

دستوريا لا يوجد مرشح فعلي غير جمال ودا بسبب التغيرات الدستورية اللي وافقوا عليها الشعب الجميل دا وهما مش فاهمين بيصوتوا على ايه لدرجة واحدة جابوها في التليفيزيون لا انساها كانت خارجة من التصويت على تغيرات الدستور بتقول انها اختارت الريس طبعا عشان هو البركة !!!!

في ناس محترمة وكفائات عالية ممكن تترشح بس ماحدش هيديها فرصة
دلوقتي بيتم فرض نظرية يا جمال يا الدمار وشوفوا اهو دا حتى جمال امور وبيعمل مشاريع وبيساعد الفقرا
مش قادرة ابلعه مش قادره استحمل الاستخفاف بعقول الناس البسيطة للدرجادي مش قادرة

الحل الوحيد انقسام في الحزب الوطني نفسه ويبقى فيه مرشحين اتنين من نفس الحزب والاختيار يبقى ما بينهم والجيش يتدخل بقى وهيصة

احنا هنشوف ايام مهببة

وبالمناسبة البسطاء والفلاحين هيختاروا جمال برضاهم بعد حكاية الميدان دي انا ما بقتش ضامنة حد

Romaya يقول...

مانت اللي فصلت فجأة .. ولما دخلت تاني ملاقيتكش ؟
لما تدخل اسأليني تاني الساعة كام وانا اجاوبك P:

مش عارفه ليه يا قباري في مواضيعك اللي من النوع دا او اللي بتمس السيد جمال
بتحسسني ان كل اللي مش من مؤيدينه او بيعارضوه انهم حاقدين للبلد باللي ماسكها وقلوبهم كلها غل وسواد؟!!

ومتقوليش لا والله ابدآ دانا حتى شقلبت العلم؟ :D

ياسيدي هو يكره بلاده تتعمر ونلاقي ميت خطوة للأصلاح سابقه كلام كتير عالفاضي

وبرده هارجع واقولك خوفي كله انها تكون شعبية مش اكتر ,سياسة جديدة بروزها لنفسه وتمهيد لمستقبل تحت التنفيذ
ومتفرقش كتير عن اليفط والميكروفونات اللي بتقول عنها!

Here i'm يقول...

فنون ..

لا ما هما نجحوا .. نجحوا من زمان قوى على فكرة .. و المعارضة اللى نجحتهم قبل ما هما ينجحوا نفسيهم .. نجحوا لما الفاكس بتاع السيشوار فاكر نفسه زعيم و قائد .. نجحوا لما حزب الوفد بقى قرد مستنأس من اللى بيجوا فى رحلات أنيمل بلانت .. نجحوا لما بقى حزب التجمع أسمه الحقيقى التفرق ..

و بلاش وحياة أبوكى مصر فيها كفاءات و تصلح أنها تتولى الرئاسة .. أنا عايز منك 3 أسامى تصلح للرئاسة ؟؟ .. 3 أسامى و الله و مش عايز حاجة أكتر من كده ؟؟

و بعدين أنتى ملكيش اختيارات .. يا جمال يا الأخوان .. طيب أفرضى معايا أن فى اخوانى نزل مستقل و عمل الشروط زى ال200 عضو فى المجالس المحلية .. أنتى حتختارى مين ؟؟

Here i'm يقول...

مروة ..

لا ما انا أشتريت ساعة خلاص :D

الفكرة يا مروة .. أن يا تبنى معانا يا تسكت .. لو مش حتبنى متهدش .. فى كلام أتقال سم .. فاهمة كلامى ؟؟

أنا أخد على جمال مبارك حاجات كتير .. منها أنه عايز يحتكر الأصلاح و التطوير و دا غلط و هوا اللى حيتعب مش احنا .. بس دى طبيعة العرب

لو مش حتبنى معايا متهدش يا أخى .. دى النظرية و فى الاخر تيجى تدورى اللى بيلك كتير دا عمل أيه .. ولا اى بتاع ولا حيعمل .. علشان فاكر نفسه من نوعية الكلام رصاص .. و نسى أننا محتاجين اللى يشتغل و يتعب كفاية قوى محللين و مراقبين و علماء ذرة و فسوة :D